»  پەڕەموچ
رەوینەوە لە مێگەل كەشێكی داماڵراو لە جوانی و لێوانلێو لە مەبەست لە تابلۆیەكی توماس كۆبێرادا


یاخیبوون ئەو هەڵسوكەوتە زۆر ناوازەیەی كە مرۆڤایەتی بە هۆیەوە گەیشتۆتە قۆناغی شارستانیەت و زانست، ئەگەرچی تا ماوەیەكی زۆر یاخیبوون قەدەغەكراوەو سزای زۆر گەورەی لەسەر هەبووە وەك سەركوتكردن و شاربەدەركردن و تەنانەت كوشتنیش، بەڵام ئەمڕۆ بۆتە بەشێك لە كلتووری مرۆیی و یاخیبووەكان لە مێژوودا بە پێشەنگی كاروانی مڕۆیی ناسراون، چونكە مرۆڤبوون ئەو هونەرەیە كە بەپێی ئازادبوون لە بەهاو پێوەرە كۆمەڵایەتیە باوەكان بۆی دەڕوانرێت كە یاخیبوو لە سەرەتادا هەست بە بێ بایەخیەكانی ژیان دەكات لەناو مێگەڵ، چ مێژوو یان ئەدەب گەواهیدەری راستەقینەی ئەم بابەتەن بە نمونە سپارتاكۆس و لە رۆمانیشدا یاخییەكەی ئەلبێر كامۆو و ناهاوریزەكانی كۆڵن ویلسۆن.
یاخی لەم تابلۆیەدا بەرگێكی تری لە رەوینەوە كراوەتە بەر بۆ ئەوەی بینەر لە زەینی خۆیدا ئەو دیمەنە شی بكاتەوە، مرۆڤە یاخییەكە كەوتۆتە ناو ریزێكی دوورودرێژی مرۆڤە هاوچەشنەكانەوە كە شێوەیان لە نێوان شینی ئاسمانی و خۆڵەمێشیدایە، روخسارەكان بە زۆری خەمگین و كڵۆڵن، بێزارو قێزەون و وشك هەڵگەڕاوەن تا ئاستی بەبەردبوون دەقیانگرتووە، وەك ئەوەی لە گەشەكردن كەوتبن، عەقڵیان بۆ مەبەستێك لە قاڵبدراوەو هەر هەموو خۆیان رادەستی قەدەرێكی نادیار كردووە. 
بەڵام لە كۆی تابلۆكەدا كە هیچ دیمەنێكی جوانی تێدا بەدی ناكرێت كەسێكی نامۆ لەناو ئاپۆڕای نائومێدیەكاندا دەبینرێت كە هەوڵدەدات بڕەوێتەوەو بە هەموو توانایەكییەوە خۆی لە مێگەلە مرۆڤەكان دەربازبكات، وێرای ئەوەی تابلۆكە تا ئاستی سیخناخبوون پڕە لە مرۆڤەكان كەچی ئەم جووڵەیە خۆی لە خۆیدا دەبێتە جێی سەنجی بینەرو رۆشنایی دەخاتە سەر، چونكە باس لە یاخیبوون و رەوینەوە دەكات لە مێگەل و هاوكات هەر ئەو كەسە رەنگێكی ئاگرینی كاڵی پێدراوە كە زیاتر چاوبگێر بەلای خۆیەوە رادەكێشێت جگە لە رەنگ شێوەی كەسەكەش بە جۆرێك راكێشراوە كە لێوانلێو بێت لە ئازار و ژانی لەدایكبوونێكی نوێ كە هونەرمەند وەك كەرەستەیەك بۆ بەرەنگاری و سوربوون و یاخیبون و هەستانەوە بەكاری هێناوە، ئەو كەسەی لە دیوی دەستی راست و لە پشتەوەی یاخیبوەكەوەیە هێمایە بۆ دەسەڵاتی باوی وەك باوكسالاری، یان بریتیە لە كۆمەڵە بەهاوپێوەر و دابە نەریتی سەپاوو بیروباوەڕی چەسپاو، كە وەك كولتوورێكی لاوەكی و گشتگیر خۆی بەسەر مێگەلەكەدا سەپاندووەو بۆتە بەشێك لە رەوشت و ئاكاری مرۆڤەكان و بەبێ ئەوەی بیر لە سەرچاوەو دەرەنجامەكانی بكەنەوە هۆگری بوونەو بۆتە بەشێكی گرنگی ژیان. 
دەرچوو لە مێگەڵ لەم تابلۆیەدا ئەو كەسانەن كە هەموو تەمەنیان بەو باوەڕە تەواو دەكەن گوایا بەرهەڵستی لە بیروباوەڕی خۆیان دەكەن لەكاتێكدا ئەو جۆرە بیرو باوەڕانە لەمێژوودا لێوانلێون لە قوربانی راستەوخۆ یان ناراستەوخۆ كە مەبەستمان لێرەدا هەلپەرستەكانە كە دێنە سەر سفرەی ئامادەو جێ بە شوێنكەوتەكانی بیرە نوێگەرییەكان تەنگ دەكەن و جێیان دەگرنەوە. 
یاخیبوون لەم وێنەیەدا وەك حەقیقەتێك بە تەنها لادانی رووكەشی و دابڕان لە مێگەل نییە، بەڵكو ئەوەی جێی سەرنجی بینەران بووە جووڵەیەكی زۆر سەیری تێدا دەبینرێت، وەك: خۆ هەڵوەشاندنەوە بۆ جیابوونەوە، هەوڵدان بۆ داترازان و كرانەوە، پارچەپارچەبوون بەهەموو توندوتیژی و دڵرەقی و نالەبارییەكەوە بەو مەبەستەی دەرچوون لە مێگەل قوربانی گەورەی جەستەیی و دەروونی دەبێت بەو مەبەستەی ئامانجەكانی رۆح دەستەبەربكرێت و بەڵگەشمان بۆ ئەو گوزارشتە یاخیووەكە لەگەڵ هەوڵدانەكان باڵی لێ دەڕوێت بۆ ئەوەی بگاتە قۆناغەكانی ئازادبوون و هێزەكانی رزگاربوون كەچی مێگەلەكە بە هەموو توانایەكیەوە بۆ لای خۆی رایدەكێشێت و لەمپەر بۆ رەوینەوەكە دەنێتەوە.
ئەوانەی بەرەو مێگەلەكەی دەگەڕێنەوە كۆمەڵگەیەكی نەخۆشی لە قاڵبدراوی نائومێدو بێهوودەن، كەسەكەی كە خۆی لە كۆمەڵگەكە رادەماڵێت تووشی نائومێدی و كڵۆڵی دەكەن و هەوڵدەدەن لەناو مێگەلەكەی خۆیاندا دەقبگرێت، بەمەش كۆمەڵگە بە تواناو جەزرەبەییەكی زۆری بەسەر تاكەوە دەردەكەوێت بەوەی بریتییە رێكخراوێكی بەهاو پێوەری نەریتی باو كە دەتوانێت بە هەموو جۆرە پاساوێك رێگری لە یاخیبوون بكات و كاریگەری بەسەر دەركردنی بڕیارەكانەوە هەبێت. 
ئەم تابلۆیە خوێندنەوەیەكی بەپێزە لەسەر سەربەخۆیی خودی و گەڕان بەدوای پێگەی ئازادیداو هونەرەند بە مەبەستەوە رەگەزی كاراكتەرەكەی دیاری نەكردووەو تەنانەت شێوەیەكی نامۆی پێداوە بۆئەوەی هەموو مرۆڤەكان بگرێتەوە چ نێر بنیان مێ گەنج بنیان بەتەمەن و هتد.. لێرەدا مەبەستی ئەوەیە كە مرۆڤ دەبێت خۆی لە دەروێشی و مێگەلسەرایی و سیستمی توتالیتاری رزگار بكات و هەر لە روخسارو بزووتنەوەی كاراكتەرەكەیەوە پێمان دەڵێت بە سەرنجەوە بڕواننە كەسی داماڵراوی یاخی كە لێوانلێوە لە ئازارو ژان، هاوكات سیخناخە لە بەرگری و ورە، دەستەكانی لە ململانێدان و رۆحی تووڕەشی بەتاوگیرییەوە بەرگری دەكات بە تەنها بۆ ئەوەی ببێتە كەسێكی جیاوازو سەربەخۆو لەو مێگەلە دەقگرتووە پووچگەرایە دوور بكەوێتەوە.
* توماس ئیلین كۆبێرا ساڵی 1976 لە پۆڵەندا لەدایكبووەو دەرچووی پەیمانگەی ئەندازیاری فرۆتسۆفی تەكنەلۆژیە، ماوەیەك هەر لە هەمان پەیمانگەدا ماوەی دوو ساڵ وانەی وتۆتەوە، هەر لە سەرەتای كاری شێوەكارییەوە بە بۆیە دەستی پێكردووەو نەوت و پەڕۆی بەكارهێناوەو دواتر بە شێوەی پلازما لەسەر كۆمپیوتەر دەستی بەكارە هونەریەكانی كردووە، لە ساڵی 2005ـەوە لە ئیرلەندا دەژیت و وانە دەڵێتەوەو هاوبار ستۆدیۆیەكی تایبەتی بۆكاری شێوەكاری كردۆتەوە. توماس كۆبێرا لە كارەكانیدا دەچێتە قووڵایی گەردوون و پەیامەكانی لە ناخی مرۆڤ دەدات و بەوەش ئەفسانەی هونەری شێوەكاری دەخوڵقێنێت.

‌ 58 جار بینراوه‌
12/2/2017 9:41:46 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved