»  شەکری تاڵ
كوردایەتی ژێر لێفە




سەرەتا با هیچ كەس كوردایەتی بە كەركوكییەكان نەفرۆشێتەوە، چونكە روباری خوێن و قوربانییەكانی خەڵكی ئەو شارە و بوون بە قەڵغانی ناوچەكانی دیكەی كوردستان گەواهی بۆ رۆحی كوردایەتی و گیانی زیندووی نەتەوەیی كەركوكییەكان كە هەمیشە سووتەمەنی شۆڕشەكان و قوربانی یەكەم بوونە.
لەوەتەی ئەم بەزم و رەزمە دروستكراوە كە هەر تیایدا خەڵكی كەركوك و ناوچەدابڕێنراوەكانی دیكە، قارەمانانی تۆڕە كۆمەڵایەتی و تەلەفزیۆنەكان لە كۆڵكە سیاسی و نووسەر و چالاكوان و خۆ بە نوخبە زان چ ئەوانەی دانیشتووی شارە ئارام و دوورە دەستەكانی هەرێمن و چ ئەو كەركوكییانەی ماڵ و حاڵ و خاو خێزانیان دانیشتووی ئەو شارانەی هەرێم و تیایانە بە میوانیش سەر لە كەركوك نادات، ئێستا بوونەتە پاڵەوانی بەردەم شاشەی لاپتۆپ و فەیسبووك و ئیعلانی جیهاد و تەپڵی شەڕ دەدەن دۆخەكە بەرەو ئاڵۆزتربوون دەبەن، بە بێ گوێدانە چارەنووسی شارەكەو سەرو ماڵی دانیشتووانە قوربانیدەرەكەی.
من وەك كەركوكییەك بەو كوردپەروەرانەی ژێر لێفە دەڵێم كە بە گوێرەی پەندی " ئاگرە سوورە لە خۆم دوورە" كوردایەتی دەكەن، ئەگەر هەر كەسێك پەلاماری ئەو گەنج و پیری شارەكەم بە پاڵپشتی هێزی پێشمەرگەی كوردستان و شێرانی دژەتێرۆر و كوڕانی ئاسایش و خۆبەخشە گیان لەسەردەستەكانی كوردستان، سنوورەكانی كەركوك دەكەینە گۆڕستانی دوژمان و وەكو چۆن ئەفسانەی داعشمان لە پێدەشتەكانی خوارووی كەركوك تێكشكاند، بە هەمان شێوە چ حەشدی شەعبی و چ سوپای داگیركەران ئەگەر بیانەوێت بەختی خۆیان تاقیبكەنەوە هەمان چارەنووسی داعشیان دەبێت، بەڵام پرسیار ئەوەیە بۆچی ئێمەی كەركوكی ببینە قوربانی سیاسەتی سەقەتی بەناو سەركردایەتی كورد، كە تەنها ئەوەی لە كەركوك كردوویانە دۆشینی نەوتەكەی و قووتی خەڵكەكەی بووە؟
ئەو پاڵەوانە ئەلیكترۆنیانە ئەگەر راست دەكەن با خێزانەكانیان بهێننە كەركوك و لەم شارە بژین و هاوچارەنووس بن لەگەڵ ئێمە ئەوجا قسەی زل بكەن هەی قارەمانانی چەرخی فەیسبوك!   

 ئیمزا
نەگبەت كەركوكی

‌ 2103 جار بینراوه‌
9/16/2017 10:29:35 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved