نوێترین
لیژنه‌ هاوبه‌شه‌كانى سلێمانی هه‌شت كافتریا و خواردن و خواردنه‌وه‌ دادخەن   |    ئه‌ندامه‌ بندیواره‌كانی ئه‌نجومه‌نی پارێزگای كه‌ركوك ته‌واوی موچه‌و ئیمتیازاته‌كانیان وه‌رده‌گرن   |    به‌شی وێژه‌یی له‌ ئاماده‌ییه‌كانی كه‌ركوك له‌ مه‌ترسیدایه‌   |    هه‌ر به‌ڕێوه‌به‌رێك خانه‌نشین بكرێت پۆسته‌كه‌ی له‌ده‌ست كورد ده‌رده‌چێت   |    به‌رپرسێكی یه‌كێتی : ئاساییكردنه‌وه‌ی دۆخی كه‌ركوك ته‌نها له‌سه‌ر كات ماوه‌   |    پرسی سكاڵا له‌سه‌ر پۆستی قایمقامی داقوق بۆ مانگێك دواده‌خرێت   |    هه‌فته‌ هه‌واڵـی كه‌ركوك   |    له‌م هه‌فته‌یه‌دا بڕیار له‌سه‌ر موچه‌ دزراوه‌كانی مامۆستایانی خورماتوو ده‌درێت   |    دۆزینه‌وه‌ی زیاتر له‌ 200 گۆڕی به‌ كۆمه‌ڵی سه‌رده‌می داعش له‌ عێراق   |    له‌ماوه‌ی شه‌ش مانگدا عه‌بدولمه‌هدی چوار هه‌زار پۆستی به‌وه‌كاله‌ت یه‌كلایده‌كاته‌وه‌   |   
كوردی  |   عربي
»  پەڕەموچ
شــوێــن تــــــاوان
سەلمان شێخ بزێنی




چیرۆك

لەودەمەوەی لەداوێنی چیاكەوە سەنگەرمان لەدوژمن گرتبوو، منو (شێرۆ) لەكێلا یەكودو بوین، بەتێپەڕینی رۆژەكان، واچووبوینە دڵی یەكەوە، وەكو دوو شەڕڤان و دوو برا هەمیشە پێكەوە بووین. 
لەناو یەكینەكانی بەرگریكارانا ئەو بووە فەرماندەم و لەكوێ بوایە لەكن خۆیا دەیبردم، شتی ناودڵی خۆی بۆباسدەكردم.
لەوەتەی ئەو دەنگۆیەی ژنەفتبو، كە پیرو كەنەفتەكان، گەیشتونەتەوە كەمپەكان، شێرۆ جێی بەخۆنەدەگرت، هێندەی پرسیاری لەبارەی گرتیانەوە دەكرد، منی ماندوو دەكردو خۆم لێی دەبوارد.
ساڵێك زیاترە شێرۆ، لەسەرچیاكەوە لە شارۆچكەكەی دەروانێت، هێندە بەحەسرەتەوە لەكوێرەوەری خەڵك و كاولكاری شارەكەی روانیبوو، سكی پڕببوو لەژان و چاوەكانی لەكزیدابون، بۆ دوور بڕی نەدەكرد. ئەو رۆژە كەڵكی لەو دوربینە وەرگرت كە لە خاڵی چاودێریەكەدا هەبوو. 
لەسبەینێ زویەوە، لەنێو سەنگەرەكەیەوە لەزێدی خۆی دەیڕوانی، شاروێران و ژیان تیانەماو، بۆنی خوێن و بارووتی تیادەهات. دەیبینی.. ستونەكانی كارەبا لاربوونەتەوە، تەلەكان پچڕاون، گڵۆپەكان خامۆش، باڵندەكان لە تەمتومانی زولم وزۆرا تارومارببون. باخچەكان بوونەتە وشكەڵان، دیوارەكان بەلاداهاتون، بەشیك لەمیچی خانوەكان هەرەسیان هێناوە، باڵەخانەو بەرێوەبەرایەتییەكان بەفیشەك و خومپارە دابێژراون، سەربانەكان كراونەتە سەنگەرو قولەی چاودێری.(شێرۆ) فرمیسك بەربینای دەگرت، نەیدەتوانی دەروحەوشەی ماڵی (گوڵخان) بەرجەستەبكات، لە كەلكەلەی سۆراخی گوڵخانا سەری سوڕیدەخوارد، بەرەبەرە گیانی دادەهێزرا، دڵەخورپەی پێدەكەوت، خەریكبوو تروسكایی هیواو ئومێدی خامۆشدەبێت و ناخی دەكاتە تاریكستان. لچولێوی بەڵخی گرتبوو، گەرووی تاڵببوو، هەستیدەكرد هێندە بێهیزبوە لەوانەیە بەرگەنەگرێت و داخێكی تر بەدڵی دایكێوە بدات! دوای ئەوەی كوڕە گەورەو بوك و منداڵەكانیان بەرچنگی دوژمن كەوتن.... ئەمیشی بچێتەسەر.
لەكاتی هاتنەخوارەوەیا چاوی چووەسەر ئەو پیاوانەی لە سەروی دۆڵەكە خەریكن گۆڕێك لێدەدەن. رووی لە من كردو وتی:"پیروكەنەفتەكان بەرگەی قاتوقڕی و بای ساردو گەرم ناگرن، منداڵانش لەبەدخۆراكیدا دەمرن، ئەوەتا گۆڕستانێك لەسەروی دۆڵەكە چێبووە."
شێرۆ فەرمانی بە دوو شەڕڤان كرد بچنە هاوكاری ناشتنی تەرمەكە، منی بانگ كردو تفەنگ و فیشەكدانەكەی پێدانام و بەگەر خۆیدام، چووینە لای فەرماندە (عیسا)، سڵاومان لێكرد، سڵاوی داینەوەو داوایكرد دانیشین، شێرۆ هەربە پێوە وەستاو گوتی:"بۆ كارێك هاتوم." فەرماندە بێ ئەوەی بپرسێت، نەخشەیەكی نیشانمانداو وتی:" لەكاتی ئۆپراسیۆنەكەدا یەكە سەربازیەكەی ئێوە رۆڵی دەبێت لە شپرزەكردنی دوژمنا ." شێرۆ رەنگێكی هێناو بردو وتی:"هاتوم مۆڵەت بخوازم، دەچمە كەمپ و پورە (نەخشین) دەبینم." بێ ئەوەی هۆكاری چوونەكەی بپرسێت، فەرماندە بڕە پارەیەكی بۆڕاگرت و وتی:"ئاگاداری خۆتانبن و زوو بگەڕێنەوە!." 
لای بەیانی گەیشتینە كەمپەكە، خۆرو بان گەرم ببوو، چاومان بەگوزەرانی ئەوخەڵكە دەكەوت دڵمان دەگوشرا، بەنێو خێوەتەكانا خێرا هەنگاومان دەنا، سەرمان نەویدەكردو خۆمان لەخزم و خوێش دەبوارد، دۆزەی خێوەتی ژمارە 118 ماندەكرد، لەبەر خێوەتی ژمارە 118 راوەستاین، ژنێك هاتەدەرەوە، فۆتەكەی رێكخست و دەستی راكێشا تا بچینە ژوورەوە. ناو خێوەتەكە بۆنی كەڕوی لێدەهات، رایەخێكی پەڕپوت، پیرە ژنێك دانیشتبوو، سێ‌ منداڵ خوارو ژوور بەدەورێوە بون. شێرۆ سڵاوی لێكردو بە پورە نەخشین ناوی هێنا. پورە نەخشین ئاهێكی هەڵكێشاو دو دڵۆپ روندك زایە چاوەكانی و بەروخسارە چرچ و لۆچەكانیدا هاتنەخوارەوە، چاوەڕێی پرسیاری نەكرد، رووی لە شێرۆ كردو گوتی:" قوربانتبم.. ئەوە قەدەری هەندێك لە مرۆڤەكانە! ئێمە چاوەڕوانی پیكابەكەی فەرعۆی برازام بوین، كاروانی دووەم بمانگەیەنێتە سەرچیا، ، ئەو كچۆڵەیەش لەبەر من مایەوە. لە ناكاو بەسەرمانا وەربون، دنیا لەبەرچاوما تاریك داهات، نەمزانی رۆژە یان شەو، لەگەڵ (گوڵخان)ـا بەلای یەكەوە بووین و دەستەكانی ویم لە كۆشەخۆمنابوون، بە زۆری راپێچیان كردین و لە حەسارێكیان كۆكردینەوە نەمدەزانی كوێیە. خەڵكانێكی زۆر گیرابوون، ئێمەش لەناواندا بووین، هەرجارەی لایەكی پەلامار دەدران و بڕدەكران و جودا دەكرانەوە. قیژەو گریانی ژن و زاروكان بەرگوێمان دەكەوتن، منیش زیاتر گوڵخانم بەخۆمەوە دەنوساندو نزامدەكرد. چەتەكان وەكی گورگ پەلاماری لای ئێمەشیانداو گوڵخانیان لێساندم. چم لەدەستنەهات، زۆر لەبەریان پاڕامەوەو نزامكرد، بەسەر پاوو پلی پیسیانا كەوتم، نوشتامەوەو چنگم لەخۆڵ و خاشاكداو بەسەر خۆماكرد. گوێیان پێنەدام، هون بێویژدان و نە مرۆڤبون. لەتاریكیدا دەستم گێڕا، چەند هورتكەبەرد هاتنەدەستمەوەو بۆسەرو چاویانم هەڵدان، ئاگر لەچاویان بروسكەیدا. كورتەباڵایەكی ڕیشن، قژی هاتبوە ناو چاوی، قۆنداخە تفەنگێكی سرەواندمێ لەگازەرای پشتم كەوت و لەجێ بورامەوە. سبیانێ لەژورێكا بەئاگاهاتمەوە پێڵوەكانم بەخورتی هەڵبڕین، خورپەیەكی توند دڵیگوشیم، هەناسەم توندبوو، ، كەزانیم گوڵخانم لەدەستچووە، هێندەی نەمابوو بخنكێم.
چاوم بەژورەكەدا گێڕا، هەر ئەو چوار كچە مناڵكارەیە بوون، كزۆڵە هەرتروشكابوون، بەلێوەلەرزە لێم پرسین: ئێوە كێنە؟ یەكیان لێم نزیك بۆوە، زاری هاوردە لای گوێمەوەو گوتی: دەنگمان دەبیستن، ناوێرین بئاخڤین. 
بەدەنگی كڵۆمی دەرگاكە هەموان لە سوچێكی ژورەكە گرمۆڵەبوون، ترس لەكردنەوەی دەرگاكە لەرزی لەبەرخستبون. دەرگاكە كرایەوە دوان بەژوركەوتن، ماوەیەك لە كچەكانیان روانی، وەرسوڕانە من و لێیان خوڕیم، لەجێی خۆم نەجوڵام، هاتن یەكەی پیلێكیان گرتم و لەدەرەوە لە بۆدیان سواركردم."
پورە نەخشین هێشتا لە قساندابوو، شێرۆ پێی گوتم: هەڵدەستین. بێ باس و خواس هەڵساین، شێرۆ دەستی بۆ پورە نەخشین هەڵبڕیو چوینەدەرەوە، پێڵاوەكانی هەڵنەكێشا، لاروخوار رێی كرد، چومە تەنیشتێوە دەستیم گرت، دەستی ساردو ئارەق لەهەنیەی دەچۆڕا، خەریكبوو لەپەلوپۆ بكەوێت، چومە بنباڵیەوەو بردمە بنكەی تەندروستی كەمپەكە، بەهاوكاری پەرستیارەكان لەسەر چەرپایەك درێژمانكرد. 
پزیشكەكان هاتنەسەری.. دوای پشكنین شێرۆیان بردە ژووری مانەوە، حاڵی باشنەبوو لەخەراپەوە بۆخەراپتر دەچوو. 
پاش ئەوەی نیو كاتژمێر لەهۆش خۆی چوبوو.. شێرۆ بەئاگاهاتەوە، چەندجارێك ئاخو ئۆفی دەكردو لەناخەوە هەڵدەچوو، لەناكاو دەنگی هەڵبڕی و وتی:" فەرماندە.. تفەنگەكان هەڵبڕن." لەدەنگی شێرۆ... پزیشك و پەرستیارو هاوەڵ نەخۆشەكان لێمان كۆبونەوە، بەهەوڵی پزیشكەكان ئارام بۆوە. شێرۆ ئارام بۆوە، چاوی گێڕا ئەو خەڵكەی بەدەورێوە بینی، رۆندك زایە چاوەكانی و پێڵوەكانی نایە سەریەك.
كەزانی دەورمان چۆلبوە هەوڵیدا ڕاستبێتەوە، لای پشتی كەرەوێتەكەیم نیوە ڕاستكردەوە، پرسی:" دایكم نەهات؟" پێمگوت بەڕێگاوەن بۆ ئێرە. داوای پەڕەو پێنوسیكرد، پەڕەو پێنوسم خستەبەردەستی، ماوەیەك بیریكردەوە، داوایكرد خستمە سەر تەنیشتی چەپ، بەخەتێكی گەورە نوسی:"بۆ فەرماندە.. عیسا... تكایە لەوێ لولەی تفەنگەكان هەڵبڕن، لای چەپی خواروی شار گیانێك.. لەسەر پەیژەی ماڵەكەیانەوە چاوەڕێیە، هەواڵی ئۆپراسیۆنی ئێمەی بیستوەو گەڕاوەتەوە هەوار، خانوویەك.. خۆڵی مردوانی لەسەر نیشتوە، چیمەنێك رەنگی خوێنی گرتوە، دەرگایەك تا ئەمڕۆ كڵۆمدراوە، نزاكانم لەوێن.. دواتر لەتەك جریوەی چۆلەكەو گمەگمی كۆترو جڕوجقی پەڕەسێلكە یا بەیەقین دەگەن، لەقلەقەكانیش دێنەوە سەر تاوەرەكان و ترقە بەدەنوكیان دەكەن و قورینگەكان چیتر بەرز نافڕن. تكایە فەرماندە.. تفەنگەكان وەرسوڕێنن، لەوێ.. دەبێت كنە لە شوێن ئازارێك بكرێت و چاڵی تاوانێك هەڵبدرێتەوە، دەبێت لەپاڵ تەسبیحە ویردخوێنەكەی داپیرەیا ملوانكە كریستاڵیەكەی ئەویش هەڵگیرێتەوە. تكایە فەرماندە... گیانێك لەوێ‌ چاوەڕێیە.. تكایە فەرماندە."
ئەوەندەی نوسی و داوایكرد كەرەوێتەكەیم چاكردەوەو درێژمكرد، ماوەیەك لە بنمیچی ژوورەكەی روانی، پێنوسەكە هەر لەنێو دەستی بوو، لای ئێوارە ویستم بیدوێنم، زمانی بە وشەیەك نەگەڕا، چاوەكانی تێبڕیم، فرمێسك لەچاوەكانی قەتیس مابوون، وەك ئەوەی شتێكم لێ داوابكات، دوو هەنسكی داو سەری لاربۆوە. هاوارم برد.. پزیشكەكان هاتنەسەری و ئامێری بوژانەوەی دڵیان بۆبەست، چارەی نەكرا.. شێرۆ گیانی سپارد. 
پێش ئەوەی دایك و ماڵباتەكەی بگەنەسەر لاشەكەی، نامەكەیم دەقكردو لەبەڕكم نا.
ئەمێستا زیاتر لە هەفتەیەك بەسەر ئەو بەروارەدا بوریوە، كەمن و فەرماندە شێرۆ.. فەرماندە عیسامان جێهێشتوە، چەند جارێك بەتەلیفۆن لەگەڵ یەكودو ئاخافتین، نەخۆشكەوتنی فەرماندە شێرۆم بەو گوتبوو، وەلێ بۆ مردنی هەواڵم پێنەداوە، ئەویش لەبارەی ئۆپراسیۆنەوە هیچی پێنەگوتوم. 
وا بەڕێوەم بۆ ئەوێ‌... بۆلای هەڤاڵەكانم، پێیەكانم چەند گرانن، ئەژنۆكانم چەندە شەكەتن، هەنگاوەكانم بێ فەرماندە شێرۆ بڕناكەن، دەترسم ئاواتەكەی نەهێنمەدی و پێش گەیشتنی ئۆپراسیۆن بەلای چەپی خواروی شار، نامەكە نەگاتە فەرماندە عیسا!!.

‌ 870 جار بینراوه‌
1/20/2018 10:14:40 AM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved