»  وتاری هەفتە
كــۆنـگـرەی بــۆ ببەستن نـەك پرسە رۆحی تاڵەبانی پێویستی بەهەڵوێستە نەك فرمێسك
بورهان حاجی سلێمان



هەرچەندی هەواڵی مردنی رەوانشاد سەرۆك مام جەلال كتوپڕ نەبوو، چونكە لە پێنج ساڵی رابردوودا، بە هۆی خراپی باری تەندروستییەوە، هەموومان ئاگامان لە ئازارەكانی ئەو سەركردەیە بوو و دەمانزانی كە بەداخەوە چیتر ئەو مامە چوست و چالاكە ناتوانێت بێتەوە گۆڕەپانی سیاسی و باڵانسەكەی راست بكاتەوە، یان هەر هیچ نەبێت بە گۆچانەكەی هەندێ خوێندكارە لەرێ لادەرەكانی (تەمێ) بكات، بەڵام لەگەڵ ئەوەشدا هەواڵەكەی سێشەممەی رابردوو هەمووانی تاساندو داخی نا بە ناخی هەمووانەوە. 
ئازارەكانی تاڵەبانی هەر تەنها لە پێنج ساڵی رابردوودا نەبووە، بەڵكو بە درێژایی تەمەنی خەباتی كە نزیكەی سێ چارەكە سەدە دەبێت، ئەو رابەرە نەتەوەییە خەمی نیشتمانەكەی لە كۆڵ  و ئازاری میللەتەكەی لە ناخ و بیری سەربەستی لە هزردا هەڵگرتووەو چیا بە چیا، شار بە شار وڵات بە وڵات، حەیرانی تراژیدیای گەلێكی ستەم دیدەو سروودی مافی چارەی خۆنووسین و گۆرانی پێكەوە ژیانی بە گوێی سروشت و مرۆڤوڤایەتیدا چپاندووە.
رەنگە هیچ شتێك لە عێراقی پڕ (نیفاق)و كوردستانی پڕ لە (شیقاق)دا، هێندەی خەمی لەدەستدانی تاڵەبانی، سەركردەو حیزب و مەزهەب و نەتەوە جیاجیاكانی كۆی نەكردبوونەوە، ئاخر مام جەلال ئەندازیاری دیبلۆماسیەت و شۆڕش، دەیزانی چۆن و كەی مافەكانی كورد بە ئاشتی بسەنێت و كەی پێویست بكات بە چەك وەریبگرێتەوە، لە هەردوو حاڵەتەكەشدا وای لە دوژمنانی كردووە رێزو خۆشەویستیان بۆی هەبێت.
هەواڵی كۆچی دوایی مام جەلال زۆر كەسی گریاندو زۆرتریشی خەمباركرد، هەمووان لەدەستدانی ئەو سەركردەیە بە زیانێكی گەورە بۆ كوردستان و عێراق و ناوچەكە دادەنێن، ئەو فرمێسك و حەسرەتانەش كاردانەوەیەكی سروشتی بوو بۆ پێگەو رۆڵ و مێژووی تاڵەبانی، بەڵام ناشرینترین فرمێسك لای من فرمێسكی هەندێك لە خوێندكارو هەڤاڵە دێرینەكانی خودی مام بوو ، كە لە دوای نەخۆشكەوتنی سەرۆك و سكرتێرەكەیانەوە، بە لادان لە رێبازەكەی تاڵەبانی یەكێتییان كردە حیزبێكی بێ ئیرادەو پاشكۆی ئەم و ئەو، لە حیزبێكی پێشەنگ و خاوەن دیدی تایبەت و هەڵوێستی جێگیریشەوە كردە حزبێكی راڕاو بێ سەرو بەرەو فرە كوێخا، تاوای لێهات ئەو سەركردایەتییە عیللەتدارە پەتای دووبەرەكی گواستەوە بۆ قودسە یەكهەڵوێستەكەی مام و ئیرادەی سەقەتی دەستەمۆكراوی خۆیان بەسەر یەكێتییەكەی كەركوكیشدا سەپاند.
ئێستا هەر ئەوانەی بوونە هۆی ئەوەی مام بە خەمی حاڵی یەكێتی و كوردستانەوە سەربنێتەوە، دەیانەوێت پاكانە بۆ خۆیان بكەن و وەكو داخ لەدڵی ئەم كۆستەی كوردان دێنە بەر شاشەی تەلەفزیۆنەكان و نمایش دەكەن.. براینە روحی مام فرمێسكی لێتان ناوێت هەڵوێستی دەوێت، وێنەی مام مەكەنە وێنەی پرۆفایلی فەیسبوكەكانتان، رێبازەكەی مام و پەیڕەوی یەكێتییەكەی بكەنە نەخشەڕێگای رابوونی یەكێتییەكەی مام، ئاڵای رەشی بۆ هەڵمەكەن، ئاڵا سەوزەكەی بەرزو پیرۆز راگرن.. پرسەی بۆ رامەگرن كۆنگرەی بۆ ببەستن و خوێنی نوێ بخەنەوە شادەمارەكانی حیزبەكەتاندا، تا رۆحی مام ئاسوودەبێت و گەردنتان ئازاد بكات. 




‌ 1214 جار بینراوه‌
10/7/2017 10:26:31 AM
Print Friendly and PDF
بابەتی زیاتر ...
123
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved