»  شەکری تاڵ
كوو نازانن گۆدەلووپی كچەكەی دۆزیتەوە




بیرمە لە سەرەتای نەوەدەكان سەردانی شاری هەولێرم كردو شەوێك لەوێ مامەوە، درامای دۆبلاژكراوی گۆدەلووپی شەوانە نمایشدەكرا، ئەو شەوە تەقەیەكی چڕو ماوەدرێژو بە جۆرەها چەكی سوك و مامناوەند كرا بەئاسماندا، ئامرازەكانی راگەیاندنیش وەك ئێستا نەبوون، ناچار تا بەیانی بە دڵەراوكێوە چاوەڕێی هەواڵ بووین، دواجار بە سەرسوڕمانەوە پێیان وتین: (كوو نازانن؟ گۆدەلووپی كچەكەی دۆزیتەوە!!).
تەقەكردن دیاردەیەكە لە برا چاو رەشەكانمانەوە بۆمان ماوەتەوە، چونكە ئەوان سارانشین بوونەو بۆ ئەوەی خەڵك بە هانایانەوە بێت زۆر گرنگییان بە مەسەلەی تەقەكردن داوە، كورد خۆی خاوەنی كەشو هەوایەكە دەنگی تیادا قەتیس دەمێنێت و سەدا دەداتەوە، بە تایبەت ئێستا سەردەمی شارستانییەتەو راگەیاندنی ئیلیكترۆنی زۆر لەوە خێراترە ئێمە بە تەقەكردن و وەهاناهاتنەوە هەواڵەكان بزانین، هاوبار ئێمە بۆ راهاتووین لە خۆشییەكان و ناخۆشییەكانیشدا هەر تەقە بكەین؟! تۆ بڵێی دەنگی تەقە ئەوەندە رۆمانسی بێت شوێنی هەموو موزیكە جیهانییەكانی پڕكردبێتەوە؟! 
من نازانم كێن ئەوانەی ئەم هەموو گوللە فیشەكە دەكەن بە ئاسماندا، بەڵام دەزانم زۆربەیان وەك قوولەی كەڵەشێر بۆ یەكتری دەسەننەوەو هیچی تر، ئەمە لەكاتێكدایە زۆربەی خەڵك برسییەتی و بەهۆی قەیرانی داراییەوە بە قۆناغێكی سەختی گوزەراندا تێپەڕ دەبێت و دەبێتە هۆی رەوینەوەی دڵی هەندێك كەس لە دۆخەكەو هەست بە نامورادی دەكات و نائومێد دەبێت. 
ئەم دیاردە ناشارستانییە بە زۆری گەنجانی دەستبەتاڵی گرتۆتەوە، جا ئەگەر هەست بە بەرپرسیارێتی بكەن بەرانبەر بە ژیانی خۆیان و ئارامی شارەكەیان، هەڵگرتنی گوللەیەك بۆ رۆژی رەش ئەركێكی پیرۆزترە لەوەی تەقەی خۆشی پێ بكەن و دڵی خەڵكی خۆمانی پێ راچەڵەكێنین و خوێنی هاوخوێنەكانی خۆمانی پێ بڕێژین، چونكە ئەو گوللانەی لە شەوی ئەنجامدانی ریفراندۆم و رۆژی دواتری كران بە ئاسماندا بەشی بەرپەرچدانەوەی گەورەترین ئەگەری نەخوازراوی دەكرد. 
لەم سەردەمی پێشكەوتنی تەكنەلۆژی و بازرگانی و پیشەسازییە دەبێت بیر لە بەرهەمهێنان بكەینەوە نەك بە هەدەردان و بە فەتارەتبردن، جا ناكرێت رووی گازندەمان بە تەنها هەر لە گەنجان بێت، چونكە بەرپرسی گەورەی حیزبی و حكومیشمان هەن سەریان بۆ بەزمی وا زۆر ئێشێ، باشە ئەگەر هەموو شتێك گۆڕاوە بۆچی هێشتا بە تەقەكردن گوزارشت لە خۆشی دۆزینەوەی كچەكەی گۆدەلووپی دەكەین؟!
 
 ئیمزا
عەبدولڕەحیم سەرەڕۆ

‌ 904 جار بینراوه‌
9/30/2017 10:29:20 AM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved