»  راپۆرت
سەرەڕای كێشەی كەمئاوی بەشێكی زۆر لە ئوی خواردنەوەی كەركوك بەفیڕۆدەدرێت
ئا / هەواڵ

سەرەڕای كێشەی كەمئاوی لە بەشێك لە گەڕەكانی شاری كەركوك، بەشێك لە دوكانەكانی شەقامی كۆماری و ئەتڵەس و ئەحمەد ئاغای ئەو شارە تا بەیانی بە هۆی نەبوونی تەوافەی تانكییەكانیان ئاوەكانیان بەفیڕۆ دەڕوات، جێگری بەڕێوەبەری ئاوی كەركوكیش دەڵێت:” لەحاڵەتی بوونی هەر دیاردەیەكی لایەنی كەمتەرخەم سزا دەدەن.
لەو بارەیەوە ئەندازیار جیهان ئیبراهیم جێگری بەڕێوەبەری فەرمانگەی ئاوی كەركوك ، بۆ (هەواڵ) رایگەیاند:” حاڵەتی بەفیڕۆدانی ئاو لە زۆر شوێن هەیە، ئێمەش بەپێی توانا بە دوا داچونیان بۆ دەكەین و لایەنی كەمتەرخەم ئاگادار دەكەینەوە”. 
جێگری بەڕێوەبەری فەرمانگەی ئاوی كەركوك داواشیكرد:” لەحاڵەتی بوونی هەر دیاردەیەكی لەو جۆرە فەرمانگەی ئاوی كەركوك ئاگاداربكرێتەوە بۆ ئەوەی بە دواداچوون بۆ دیاردەی بە فیڕۆدانی ئاو بكات”.
ئەندازیار جیهان ئیبراهیم نەشیشاردەوە:” بەهۆی كەمی كارمەندەوە، لە توانایاندا نییە كۆنترۆڵی هەموو گەڕەك و بازاڕەكان بكەن، چونكە دابەشكردنی ئاو بەسەر ماڵاندا دەكەوێتە ئێواران و شەوان، بۆ ئەو مەبەستەش كارمەندەكانیان ناتوانن لە شەواندا چاودێری ئەو شوێنانە بكەن كە ئاوی لێ بە فێڕۆ دەچێت”.
باسی لەوەشكرد:” ناتوانین كاتی دابەشكردنی ئاو بگۆڕین بۆ تاقی بەیانیان، لەبەر ئەوەی كارمەندەكانیان لە بەیانیاندا خەریكی چاكردنەوەی بۆڕییە شكاوەكانن”.
وتیشی:” بەشێكی زۆر لە هاوڵاتیان بە رۆژەوە فەرمانبەری حكومەتن و لە دەوامن، وا پێویست دەكات ئاو لە تاقی ئێواران دابەش بكرێت”.
ئاماژەی بەوەشكرد:” لە ساڵی 2009ـەوە تائێستا هیچ كەسێكیان بۆ دانەمەزرێنراوە، ئەمەش كاریگەری كردۆتە سەر كارەكانیان”.
لەبارەی بوونی دیاردەیەكی تر ئەویش پڕكردنی تانكەری دوای تركتۆرە لە بۆڕی ماڵان دواتر وەك بازرگانی دەیفرۆشنەوە، جێگری بەڕێوەبەری فەرمانگەی ئاوی كەركوك وتی:” بەڵێ ئەو دیاردەیەش بوونی هەیە، خۆم پێشتر سەردانی چەند شوێنێكی لەو جۆرەم كردووەو ئاگادارم كردونەتەوەو دیاردەكە نەماوە، بەڵام لێرەو لەوێ هەر بوونی ماوە، بۆ ئەوەش پێویستمان بە هاوڵاتیانە تا ئاگادارمان دەكەنەوە بۆ ئەوەی ئێمە رێگە لەو كارە بگرین”.
لەبارەی درەنگ پێگەیشتنی ئاو بە بەشێك لە گەڕەكەكان، ئەندازیار جیهان ئیبراهیم وتی:” زۆر جار هەندێك گەڕەك بەرزترن لە گەڕەكەكانی تر، وا دەكات ئاویان درەنگتر لە گەڕەكەكانی تر پێ بگات”.
جێگری بەڕێوەبەری ئاوی كەركوك داواشی لە هاوڵاتیان كرد:” تەوافە بۆ تەنكییەكانیان دابنێن بۆئەوەی ئاو بە فیڕۆ نەچێت، چونكە بەفیڕۆدانی ئاو زیان بە ماڵێكی تر دەگەیەنێت”.
نەشیشاردەوە:” چاوەڕوانی باشتربوونی دۆخی ئاو بەم دۆخەی ئێستا ناكەن، ئەویش بەهۆی ئەوەی لە ساڵی 2013 ەوە هیچ پرۆژەیەك لەبەر بێ پارەیی ئەنجام نەدراوە، ئەو كارانەشی تا ئێستا دەیكەن لە رووی سیانەوە تەنها پشت بەو پارانە دەبەستن كە لەبەرانبەر پێدانی ئاو لە هاوڵاتیانی وەردەگرن”.
ئەندازیار جیهان ئیبراهیم وتیشی:” هەر هاوڵاتییەك رۆژانە پێویستی بە بڕی (450) لیتر ئاو هەیە لە ئێستادا ، بەڵام وەك فەرمانگەی ئاوی كەركوك توانای دابین كردنی ئەو رێژەیە ئاوەیان نییە و رۆژانە بڕی  250 هەزار لیتر سێجائاو بۆ كەركوك دابین دەكەن”.

‌ 116 جار بینراوه‌
9/30/2017 10:00:46 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved