»  شۆک
لەپێناو مانەوەو برەودان بەتواناكانیان گەنجان كاری سەربەخۆ دەكەن
ئا/ هاوار ستار




بەشێك لە گەنجانی كەركوك دەست دەدەنە كاری سەربەخۆ و چاوەڕێی حكومەت و حزب ناكەن، ئەمەش لە كاتێكدایە زۆرێك لەو گەنجانە خوێندنیان تەواو كردووە و یان بەردەوامن یاخود هەر بە یەكجاری لە خوێندن دابڕاون، وەك ئاشكرایە دەرچوانی كۆلێژ و زانكۆكان دوای تەواوكردنی خوێندن لە نائومێدیدا دەمێننەوە بەوەی بێكار دەبن و لە دامەزراندنیاندا چارەنوسیان نادیار دەبێت، بەڵام وەك بەشێكیان ئاماژەی بۆ دەكەن دەستەوەستانیش نابن و هەریەك بەجۆرێك هەوڵی كاری خۆیان دەدەن

محەمەد حەسیب یەكێكە لە دەرچوانی كۆلێژو ئێستا كاری سەربەخۆ دەكات بۆ هەواڵ وتی: “قۆناغی دوای دەرچوون ئەو قوناغە شومەیە كە نە من و نە هیچ فێرخوازێكیتر ئاواتی بۆ ناخوازین”..
هەروەها وتی: “ئێمەی فێرخواز لەوە دڵنیاین لە دوای قۆناغی زانكۆوەتا چەند ساڵێك بەبێ كار دەمێنینەوە”.
وتیشی: “ئەمە لە كاتێكدایە گەنجی ئێستا بە رێژەیەكی زۆر چاویان لە بڕوانامە نیە لەبەرئەوەی حكومەت هیشتا بە ئەركی باوكایەتی هەڵنەستاوە كە ئەركی سەرشانیەتی”
محەمەد دەشڵێت: “شیاوی باسكردنە گەنج ئارەزو مەند نیە كۆچ بكات گەر حكومەت باوكێكی باش بێت بۆی”.
 محەمەد حەسیب باس لەوەشدەكات “لە هەمو ولاتانی جیهان وا باوە كاتێك گەنجێك زانكۆ تەواو دەكات راستەخۆ لە لایەن حكومەتەوە كاری بۆ دیاری دەكرێت، لەو ولاتانەدا هیچ گەنجیك زیادە نیە، بەڵام لە ولاتێكی وەك عێراق و هەرێمێكی وەك كوردستان بە بێ گومان كەموكوڕی زۆر دروست دەبیت”.
 هەروەها وتیشی “حكومەت فاكتەری سەرەكیە بۆ لە ناو بردنی گەنج و سوتاندنی ئەو پارچە كاغەزەی كە خۆی پێی دەڵێت بڕوانامە”.
توانا حەمەعەلی گەنجێكی ترە كە كاری خۆی هەیە و بۆ (هەواڵ) وتی: “ئەگەر كاری سەربەخۆ نەبێت ئەوا پارە پەیداكردن بوونی نییە”.
ئەو گەنجە دەڵێت: “پێم سەیرە لەم وڵاتە لەهەر بوارێكدا بڕوانامە بێنیت هەر وەك یەكە و جەبێت بۆ دامەزراندن راكە راك بكەیت”.
هەروەها وتی: “من بەش بە حاڵی خۆم حەزم بە دامەزراندن و راكە راك نییە، چونكە واپێویست دەكا شوێنێكی گونجاو كارێكی باش هەڵبژێرم و هەڵیشم بژاردووە”.
توانا باسی لەوەشكرد: “پێشتر كۆمپانیاكان هەلی كاری باشیان هەبوو، بەڵام ئێستا ئەوەش نەماو ئێمەش دەبێت چاوەڕٍێی چاكبونەوەی ئەم دۆخە بكەین”.
وتیشی: “هەمیشە كاری تاكەكەسی باشترە و من پشتم بە خۆم بەستووە”.
وەزارەتی رۆشنبیری حكومەتی هەرێم گرنگی نەدان بە گەنج بۆ ئەم دۆخەی ئێستا دەگەڕێنێتەوە.
لای خۆیەوە فەرهەنگ گۆمەشینی وتەبێژی وەزارەتی رۆشنبیری و لاوانی حكومەتی هەرێمی كوردستان بۆ (هەواڵ) وتی: “پێش شەڕی داعش و قەیرانی ئابوری ئێمە كۆمەڵێك كار و پرۆژەمان هەبووە و چەندین ناوەندی رۆشنبیری و هونەری و وەرزشیمان بۆ گەنجان كردووەتەوە و سەرپەرشتیمان كردووە”.
ئاماژەی بۆ ئەوەشكرد: “هەمو ئەوانەی كراون لە خزمەتی شار و شارۆچكەكانی هەرێم و ناوچە كوردستانیەكانی دەرەوەی هەرێمیش بوون”.
وتیشی: “بەڵام بەهۆی زیادكردنی داهات و كەمكردنی خەرجییەوە هەرچی داهاتی كۆمەڵە و سەنتەرەكان بوو ناچار بووین هەڵی بوەشێنینەوە”.
هەروەها وتیشی: “حكومەت دوای ئەم دۆخە لە گەنج دابڕا و گەنجان دوركەوتنەوە لە ناوەند و كۆمەڵەكان و ئەوەی مایەوە مەلەوانگە و یاریگاكانە ئەویش لە لایەن دوو حیزبی باڵادەستەوە درابوونە كۆمەڵەكانی خۆیان”.
باسی لەوەشكرد: “ئێمە لەرووی ئیدارییەوە كار بۆ گەنجان دەكەین تا هیچ نەبێ خزمەتێكی كەمی گەنجان بكەین”.
رونیشیكردەوە “پێشتر كاری زۆر باش هەبوون پارەی بەهرە و داهێنان تەرخان دەكرا بۆ ئەو كەسانەی پرۆژەیان پێشكەش دەكرد، بەڵام بە داخەوە هەمو ئەوانە هەڵوەشێنرانەوە و ئێستا پارە نییە تا بە گەنجێك بدرێت پەرە بە خەون و بەهرە و تواناكەی بدات”.



‌ 879 جار بینراوه‌
12/9/2017 9:41:21 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved