»  باران
تەكنەلۆژیا ئامرازێكی تری توندوتیژی دژی مێینەیە
لانە شكور


تەكنەلۆژیا لە كوردستاندا لە ساڵانی پێش راپەڕین بەشێوەیەكی بەرچاو نەبووە و زۆر كەم بووە یاخود دەتوانین بڵێین تەنها لە چەند جێگەو ماڵێكدا هەبوون، ئەو كات بوونی ئامێرێكی تەكنەلۆژی دەنگی دەدایەوە كاتێك ماڵێك تەلەفۆن یا تەلەفزیۆن یا هەر ئامێرێكی تەكنەلۆژیان بكڕیایە و بەكاریان بهێنایە، لەو سەردەمانەدا لە گەڕەكێك تەنها چەند ماڵێك ئامێرەكانیان هەبوو، زۆرجار دراوسێ لە رێگەی دراوسێوە ئامێرەكانی بەكاردەهێنا، وردتر دەكرێت بڵێین ئەو كات ژیان زۆر سانا و سادە بوو و دوور لە لێشاوی تەكنەلۆژیا تاكەكان لەدەوری یەكتر كۆدەبوونەوە.
لە دوای راپەڕین بەتایبەتی و بەگشتیش دوای پرۆسەی ئازادی عێراق تەكنەلۆژیا بە لێشاو هاتە نێو كۆمەڵگەو ماڵەكانی تەنی، هێرشی تەكنەلۆژیا زۆربەی هەرەزۆری تاكەكانی گرتەوە، كۆمەڵگە خۆرهەڵاتییەكان بەگشتی بەجۆرێك بەڕووی تەكنەلۆژیادا كرانەوە كە دەكرێ بڵێین تاك بە تاكی گرتەوە و ئەوەش شەپۆلێكی زۆر خێرا بوو بە كرانەوە بەڕویی جیهاندا و بێگومان ئەو شەپۆلەش لەگەڵا لایەنی باشیدا دەیان لایەنی خراپی هەبووە، ئەوەش لە خراپ دروستكردنی ئامێرەكاندا نەبووە، بەڵكو لە خراپ بەكارهێنانی تاكەكاندا بووەو تەكنەلۆژیا هەزاران گرفتی بەدوای خۆیدا هێناوە.
لە ئێستادا تەكنەلۆژیا بچوكراوەتەوە بۆ ئاسانترین بەكارهێنان بەجۆرێك كە زۆربەی ئامێرە پێویستەكان لە یەك ئامێردا كۆكراوەتەوە و لە گیرفانی هەموو تاكێك هەیە كە ئەویش مۆبایل فۆنە بە تایبەب مۆبایلە هۆشمەندەكان كە كۆمەڵێك خزمەتگوزاری بەرچاو لە خۆدەگرن و بە داخەوە بەربڵاویشیان كردوە و بەكارهێنانیان هیچ سانسۆرێكی ئەوتۆی لەسەر نییە، ئەمەش بووەتە هۆكارێك كە كاربكاتە سەر كۆمەڵگا بەگشتی و بێگومان قوربانی یەكەمیش رەگەزی مێینەیە، مێینەش زۆرجار خۆیان لە هەڵە بەكارهێنانی تەكنەلۆژیا بە دوور نەگرتووە و دەبنەوە قوربانی.
كچان و ژنانی كۆمەڵگەی ئێمە بە هۆی تەكنەلۆژیاوە رۆژانە توشی گرفت و كێشەی كۆمەڵایەتی دەبنەوە كە كۆتاییەكەی دەبنە قوربانیی جا تا دەگاتە مردنیان بەهەر هۆكارێك بێت، هەندێك جاریش خودی ژن بە هۆی تەكنەلۆژیاوە بێئاگا دەبن لە ماڵا و منداڵیان و پەیوەندییە خێزانییەكان ئاڵۆز دەكەن كە ئەمەش دووبارە دەیكاتەوە قوربانی و لەهەردوو حاڵەت مێینە روبەڕوی توندوتیژی دەكاتەوە، هەربۆیە دەكرێت بڵێین تەكنەلۆژیا ئامرازێكیتری توندوتیژی دژی مێینەیە.
تەكنەلۆژیا وای لە بەشێك لە ژنان كردووە كە ئەوەی لە نێو دراما و تۆڕەكۆمەڵایەتییكاندا دەیبینن بیكەنە داواكاری و لە پیاوانی داوابكەن نمونە وەك جلوبەرگ و كەلوپەلی رازاندنەوە و ... هتد ، لە لایەكی تریشەوە ژن هەیە منداڵەكانی لە گەڵا خۆیدا دادەنیشن و تەماشای هەمان دراما و شتی گەورەكانیان لەگەڵا دەكەن ئەمە بێئاگا لەوەی كاریگەری دەكەنە سەر بیری منداڵەكانی و رەنگە منداڵەكانی هەمان ئەو دیمەنانە دووبارە بكەنەوە و نمونەش ئەو روداوانەن كە بەردەوام لە تۆڕە كۆمەڵایەتییەكان دەبینرێن، كە ئەمەش دەبێتە هۆی دروستكردنی نەوەی نا هۆشیار لە ئایندەدا.
مێینە بەهۆی تەلەفۆن و نامەی ئەلیكترۆنی و تۆڕی كۆمەڵایەتی وەك فەیسبوك و ئەوانی تر كە هەن زۆر جار رەنگە پەیوەندیەك دروست بكەن كە خێزانیان رێی بەوە نادا بەهۆی بارە كۆمەڵایەتییەكەیانەوە، یان مێینە هەیە نێرینەیەك یان چەن نێرینەیەك لێی نابنەوە و رەنگە ئەو تەكنەلۆژیا بۆ كار و باری كەسیی خۆی بەكار بهێنێ، بەڵام دیسانەوە بەهۆی چەند هەلپەرستێكەوە زەفەری پێدەبرێت، یاخود كەسانێك هەن وێنەی مێینە و گرتەی ڤیدیۆیی كچان و ژنان بە مەبەستی دیاریكراو بڵاودەكەنەوە كە ئەمەش دووبارە و سێبارە مێینە دەكاتەوە قوربانی، یاخود لە كاتی خۆشەویستی چەندین نامەو وێنەو یادگاری دەكەوێتە لای كەسێكەوە بەهەر هۆیەك بێت لێك جیادەبنەوە و بەو بەڵگانە هەڕەشەی لێدەكرێت ئەمەش دیسانە توندوتیژییە و قوربانییەكەی مێینەیە و باجەكەی دەدات، گەر چاوێك بە ئاماری روداو و كێشە كۆمەڵایەتییەكاندا بخشێنینەوە دەبینین زۆربەیان بە هۆی تەكنەلۆژیاوە بوون بە تایبەت مۆبایل كە پیاوان كێشەیان بۆ مێینە دروستكردووە و زۆرجاریش ناهۆشیاری خودی مێینە هۆكار بووە بۆ توشبوونی كێشە و توندوتیژی بەدوایدا هاتوە، هەربۆیە ئاشكرایە مێینە ئامرازێكی تری توندوتیژی دژی تەكنەلۆژیایە و دەبێت ئەوان زۆر هۆشیارانە مامەڵە لەگەڵیدا بكەن و ئەگەر تاكەكانی كۆمەڵیش لە هەردوو رەگەز بەتایبەتیش نێر دوور نەكەونەوە لە خراپ بەكارهێنانی تەكنەلۆژیا ئەوا تەكنەلۆژیا لە وڵاتی ئێمە دەبێتە چەكی كۆمەڵكوژی خانمان.


‌ 125 جار بینراوه‌
12/2/2017 9:47:09 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved