»  وتاری هەفتە
چیتر پێویستمان بە شێرەكان نییە
بورهان حاجی سلێمان





رووداوەكانی چەند رۆژی رابردوو بەر لەوەی شكست و كارەساتێكی نیشتمانی و نەتەوەیی بێت كە هەموومان لێی بەرپرسیارین، راچەڵەكانێكی مێژوویی گەورەیە بۆ گەلی كورد تاكو ئیدی دونیابینی بۆ ژیان و رووداوەكان بگۆڕێت و وەكو دەرهاویشتەیەكی شكستیش دەبێت چەمكەكان بە هاوشێوەی روخسارەكان گۆڕانكاری ریشەییان بەسەردا بێت و چیتر كەس پێی وانەبێت ئەوە شێرەكانن وڵات دەپارێزن و دەبێت ئێمەش وەكو ئاژەڵەكانی دیكە دوایان بكەوین.
لە كلتوری رۆژهەڵات بە گشتی و كورد بەتایبەتی شێر پایەیەكی پیرۆزی هەیە، ئاژەڵە، دڕندەیە، مێشكی نییە.. ئەمانە كێشە نین، موریدەكان بەشانازیەوە وەكو نازناو دەیبەخشنە سەركردەكانیان و ئەوانیش بە شكۆوە كەوڵی شێرەكان لەبەر دەكەن، بۆیە ئێستا ئەو كوردانەی نازناوی شێریان هەڵگرتووە، لە ژمارەی راستەقینەی ئەو شێرانە زیاتر بێت كە ئێستا لەسەر رووی زەوی ماون!
بە هەر سەركردەیەكی كورد بڵێیت رێوی، دەروێشەكانی ئەگەر نەشتكوژن تیرۆری فیكرت دەكەن، كەچی (ئێرفین رۆمێڵ) ئازاترین و زیرەكترین فەرماندەی سەربازی ئەڵمانەكان كە لە جەنگی جیهانی دووەمدا هاوپەیمانانی هەراسان كردبوو، ئەڵمانەكان زۆر خۆشیاندەویست و شانازییان پێوەدەكرد، بەڵام ناویان نەنا شێرە كوڕەكەی جێرمان! بەڵكو نازناوەكەی (رێوی بیابان) بوو، چونكە رێوی نیشانەی زیرەكی و فیڵە ئەوانیش بە پێچەوانەی ئێمەوە هەمیشە ئەقڵیان لە هێز لا گرنگترە، ئەمەش كڕۆكی كێشەو هۆكاری شكستییە یەك لە دوای یەكەكانی كوردبووە بە درێژایی مێژوو، كە هەمیشە بە هۆی عەقڵیەتی كورتبین و بێ پلانی شێرەوە كەوتووینەتە تەڵەی هەرەس و شكست و ئاشبەتاڵەوە.
ئێمە پێمانوابوو عەبادی كە ئێستا ئەویش بوغرابووەو خەریكە خۆی بە دەردی پارتی دەبات، بێهێزو دەسەڵاتەو ناتوانێت پانتۆڵەكەی خۆی هەڵبكێشێت، هەر بەڕاستیش ئەو خاوەن گروپێكی بێهێزی ناو حیزبی دەعوە بوو، بەڵام بەبێ پەنابردنە بەر گوتاری ئاگرین، لەماوەیەكی كورتدا بووە هێمای عروبەو شیعە، لەبەرانبەردا شێرەكانی ئێمە بە غرور و گوێنەدانیان بە چارەنووسی كوردستان، بەرەو تەڵەو داوەكان راپێچمان دەكەن، بۆیە ئەگەر زوو بە ئاگا نەیەینەوە گورگان خواردمان دەكەن، رەنجی خەبات و ماڵوێرانی و برسێتی و خۆڕاگری سەدەیەكمان بەبا دەدەن و دەیكەنە قوربانی شكۆی وەهمی شێرایەتی خۆیان، ئێستا ئێمە زۆرمان كردۆتە قوربانی شێرەكان زیاتر نیوەی خاكی وڵات نیمچە سەربەخۆییەكی تەواو، شكۆی پیرۆزی پێشمەرگە، پەیوەندی و دۆستایەتی نێودەوڵەتی، هاوپەیمانی ناوخۆیی، یەكڕیزی نیشتمانی، ئابووری وڵات، خۆبەڕێوەبردن، ئەمانەو چەندین دەستكەوتی دیكە، ئێستا زۆربەیان لەدەستچوونەو ئەو دوایی لەسەر سنگی مەحەكدان، نابێت چیتر بهێڵین شێرەكان و نۆكەر و پیاهەڵدەرەكانی شێرەكان لەوە زیاتر بەرەو ماڵوێرانیمان بەرن، ئێمە پێویستمان بەعەقڵ بوو سەركەوتنەكانمان بۆ بپارێزێت نەك بە بازوویەك بوو لەناو تاریكی نەزانیدا لەسەركەوتنی وەهمی بگەڕێَت، ئێستا كاتی ئەوە هاتووە، ناوەندی هێز لە كەڵبەكانی شێرەوە بۆ مێشكی رێوییەكان بگوازینەوە، چیتر لە ناو گەلە گورگ و رێویدا شێر ناتوانێت رابەرایەتیمان بكات و سەردەمی شێر بەسەرچووەو تەنها لە سێركدا نمایش دەكات، هەر بەڕاستیش لە چەند رۆژی رابردوودا هەرێمی كوردستانیان كردە سێرك.



‌ 2233 جار بینراوه‌
10/28/2017 8:54:34 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved