»  شەکری تاڵ
 كەللەڕەقی سیاسی




كەللەڕەقی ئەو وشەیەی لەناو كوردا زۆر باوەو رۆژانە مرۆڤ ئەم وشەیە بەخەیاڵ و سەرزاریدا دێت، ئەویش بە حوكمی ئەوەی ژینگەی رۆشنبیری ئێمە لە هەڵسوكەوت و گفتوگۆو دەمەتەقێكاندا تەنها بایی ئەوەیان پێیە لە دواجار بە كەللەڕەقی و پێداگریكردن بڕیارەكان یەكلا بكرێنەوە، بەتایبەتی ئەوكاتانەی دەمەتەقێكان لە روی زانست و زانیاریەوە لەسەر بابەتەكە بە بنبەست دەگات، لەوكاتە كەسی كەللەڕەق پەنا بۆ كەللەڕەقی دەبات و جاری وا هەیە هەردوو لایەنی دەمەتەقێكە دەیدەن لە كەللەڕەقی و هەردوولا دەچنە كەلی شەیتان و نایەنە خوارەوە، نە هیچ زانیاریەكی تریان پێ ماوە تا بڕوا بەبەرانبەرەكەی بهێنێ و یان خۆی باوەڕ بە بەرانبەرەكەی بكات و نە واز لە راكەی خۆی دێنێ، زۆر جاریش كۆتایی گفتوگۆكان بە لەیەك توڕەبوون و پەیوەندی پچڕان و هەندێ جاریش بە شەڕو بەیەكداكێشان كۆتایی هاتووە.
كەللەڕەقی بەواتا پێداگریكردن لەسەر رایەك یان لەسەر ناهەقیەك كەسور بزانرێ غەدرێكە لە هەق دەكرێت و یان سور بزانێ ئەوڕایە ساغ و تەندروست نیە . 
كەللەڕەقی كردن سەرچاوەكەی خۆبەزلزانی و یا خۆ بە فول رۆشنبیرزانی یان خۆ بەشتزانی دەگەڕێیەوە كە سەرچاوەی ئەمەیش گرێ دەرونی و نەخۆشی دەروونییە .
ئەوەی لێرە مەبەستمانە باسی بكەین كەللەڕەقی سیاسیە كەلەلایەن كەسە سیاسیەكان بەتایبەتی سیاسی حوكمڕانەوە دەكرێ و بەتایبەتی ئەوانەی بە بڕیارە سیاسیەكانیان كەریگەرییەكی زۆر لەسەر دەوروبەرو ژینگە دەخەنەوە چ بە چاكە و یان بەزۆری بە خەراپە چونكە وەك لە پێشدا باسمان كرد كەللەڕەقی لە ئەنجامی نەزانی و نەشارەزاییەوە سەرهەڵدەدات و كەواتە بڕیارە سیاسیەكە بێ شرۆڤە و شیتەڵكردن و لێكدانەوەی ئەگەرو بژاردەكان دراوە بۆیە كاریگەری خەراپەی زۆرترەو زۆرجارش بەتیاچون و نغرۆبونی خۆی و میللەتەكەشی تابیناقاقا لە قوڕی كوشت وكوشتارو هیلاكەت نوقم دەكات .
جیاوازی نێوان سیاسەت و كەللەڕەقی :
سیاسەت بریتیە لە حیكمەت و زیرەكی و توانای بەڕێوەبردن و ڕازیكردنی لایەنەكان لەسەر بنەمای قەناعەت و بەرژەوەندی گشتی بەو مانایەی بەرژەورندی گشتی لە سیاسەت كردن دەخرێتە سەرووی بەرژەوەندی تاكەكەسیەوە، هەرچی كەللەڕەقیە خویەكی ناتەندروستی خوڕسكانەی مرۆڤە و لەسەر بنەمای بەرژەوەندی تاكەكەسی و خۆبەزلزانی یان بڵێین خۆبەشت زانی و خۆسەپاندنەوەدروست دەبێت, زۆر جار لۆژیكی هێزو باڵادەسی دەیخوڵقێنێ چونكە لەكاتی بێهێزی كەللەڕەقی نامێنێ، لە كەللەڕەقیا ئەوەنەی بەرژەوەندی تاكەكەسی لەبەرچاودەگیرێ ئەوەنە گوێ بەبەرژەوەندی گشتی نادرێ .
كەللەڕەقی لەسیاسەتدا جگە لەسەركەوتنی منی باڵا هیچیتر بەرهەم ناهێنێ دەرئەنجامی كەللەڕەقیكردن لە سیاسەتدا ماڵوێرانی و نغرۆكردنی كەشتی هاوڵاتیانی وڵاتەكەی بەدوای خۆیدا دەهێنێ، كە هەرگیز خۆزگەیان پێی نەخواستووە، كەسی سیاسی حوكمڕان لەبەر ئەوەی تەنها خۆی باجی كەللەڕەقیەكەی نادات، بەڵكو میللەتێك باجەكەی دەدات بە تایبەتی ئەوكاتانەی ئەنجامەكەی پێچەوانە دەبێتەوە كە لەبەركورتبینیان لەسیاسەت و كەللەڕەقیەكەیان هیچ حیسابیان بۆ دەرئەنجامەكەی نەكردبوو.
نمونەی كەللەڕەقی سیاسی لە مێژووی گەلان و وڵاتان زۆرن كەدەكرێ چەندنمونەیەكیان بەبیرخۆمان بهێنینەوە تا زیاتر ئاشنابین بە نمونەكانی سیاسیە حوكمڕانیەكانی لای خۆمان :
* سەدام حوسێن و خومەینی كە دەستی ئاشتیان رەتدەكردەوە ئەوكاتەی شەڕیان هەڵگیرساندبوو ئەنجامەكەی هەشت ساڵ شەڕو كوشتنی زیاتر لەچوار ملێۆن كەس بوو.
* هەر سەدام حوسێن كاتێ كوێتی داگیركرد هاوپەیمانان مۆڵەتی دووهەفتەیان بە سەدام حوسێن دا بۆ كشانەوە و چاككردنەوەی دۆخەكە، بەڵام لە ئەنجامی پێداگری و كەللەڕەقی و نەكشانەوەی، ئەنجامەكەی شەڕی وێرانكردنی عێراق و گەمارۆی ئابوری ٢٥ساڵی و هەڵگیرساندنی شەڕی تایفی و خۆشبەختانەش خواردنی سەری خۆی كە گەلی عێراق هەموو پێشبینیان بۆ كردبوو.
* ئیبن كەسیر لە كتێبی سەرەتاو كۆتایدا نوسیویەتی (كاتێ سوپای عەباسیەكان دەوری دواخەلیفەی ئەمەویەكان( مروان كوڕی محمد كوری مروان) یان گرت، داوای راوێژی لە دەوروبەرەكەی كرد كە جگە لە خزمەتكارەكەی كەسی بەدەورەوە نەبو راوێژی بۆ بكات، خزمەتكارەكەشی بەم شێوەیە راوێژی پێشكەش دەكات : هەركەسێ لە كەم گەڕا تا زۆر بوو، لە بچووك تا گەورە بوو، لە داپۆشراو تا دەركەوت و كاری ئەمڕۆی بە سبەینێ سپارد، ئەمەی بەسەردێ كە تۆ بە سەرتا دێ و زیاتریش .كەواتە سیاسەت ئەوەیە خزمەت كارەكە دەری بڕی و كەللەڕەقیش ئەوەیە ئەمەویەكان چنینیانەوە لە ئاخروئۆخری ژیانیان ..
داوكارین سیاسیە حوكمڕانەكانی لەمەڕ خۆمان بە لۆژیكی ئەقڵ و مەنتیق لەگەڵ پرسەكان هەڵسوكەوت بكەن نەك بە زمانی كەللەڕەقی و خۆدەرخستنی وەك منی تاك و لەبەرچاونەگرتنی بەرژەوەندی گشتی چونكە نغرۆ بونی كەشتیەكە لەناوچونی هەمومانە...

 ئیمزا
سمكۆ شوانی

‌ 2101 جار بینراوه‌
10/28/2017 9:14:03 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved