»  کوردستان
مه‌راسیمی پێشوازی و به‌خاكسپاردنی سه‌رۆك مام جه‌لال راگه‌یه‌نرا


له‌ راگه‌یه‌نراوێكدا مه‌كته‌بی سیاسی یه‌كێتیی نیشتمانیی كوردستان، ورده‌كاری رێوره‌سمی پێشوزای و به‌خاك سپاردنی سه‌رۆك مام جه‌لال-ی خسته‌ڕوو، كه‌ ئه‌مه‌ ده‌قه‌كه‌یه‌تی:

مه‌كته‌بی سیاسی یه‌كێتیی نیشتمانیی كوردستان، له‌په‌ژاره‌ی بێڕاده‌ی كۆمه‌ڵانی خه‌ڵك و لایه‌نه‌ سیاسیه‌كان و ته‌واوی دڵسۆزو هاوڕێیانی مام جه‌لال، دڵنیایه‌. بۆئه‌وه‌ی بۆ كۆچی دوایی سه‌رۆك مام جه‌لال، ئه‌ركی ئه‌مه‌كدارییان به‌پێی به‌رنامه‌ جێبه‌جێ بكه‌ن. بڕگه‌كانی مه‌راسیمه‌كه‌ بۆ رای گشتی راده‌گه‌یه‌نین:

یه‌كه‌م: ته‌رمی سه‌رۆك، پێش نیوه‌ڕۆی هه‌ینی ده‌گاته‌ فڕۆكه‌خانه‌ی سلێمانی، به‌پێی پرۆتۆكۆڵی پێشوازی له‌ سه‌رۆك، به‌رنامه‌ی ره‌سمی و جه‌ماوه‌ری و سیاسی، له‌فڕۆكه‌خانه‌، مه‌راسیمه‌كه‌ ده‌ستپێده‌كات.

دووه‌م: كه‌ژاوه‌ی شكۆمه‌ندیی سه‌رۆك، بۆ دوا نوێژی به‌ره‌و دیوانی خودا به‌ڕێكردن، به‌ره‌و مزگه‌وتی گه‌وره‌، به‌ڕێ ده‌كرێت.

سێهه‌م: له‌مزگه‌وتی گه‌وره‌وه‌، سه‌رۆك، به‌ره‌و دوائارامگای ژیانی، له‌ ده‌باشان، كه‌ هه‌وارگه‌ی دڵگیری خۆی بوو، چونكه‌ رۆژانه‌ دڵی به‌وه‌ خۆش ده‌بوو سلێمانی به‌ئاوه‌دانی و جوانیی ده‌بینی. به‌ئاماده‌بونی میوانانی مام جه‌لال و جه‌ماوه‌ری خه‌مبار، دوا دیداری دڵسۆزانی مام و گه‌له‌كه‌مان، ئه‌نجامده‌درێ.

چواره‌م: یه‌كه‌م رۆژی تازیه‌ی سه‌رۆك، رۆژی شه‌ممه‌ (7/10/2017) سه‌عات 1/ی پاشنیوه‌ڕۆ، له‌یاریگای سیروانی نوێ كه‌ ده‌كه‌وێته‌ دووڕیانی سه‌رچنارو به‌رامبه‌ر هۆڵی هونه‌ر. هه‌روه‌ها، هاوكات له‌ (11) شاری تری كوردستان (هه‌ولێر، كه‌ركوك، دهۆك، هه‌ڵه‌بجه‌، زاخۆ، رانیه‌، كۆیه‌، كه‌لار، سۆران، چه‌مچه‌ماڵ و خانه‌قین) مه‌راسیمی تازیه‌ ئه‌نجامده‌درێ.

رێنوێنی رێكخستنی میوانانی كه‌ژاوه‌ی سه‌رۆك:

1- له‌ده‌رگای فڕۆكه‌خانه‌وه‌، هه‌تا ده‌گاته‌ مه‌ڵبه‌ندی سلێمانی، مه‌ڵبه‌نده‌كانی كه‌ركوك، چه‌مچه‌ماڵ، هه‌ولێر، كۆیه‌، راپه‌ڕین، دهۆك، موسڵ و شه‌نگال له‌گه‌ڵ لقه‌كانی رێكخراوه‌ دیموكراسی و جه‌ماوه‌ری و سه‌ندیكاكان، به‌خۆیان و ته‌واوی ئه‌ندامان و دۆستان و دڵسۆزانی مام جه‌لال، له‌سه‌عات 11/ی سه‌رله‌به‌یانیه‌وه‌، پێشوازی له‌ سه‌رۆك ده‌كه‌ن.

2- مه‌ڵبه‌نده‌كانی سلێمانی، گه‌رمیان، هه‌ڵه‌بجه‌، خانه‌قین، له‌گه‌ڵ رێكخراوه‌ دیموكراسی و سه‌ندیكاو سه‌رجه‌م دڵسۆزان له‌سه‌ر جاده‌ی شه‌ستی.. له‌نزیك (بۆڵینگ)ه‌وه‌ هه‌تا ئارامگای سه‌رۆك، پێشوازی ده‌كه‌ن.

3- جه‌ماوه‌ری كوردستان و دانیشتوانی سه‌ربه‌رزی سلێمانیش، دڵنیاین، به‌پێی رێوشوێنی مه‌راسیمه‌كه‌، ئه‌ركی وه‌فادارییان به‌رامبه‌ر سه‌رۆك مام جه‌لال ئه‌نجامده‌ده‌ن.

 شایه‌نی باسه‌، پرۆگرامێكی تری هه‌مه‌لایه‌نه‌ له‌لایه‌ن لیژنه‌ی باڵای مه‌راسیمی حكومه‌تی هه‌رێمه‌وه‌، بڵاوده‌كرێته‌وه‌، بۆ ئاگاداری ته‌واوی لایه‌نه‌كان.

خوای گه‌وره‌ سه‌بوری هه‌موو لایه‌كمان بدات و پشتیوانیشمان بێت.. بۆ ته‌واوكردنی رێگای خه‌باتی مام جه‌لال.

مه‌كته‌بی سیاسی

یه‌كێتیی نیشتمانیی كوردستان

ئێواره‌ی  4/10/2017

‌ 590 جار بینراوه‌
10/5/2017 12:16:43 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved