»  پەڕەموچ
هەڵاتنی (لی) شێوەكار


ئەمە چیرۆكێكی مێژوویی زۆر بە چێژە، باسی بەسەرهاتی (لی) شێوەكاری چینی دێرین دەكات كە دەگەڕێتەوە بۆ زەمەنێكی زۆر دووری مێژوویی، كە لە كۆشكی ئیمراتۆری گەورە هەڵدێت و ئیتر هیچ شتێكی لە بارەوە نازانرێت. 
“لی” لە ناوچەیەكی شێداری سەوزەڵان لەدایكبووە، بە منداڵی لە نێوان دارستانەكان و چیمەن و گوڵالەكانی نزیك گوندە دڵگیرەكەیان رۆژگاری بە بەختەوەری بەسەربرووە. دایك و باوكی دوو جوتیاری بەساڵاچوو بوون و لە نێوان زورگ و شیوەكاندا دارو دەوەنیان كۆكردۆتەوەو بوونەتە مایەی خۆشبەختی ئەم منداڵەو تەنانەت لە كاتی خەوتنیشدا دەمی بە زەردەخەنەوە بووەو خەونی بە خۆری پرشنگدارەوە دەبینی كە رووناكی بەسەر كێڵگەكاندا پەخش دەكرد. 
هەر لە منداڵییەوە وێنەی ماسی و فڕندەو شوانكارەو مێگەل و ئەسپەكانی لەسەر ئەو بەردانە دەكێشا كە رووبارەكە قاوغێكی لەسەریان بەجێ دەهێشت. 
گەج و خەڵووز دوو قەڵەمی خەیاڵئامێزی منداڵی ئەو شێوەكارەبوون، “لی” لەناو دێیەكەدا گەورەدەبوو، لە هەموو گوندەكانەوە خەڵكی دەهاتن و بە سەرسوڕمانەوە تەماشای دەستی ئەو منداڵە بەهرەمەندەیان دەكرد تا كار گەیشتە ئەوەی لە كۆشكی ئیمراتۆردا بووە جێی باسو خواسی هەموان. 
ئیمپراتۆر ناردی بە شوێنی و پێی وت: دەبێت لەو كۆشكەدا بمێنێتەوە هەموو دیوارەكان بە وێنەی جوان و رەنگاو رەنگ برازێنێتەوەو رێرەوەكان پڕبكات لە تابلۆی داری رازاوە، شوێنێكی تایبەتی بۆ كردەوە بۆ ئەوەی كاربكات و ئیتر ئەو شوێنەی بۆخۆی كرد بە جوانترین مۆزەخانەو هەموو ژیانی گۆڕانكای بەسەردا هات، بەو مەرجەی جارێكی تر نەگەڕێتەوە سەر زێدی باوپاپیری و گوندەكەو دایك و باوكی بیربكاتەوە. 
“لی” بەو بڕیارە زۆر پەرێشان و دڵتەنگ بوو چونكە نەیدەتوانی جارێكی تر بگەڕێتەوە بۆ كەشوهەوای گوندەكەیان و ئیتر مەگەر خەون بەو گوندەوە ببینێت، ئیتر دەستبەسەرەو لە ناو كۆشكی گەورەی پاشا كە لە چواردەورەوە بە بەردی گەورەو دیواری بەرز هەڵچنراوە!! بێوچان دەستی كردە كاركردن بۆ ئەوەی پاشا لێی رازیبێت و هەموو دیوارەكانی پڕكرد لەنەخش و نیگارو دەرگای جوانی دروستكردو چەندین جۆر تابلۆو پەیكەری داهێنا.
رۆژێكیان تابلۆیەكی گەورە دەكێشێت كە هاوشێوەی وێنەی ئاسمانێكی زۆر روونەو گوزارشت لە منداڵی دەكات، باخچەو پردێكی بچوك و چیمەنەكان و پۆلە مراوی كێوی لەكاتی كۆچكردن بە ئاسمانەوەو خۆرێكی رۆشن و پێدەشتێكی سەوزی پڕ لەنسێ. ئەم تابلۆیە وەك پەنجەریەك بەرەورووناكی دەكشا چۆن بڵێی گوندەكە هەموو لە دیوەكەی تری دیوارەكەوە بێت. بەلام بینینی ئەو تابلۆ جوانە لە خودی لی قەدەغەكرا. 
“لی” چەندین تابلۆی جوانی داهێنابوو، بەڵام هیچیان وەك ئەو تابلۆیە نەبوون كە گوزارشت لە گوندە جوانەكەی دەكات، هەر بۆیە ماوەیەكی زۆر لەبەردەم تابلۆكە دەوستاو لێی رادەماو هەستی بە سۆزی بۆ زێدەكەی دەكرد. بەڵام بۆی نەبوو بچێتە ناو هۆڵە گەورەكان كە تایبەت بوون بە بۆنەو ئاهەنگەكان، بەڵكو دەبوو بە تەنها كار بكات و هەموو خەڵكی بیربچێتەوە. 
لی هەمیشە ئاواتەخوازبوو ئەو تابلۆیە ببینێت ئەگەر لە رێگەی دەرگایەكی نیوەكراوەوەش بێت، رۆژێكیان پاسەوانەكان و خزمەتكارەكان لە هۆڵەكە نابن و ئەویش بە خشكەیی دەچێتە هۆڵەكەو تابلۆكە دادەگرێت و دەیبات بۆ ئەوەی بە تاسەبارییەوە ماوەیەك بۆی بڕوانێت. زەنگی مەترسی لێدراو دەنگ لە هەموو شارەكەدا بڵاوبووە بەوەی تابلۆی گەورەی لی دزراوە. 
پاشا لە تووڕەییدا گڕی گرتبوو، هەڕەشەو گوڕەشەی دەكرد، هەزار سەربازی بەناوهەموو شارەكەدا بلاوبوونەوەو دەگەڕان و پشكنینیان دەكرد بەمەبەستی دۆزینەوەی تابلۆ دزراوەكە دواجار دۆزییانەوەو پاشا فەرمانی دا لی زیندانی بكرێت و بەردەوام بێت لە كارەكانی لەناو كۆشك.
لی توانای نیگاركێشانی نەما چونكە چاوەكانی لە رۆشنایی و دڵی لەبەختەوەری دابڕابوو،ئینجا ئیمپراتۆر بانگی كردو پێی وت: لێ دەگەڕێم لەناو كۆشكەكم ئازادانە بژیت و كارەكانت تەواو بكەیتو بۆت هەیە رۆژانە بۆ ماوەیەك تەماشای تابلۆ نایابەكەت بكەیت، بەڵام هەر لادانێك دەبێتە هۆی سزایەكی زۆر نالەبار.
“لی” دەستی كردەوە بە كاركردن ئیتر رۆژانە لەبەردەم تابلۆكەدا برینەكانی گەورەتر دەبوونو سۆزی بۆزێدەكەی زیاتری دەكرد، ئیتر لەناو كۆشكی پاشادا تەواو بێزاری دایگرت و تواناكانی بەرگری كەمتر بوونەوە. 
رۆژێكیان لی بەتەنیا دەبێت و لە هۆڵە گەورەكە لەبەردەم تابلۆكە دەوەستێت و بۆی دەڕوانێت، دووركەوتنەوە لە زێدەكەی خۆی كە لەتابلۆكەدا هەیە رۆحی دەگوشێت كە گوندەكەی خۆیەتی و لەناو دارستانەكانی ساری دەكرد و دەسووڕایەوەو باوەشی بە دارەكاندا دەكردو گۆرانی بەدەم شنەی باوە دەچڕی. 
لی بازیدایە ناو تابلۆكەو خۆی لەناو درەكانیدا ونكرد و ئینجا تا توانی هەڵدەهات و دوور دەكەوتەوە تا لە ئاسۆیەكی دووردا بوو بە خاڵێك و دواجار ونبوو. 
كە پاسەونەكان چوونە ناو هۆڵەكە تا لی بگەڕێننەوە شوێنی كاركردنەكەی. لە هۆڵەكە نەمابوون پاشا بەمە شێت و هاربوو، چۆن و بەچی دیسانەوە هەڵات؟! یەكێك لە داناكانی كۆشك روانیە ناو تابلۆكەو پرسیارێكی كرد و وتی: پێشتر ئەو شوێنهەنگاوانە لەناو سەوزایی تابلۆكەدا هەبوون، پاشا وتی نەخێر.. وتی بۆی مەگەڕێن ئەو ئالوودەی تابلۆكەی بووەو چۆتە ناو ئەو جیهانەو ئیتر لەحیكمەتی ئێمەدا نییە توانای ئەو هونەرمەندە ببەزێنین و بیگێڕینەوە كۆشك.. ئەو ئێستا ئازادە.

‌ 796 جار بینراوه‌
1/6/2018 10:17:34 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved