»  پەڕەموچ
كاتژمێر
عەبدولڕەحیم سەرەڕۆ


دەمەوبەیانی پێشوەختە راچڵەكیم، كاتژمێری سەرمێزەكەم كە چەندینجار لەناكاو هەستاندوومی و بەبێزارییەكەوە دەستم بردووە تا زەنگەكەی رابگڕم، كەچی بەچاوی خەوەوە لەدەستم بەربۆتەوەو هەرجارەی پارچەیەكی لێ بۆتەوە، لەرووی ئەركەوە نەبێت ئیتر بە هیچ شێوەیەك بە كاتژمێر نەدەچوو، چونكە ماوەیەكی زۆر بوو پێكەوە لە یەك ژوور دەنووستین بە تەنها خۆم لە زمانی دەگەیشتم. 
وێرای نابووتی و كۆنی، ئەو كاتژمێرەم زۆر خۆشدەویست، چەندینجار بەنیازبووم كاتژمێرێكی تر بكڕم و لەشوێنی دایبنێم، بەڵام دواتر پەشیمان دەبوومەوە، بیرمە كە منداڵبووم ئەو كاتژمێرە هەر لە یەكەم رۆژی كڕینیەوە لەدەستم كەوت و باوكم پێی وتم :"بەقوربانی خۆت بێت"، هەستمكرد ئەو كاتژمێرە راستییەكی گەورەی بۆ دركاندووم كە نەمزانیوە، باوكم لەسەر ئەو هەڵەیە سزای نەدام و بۆم دەركەوت چەند خۆشی دەوێم، ئەوە بۆ باوكان هێندە بێ سنور منداڵەكانی خۆیان خۆشدەوێت؟!
ئەی بۆ لەوەتی هەین نە گۆرانییەك و نە شیعرێكمان نەبیست بە شان و باڵی باوكە ماندووەكاندا هەڵبڵێت، سەبارەت بە كاتژمێریش زیاتر گازندەو گلەییە لە زەمەن و مرۆڤ خۆی وەك بێ دەسەڵاتێك و غەدر لێكراوێك لەبەردەم گەردووندا دەبینێتەوە. 
بیرمە دوای هاوسەرگیری، خانمەكەم كاژمێرەكەی فرێدایە ناو تەنەكە خۆڵەوە، چووم هێنامەوەو داوام لێكرد پارێزگاری لێ بكات، من ئەو كاتژمێرەم زۆر خۆشدەوێت، چەندین ساڵە پارێزگاری لێ دەكەم و باوكم بەر لەوەی كۆچی دوایی بكات بۆمنی جێ هێشت بۆ ئەوەی یادی بكەمەوە. 
خانمەكەم بەقسەی كردم و ئەویش وەك من وێرای زۆری پلاری خزمان و چەندین كۆمێنتی بێ بەهاو پێكەنیناوی زۆر ئاگاداری ئەو كاتژمێرە دەبوو. 
دەفتەری تێبینیەكانم كردەوە رۆژێكی پڕ لەكارو سەرقاڵی، سەردانی نەخۆشێك، رادەستكردنی پارەی موەلیدە، كۆكردنەوەی كرێی دووكانەكان و گەیاندنی بە خاوەن باڵەخانەكە، بازاڕیكردن و سەردانی دایكم و دواتر كڕینی بۆیەی زەیتی بۆ كچەكەم بۆ ئەوەی پێشوەختە تابلۆیەك بۆ تاقیكردنەوەكان ئامادەبكات، دۆزینەوەی وەستایەك بۆ نۆژەنكردنەوەی بەشێك لەكۆگاكە، سەردانیكردنی كۆگاو بەسەركردنەوەی كارمەندان و حەماڵەكان و پاسەوانەكان. ئەم هەمووە بە هەزار فرتوفێل لەسەر كاغەزێك جێی بۆتەوە ئەی لە رۆژێكدا بە كامیان بگەم و رایپەڕێنم؟!
زۆر سەیرە كاری جدی كە دەتەوێت ئەنجامی بدەیت بۆ تاكە رۆژێك پێویستیت بە چەند لاپەڕە لە تێبینی و نووسین دەبێت، بەڵام مێژوو نووسێك كە بیەوێت هەموو دونیا بە درۆ فریوبدات چەند بە ئاسانی ژیانی قارەمانێكی لووت شكاو لە لاپەڕەیەكدا جێی بۆ دەكاتەوە. ئێوارە كە هاتمەوە كاتژمێرە توحفەكەم تەواوی پەكی كەوتبوو!! پێچامەوەو لەناو سنووقی عەنتیكەكانم شاردمەوە. 
***************** 
ئێستا تەمەنم (79) ساڵە، خانمەكەم قەدەرێكە بۆ سەردانی خزمانی چۆتە قەبرستانەكەی ئەودیوی شارو نەگەڕاوەتەوە، كوڕەكەم منداڵە بچوكەكەی لەلا جێهێشتم، بۆ ئەوەی هەندێك كاری تایبەت بە خۆی راپەڕێنێت و دواتر بێت و بیباتەوە، ئەویش وەك ماڵ دزراوێك هەموو ژوورەكانی دەپشكنی، دواجار هات و بەدەستە ناسكە بچوكەكەی كاتژمێرە رۆح لەبەرنەماوەكەی بۆ هێنام و وتی باپیرە ئەمە هینی كێیە؟! 
كاتژمێرەكەم گرتە دەست و تێر گریام.. كە منداڵەكە منی بینی دەگریم لەبێ متمانەییدا ئەویش دەستی كردە گریان، ئەو بۆ من و من بۆ كاتژمێرەكە دەگریاین.. كە هیچ مننەتی نە بە فرمێسكەكانی من و نە بە نووزەی كوڕەزاكەم نەبوو!!

‌ 561 جار بینراوه‌
12/9/2017 9:30:38 AM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved