»  شەکری تاڵ
 كورد لە چاوەڕوانی گۆدۆدا



دیارە گۆدۆ زۆربەمان دەزانین كێیەو چییە، بەڵام هەر بۆ زانیاری ئەوانەی كە نایزانن؛ كارەكتەرێكی خەیاڵیە لە شانۆگەری (لە چاوەروانی گۆدۆدا Waiting for Godot) لەنوسینی نوسەری ئێرلەندی سامۆئیل پیكیت و لەدوای ئەو شانۆگەرییەوە ئەم وتەیە (لەچاوەروانی گۆدۆدا) بۆتە وتەیەكی دیارو ناسراوو نمونە بۆ ئەوانەی كە دەسەڵاتیان بەسەر كارێكدا ناشكێت و لەچاوەروانی فریادرەسێكدان بێت  وكارەكەیان بۆئەنجام بدات، ئەم دەستەواژەیە بۆتە نیشانەی مرۆڤی تەمبەڵ و خەیاڵ پڵاو! چونكە گۆدۆ نایەت و تەنها خەیاڵەو ئەوانەی كە توانایان هەبێت كارێك بۆ خۆیان ئەنجام بدەن هەرگیز چاوەروانی گۆدۆ ناكەن.
لە دوای سیاسەتی هەڵەی سەركردایەتی سیاسی كوردو شكستی 16 ئۆكتۆبەرەوە كورد بە جۆرێك بێهیوا بووە كە هیچ ئومێدێكی بەم سەركردایەتییە نەماوە، بەتایبەتی لەخورماتوو كەركوك و داقوق و شەنگال چاوەروانی ئەوە لەم حیزبانە ناكەن كە رۆژێك لە پێناوی بەرژەوەندی كورددا یەكبگرن و بچنە بەغداو چارەسەری دۆخی ئەم ناوچانە بكەن، بۆیە تاكی كورد نائومێد بووە چاوەڕوانی ئەوەیە بە خەیاڵیش بێت فریادڕەسێك بۆ خۆی دروست بكات و ئەم گۆڕەپانە گەورەو فراوانەی تۆڕی كۆمەڵایەتی فەیسبووك بۆتە كێڵگەی بەپیتی خەیاڵ بۆ تاكی خۆش خەیاڵی تاكەكانی گەلی كوردو هەر رۆژەی خەیاڵ بەشتێكەوە دەكەن و چاوەروانن فریادڕەسێكیان بۆ دروست ببێت و لەم هەموو نەهامەتی نیگەرانییە رزگاریان بكات.
ئەوانەی لە شەستەكانەوە هەتا ئەمرۆ سوارچاكی بواری كوردایەتی و شۆڕش بوون چاكتر وایە دان بەشكستی خۆیاندا بنێن و گۆڕەپان بۆ كەسانی دیكەچۆڵ بكەن، باشتر وایە بۆ تاكی كورد خۆی ساز و ئامادە بكات و سەركردایەتیەكی نوێ و چوست و چالاك بۆ خۆی هەڵبژێرێت و چیتر چاوەروانی گۆدۆكانی كوردایەتی نەكات، چونكە ئەوان سەرقاڵی كۆمپانیان و شمشێریان فڕێداوەو لە جیاتی ئەسپ سواری كادیلاك و جاكوار ولاكسس بوونەو شوێنی یەك تاكە نەفەری خۆش خەیاڵیشیان نییە لە پشتی خۆیانەوە سەری بخەن و رزگاری بكەن!
لەم خۆش خەیاڵیەدا باسوخواسی دروست بوونی گروپێكی چەكدار لە دەوروبەری كفری و خورماتوو بڵاو بۆتەوە كە ئاڵایەكی سپییان هەیەو ئارمەكەیان سەری شێرێكەو پێدەچێت پاشماوەكانی قاعیدەو داعش بن و دەزگا سیخورییە جیهانیەكان لەو شوێنەدا مۆڵگەیەكیان بۆدروست كردبن و دەنگۆی ئەوەش هەیە كە لاوانی خوێن گەرمی كوردی گەرمیان پەیوەندییان بەو گروپەوە كردبێت و تاكی خۆش خەیاڵ و بێدەسەڵاتی كوردیش كە لە بێكەسی و بێسەركردایەتیدا چاوەروانی گۆدۆدایە ئومێد لەسەر ئەو گروپە كەڵەكە دەكات و كێڵگە بەپیتەكەی خەیاڵیش لەفەیسبووك گروپێكی كوردی خەیاڵی دروست كردووەبەناوی دەوڵەتی رزگاری كوردیا(DRK) بەڵام ئەمجارەیان سەری شێرەكە سورەو كۆمەڵێك خەیاڵی لەسەر هەڵچنراوە.!
كورد لە بێكەسیدا چاوەروانی گۆدۆدایە جا ئەو گۆدۆیە داعش و قاعیدە بێت یان بەرهەمی خەیاڵی خۆش خەیاڵەكانی فەیسبووك بێت.

 ئیمزا
موعتەسەم شوانی


‌ 112 جار بینراوه‌
12/2/2017 9:53:48 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved