»  باران
گرنگترین ترسەكانی ئەنجامنەدانی هاوسەرگیری لەلای خانمانی رۆژهەڵاتی ناوین
ئا/ هەواڵ


“هەركات هاوسەرگیریم نزیك بووەوە زیاتر هەستی كشانەوەم لا دروست بووە”، “بیرۆكەی هاوسەرگیری لای من زۆر ترسناكە”، ئەمانە دەستەواژە و وتەی زۆر لە خانمانی ئێمەن كە رۆژانە لە زاریان دێتەدەر، ترس لە هاوسەرگیری لەلای كچان و گەنجان بەردەوامە، ئەو كەسانەی توشی نەخۆشی فۆبیای هاوسەرگیری بوون كە ترسی هاوسەرگیری گرتوونی لە نێو كۆمەڵگەدا تێڕوانینی هەڵەیان بۆ دەكرێت، ئەو ترسە لە كۆمەڵگەی خۆرهەڵاتیدا لە نێو كچاندا زیاترە وەك لە كوڕان.

زۆر جار ئەو ترسە لە كەسێكدا زیاد دەكات بە جۆرێك لە كۆنتڕۆڵدا نامێنێ و ئەگاتە ئاستێك بێ هۆ هاوسەرگیری رەتدەكاتەوە و بیری لێناكاتەوە و سەڵتی هەڵدەبژێرێ، ئەوەش دەیگەیەنێتە حاڵەتی قەیرەیی تا تەمەنی نائومێدی، هەمو ئەوانەش هۆكاردەبن لە نەچونە نێو پەیوەندیەكی سۆزداری ئارام و بەردەوام.
(هەواڵ) بابەتێكی دەربارەی فۆبیای هاوسەرگیری بە پشت بەستن بە زانیاریەكانی (رائید ئەلعەنزی – پسپۆری دەروونی) بۆ ئامادە كردون كە تێیدا هۆكارەكانی فۆبیای هاوسەرگیری و چارەسەرەكانی خراونەتەڕوو.
ئەو پسپۆرە روونیدەكاتەوە نەخۆشییەكە حاڵەتێكی دەرونییە “گامۆفۆبیا”ی لە زانستی دەرونیدا پێدەوترێت، فۆبیای هاوسەرگیری لە ترس و دڵەڕاوكێی بەردەوام لە هاوسەرگیرییەوە دروست دەبێت و وادەكات كە ئەو كەسانەی ئەو حاڵەتەیان هەیە لە هاوسەرگیری دووربكەونەوە، بە هۆكاری ئەوەی دوودڵ و رارا دەبن لە بڕیاردان لەسەر ئایندەی باری هاوسەرگیری خۆیان، زۆرجار ئەو حاڵەتە دەگاتە ئەوەی كەسەكە كۆنتڕۆڵی هەستەكانی خۆی بەرامبەر بە ئەنجامدانی هاوسەرگیری پێناكرێ، ئەگەر چی ئەو ترسە لە زۆربەی مرۆڤەكاندا وەكو رێژەیەكی كەم بوونی هەیە، بەڵام گەیشتە ترسی ئەوەی هاوسەرگیری بەهەموو شێوەیەك رەتكرێتەوە فۆبیایە و زۆرجار دەگاتە باری نەخۆشی دەروونی و ئەو كەسە چارەسەر نەكرێت تا هەتایە تەنیا دەمێنێتەوە.
هۆكارەكانی فۆبیای هاوسەرگیری:

*هۆكاری خێزانی:
نمونە وەكو جیابوونەوەی باوان، یان كەشێكی خێزانی پڕ لە كێشە و ئاژاوە، كە ئەمە دەبێتە ترس لە لای گەنجەكانی ئەو خێزانە و رەنگدانەوەی بەسەریدا دەبێت لە نزیكبوونەوەی كاتی هاوسەرگیریدا.

*تێپەڕین بە پەیوەندی سەرنەكەتوودا لە رابردوو:
كاتێك كچ یان كوڕ رابردووی پەیوەندی سەرنەكەوتویان هەیە جا چ ماوەی مارەبڕین بووبێت یان هاوسەرگیری، ئەو سەرنەكەوتنە ترسی لا دروست دەكات لە ئەزمونی دواتردا و ئەوە لە بیریدا دەچەسپێ كە بەهەمان ئەزموندا تێپەڕببێتەوە.

*ترسان لە بەرپرسیارێتی:
سروشتی و ئاساییە كە هاوسەرگیری باری بەرپرسیارێتی دێنێتە ئاراوە پابەند بوونی زۆری تێدایە، ئەمەش وا لە هەندێ كەس دەكات پێش هاوسەرگیری هەست بە دوودڵی بكات لە نەتوانینی ئەو بەرپرسیارێتییەی كە لە پرۆسەكەدا دەكەوێتە سەرشانی.

*ئامادەنەبوون لە رووی دەرونییەوە:
واتا نەبوونی دەروونێكی ئامادەكراو بۆ پرۆسەی هاوسەرگیری لە هەموو روویەكەوە، ئەمەش ترس لە هەنگاونان بۆ پەیوەندی خێزانی دروست دەكات.

*كەسایەتی راڕا:
كەسێك كە راڕابوو لە بڕیاردان ئەگەری توشبوونی فۆبیای هاوسەرگیریشی دەبێت، چونكە ئەو كەسانە ناتوانن بڕیاری یەكلاكەرەوە بدەن لەسەرجەم بوارەكانی ژیانیان كە پەیوەندی بە خۆیانەوە هەیە، زیادبوونی راڕاییش وایان لێدەكات بیر لە هاوسەرگیری نەكەنەوە یاخود خۆیانی لێ بەدوور بگرن.

*هۆگربوون بە خێزانەوە:
ترس لە دووركەوتنەوە لە ئەندامانی خێزان و زیاد بیركردنیان دەبێتە هۆی دروستبوونی ترس لە هاوسەرگیری و هەڵبژاردنی ژیانی دوور لەو خێزانە.

*قوربانیی توندوتیژی:
مەبەست لێرەدا لە قوربانی توندوتیژی سێكسیە كە لە پایەیەك لە پایەكانی ژیان كە كەسێك توشی بووە و ئەوەش لە ناخیدا لە رەگەزی بەرامبەر رق و ترس دروست دەكات.

چارەسەرییەكان:

*رێنمایی وەرگرتن پێش هاوسەرگیری:
چوون بۆ لای كەسانی شارەزا و پسپۆر بە تایبەت دەروونییەكان و مامەڵەكردن لەگەڵ رێنماییەكانیان، ئەمەش هاوكاردەبێت لە رازی بوون بە بیرۆكەی هاوسەرگیری، هەروەها هاوكاریش دەبێت لە دیاریكردنی نیشانەكانی مەترسی تا لە ئایندەدا دووربن لە كێشمەكێشی هاوسەرێتی.

پێناسەكردنی هاوسەرگیری بە شێوە سروشتییەكەی:
هاوسەرگیری رێككەوتنە لەنێوان دوو كەس لە هاوبەشیكردن لە سات و بەرپرسیارێتییەكان، خەونەكان، هەوڵەكان، تواناكان، هەروەها ئەو ئاستەنگانەی دێتە رێیان و پێكەوە بەرەنگاری دەبنەوە لە ژیاندا.
نەخشەكێشی بۆ ژیان و بەرپرسیارێتیەكان بەشێوەی ورد:
ئەمەش یەكێكە لە چارەسەرە كاراكان، چۆن تا قوربانی بۆ بەرپرسیارێتییەكان درا و ئەرك و مافەكان پێش هاوسەرگیری زانرا، كەمتر مرۆڤ هەستكردن بە ترسی لە پرۆسەكە دەبێتەوە.

*بەشداری پێكردنی ترسەكان لەگەڵ هاوبەشدا:
ماوەی پێش هاوسەرگیری پێویستی بە لێزانی هەیە، ئەوەش بۆ بەهێزكردنی پەیوەندی لە كاتی هاوبەشیدا، چونكە باسكردن و رێككەوتن لەسەر مناڵ و كاروباری دارایی و هەرشتێكی ژیانی هاوبەشی ئەبێتە هۆكاری پتەوی و دوركەوتنەوە لەترسەكان.

‌ 370 جار بینراوه‌
11/18/2017 9:40:14 AM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved