»  شۆک
 126 فڕۆكە دروستدەكات و پرۆژەی بۆ پێشمەرگە هەیە
ئا / هاوار ستار


ئاری كامیل: هەر كات حكومەتە خنكاوەكە لاشەكەی هاتە سەر ئاو لە رۆژی جەنازەكەیدا گوڵێك و گلەییەك دادەنێم


زۆرن ئەو گەنجانەی بەهرە و توانای ناوازەیان هەیە و دەرنەكەوتون یاخود تەنها باسكراون و دواتر وەلا نراون، ئاری كامیل یەكێكە لەو هەزاران گەنجەی كورد كە بەهرەدارن، بەهرەكەی ئاری لە دروستكردنی فرۆكەدا خۆی دەبینێتەوەو هەروەها پەرەشوتەوانیشە، لەم دیمانەیەی (هەواڵ)دا زیاتر ئەو گەنجە گەرمیانیەتان پێ دەناسێنین.

* ئاری كێیەو لە كەیەوە دەستی بە فرۆكە دروستكردن كردوە؟
- ئاری كامیل 21ی ئازاری ساڵی 1989 كاتژمێر 8:30ی بەیانی لە شارۆچكەی خورماتو هاتومەتە سەر ئەم هەسارە سەوزە جوانە، ماوەی چوار ساڵە سەرقاڵی دیزاین و دروستكردنی فڕۆكەم، هیچ بڕوانامەیەكم نییە، كاتێك دەرچوم بۆ پۆلی 3ی ناوەندی وازم لە خوێندن هێنا، لەگەڵ ئەوەی كە هەمو ساڵێ دەردەچوم لە تاقیكردنەوەكان، بەڵام هەستم دەكرد كۆپی دەكرێم و فێرناكرێم و پێم وابو كات دەكوژم و هیچیتر، لە بواری فڕۆكەش هیچ خولێكم نەبینیوە و بڕوانامەم تێدا بەدەست نەهێناوە و خۆم بەدوای كارەكەدا چووم و ئەندامی هیچ گروپێكیش نیم.
*تا ئێستا چەند فڕۆكەت دروست كردوە؟
- 126 فڕۆكەی بێفڕۆكەوانم دروست كردووە، هەروەها فرۆكەیەكی چوار نەفەریشم تەواو كردوە، سەرجەم كارەكانم ئامادەن بچنە ژێر هەموو جۆرە تاقیكردنەوەیەكی ئەندازیاری و میكانیكی.

*پرۆژەیەكت هەیە بۆ پێشمەرگە ئەو پرۆژەیە چییە؟
- پڕۆژەیەكی داهاتووە بە ناوی (ئاسمانی پێشمەرگەی نیشتیمانی) كە دەبێتە یەكێك لە گەورەترین پرۆژەكانی زانستی لە كوردستان و هەروەها برا پێشمەرگەكان لێی سودمەند دەبن.

*حكومەتی هەرێم چۆن لە كارەكەتی روانیوە و تا ئێستا چیان بۆ كردوی؟
- راشكاوانە دەڵێم هەر كات حكومەتە خنكاوەكە لاشەكەی هاتە سەر ئاو لە رۆژی جەنازەكەیدا گوڵێك و گلەییەك دادەنێم، چونكە وڵاتانی دی لە دایكم جوانتر لە كارەكانم دەڕوانن بەڵام روانینی حكومەتی خۆمانیش بۆ هەمو دایكانێك رونە.

*لە كاتی هەڵدانی فڕۆكە یان پەرەشوتەوانی چ بەسەرهاتێكت هەیە؟
- رۆژیكیان بە مەبەستی تاقیكردنەوەی زانستی رۆشتمە چۆڵەوانیەك بۆ فڕاندنی فڕۆكە و لە پڕدا هێزی سەربازیم لێ پەیدا بوو و داوای مۆڵەتیان لێم كرد، منیش ئەو كاتە زۆرم داوای مۆلەت دەكرد و نەیان ئەدامێ، ئیتر لە بێ مۆڵەتی قسەی قورسم پێ كرا و شەق لە فڕۆكەكەم درا. 
لەپەڕەشوتەوانیش یەكەم جارم بوو لە گردی گۆیژەوە بەو بەرزیە بفڕم، نزیكەی 600 مەتر لەئاستی زەویەوە بەرز بووم و سەرقاڵی لایڤكردن و گرتنی وێنە بووم بە موبایلەكەم بیرمچوو كە دەفڕم و دڵم زۆرخۆش بوو، ئیتر كە بیرم كەوتەوە سەیرێكی خوارەوە بكەم، ئەژنۆم شكا لە ترسا لە خۆمم پرسی (من چیدەكەم لێرە) ئیتر زیڕەم كردبوو هەتا دابەزیم، بەڵام دواتر لەگەڵ كاتدا وردە وردە ترسم لە ئاسمان شكا و بووین بە دوو هاوڕێی نزیك.

*دەڵێن دەتەوێ وڵات بە جێ بهێڵیت و بڕۆیت، ئەمە بۆ؟
- ئێرە لە هیچ رویەكەوە جێگای كاری منی تێدا نابێتەوە، من فڕۆكەم هەڵوەشاندووە لەبەر نەبوونی شوێن، ولاتێك جێگەی فڕۆكەیەكی بچوكی منی تێدا نەبێتەوە و جێگەی نوسینێكی روتی منی تێدا نەبێت، جێگای سندانەیەك و شانە و ئاوێنەی خۆشەویستەكەمی تێدا نەبێت، با هەر منیشی تێدا نەبێ، چونكە لە فەیسبووكی تایبەتی خۆشم نوسیومە لەسەر ئەركی دایكم و برا پێشمەرگەكەم و پارەی كرێكاری خۆم بەردەوامم زۆر جار بۆلای فڕۆكەیەكم دەچم پارەی تەكسیم پێ نییە، لەوسەری دونیاوە ئەمریكا دەستخۆشی لێ كردوم و دەڵێ فیزات بۆ دەنێرم وەرە وەك دیزاینەرێ كارمان بۆ بكە، بەڵام لێرە چوار ساڵە داوای مۆڵەت لەم حكومەتە دەكەم كەس وەڵامم ناداتەوە و تەنانەت دەستخۆشیشیان لێ نەكردوم، كە دڵنیا بووم لە بێ حكومەتی و بێ كەسیم چیتر گلەییان لێ ناكەم و بەجێی دێڵم و لە زوترین كاتدا كۆمپانیای فڕۆكە دا دەمەزرێنم لە دەرەوە.

*ئامۆژگاریت چییە بۆ گەنجانی تری بەهرەدار؟
- دەڵێم ئاگات لەوانە بێت كە خەون ئەكوژن، تەنانەت ئەگەر كەسوكارەكەت بن یان نزیكترین هاورێت یان حكومەت، بە تەنها كار بكە، چاوەڕێی كاتی گونجاو مەكە كاتی گونجاو وەهمە، گەورەترین وێنەكێش سەرمایەكەی دەفتەر و قەڵەمێك بووە، گەورەترین كۆمپانیا سەرمایەكەی كۆمپیوتەرێك بووە، تۆش بە تەنها كار بكە بۆ ئەوەی سات و كات و بەرنامەی خۆت بزانی و چاوەڕێی كەس مەكە.


‌ 239 جار بینراوه‌
1/6/2018 10:29:09 AM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved