»  شەکری تاڵ
ئەو دۆخە چەندی تر دەخایەنێت؟




لە 26 ساڵی رابردوەوە هەرێمی كوردستان بە قۆناغی زۆر سەخت دا تیپەڕیوەو زۆربەی هەرەزۆری رووداوەكانیش بە زەرەری جەماوەری كوردستان بەتایبەت چینی هەژار كۆتایی هاتووە، هاوڵاتیانی كوردستان هەموكات بەرگەی هەموو نەهامەتیەكیان گرتووەو هەمیشە بۆ فەراهەمكردنی ژیانێكی شایستە قوربانییان داوە، بەڵام لە هەموو هەڵومەرجێكدا ئەوەی كە سودی لە بارودۆخەكان وەرگرتووە، تەنها حیزبە دەسەڵاتدارەكان بوونەو هاوڵاتیانیش بوونەتە سوتەمەنی بۆ سیاسەتە چەوتەكانیان، هەموو كات بەڵێنی باق و بریق بە هاوڵاتیان دراوە، بەڵام هیچی نەچووەتە سەر تەنها چەواشەكاری بووە و هیچی تر ، هیچ كات لایەنە سیاسیەكان بە هەڵەكانی خۆیاندا نە چونەتەوە و بە درێژایی ساڵ لە تەواوی داهاتی كوردستان بە داهاتی فرۆشی نەوت و بە داهاتی ناوخۆوە چەند كەسانێك لە لایەنە سیاسیەكان تیایدا سودمەندبوون و بەشێكی زۆر كەمی بۆ موچە خۆران بووە و هیچ كات حەقی خۆیان پێ نەدراوە، هەر كاتەو بە بیانووی شتێكەوە خۆڵ دەكەنە چاوی خەڵكەوە لە لایەك بە هۆی شەڕی داعشەوە لە لایەكی ترەوە بە هۆی ریفراندۆم و چەندین روداوی تر كە لێرەدا بواری ئەوە نییە باسی بكەم، بەڵام زۆربەی ئاماژەكان بۆ ئەوەیە كە هەموو پێشهاتەكان بە مەبەست بوون و بۆ ئەوە بوە تاكو چاوپۆشی لە گەندەڵیەكانیان بكرێت و بوار بۆ ئەوە نەبێت هاوڵاتیان پەنچەیان بۆ درێژ بكەن، چونكە هەموو كات كارێك هەبووە بۆ ئەوەی هاوڵاتیانی پێ سەرقاڵ بكەن و بەردەوام بن لەسەر گەندەڵیەكانیان لە كاتی هەڵبژاردنەكانیش بە بەڵێنی درۆ و وتاری بێ بنەما خەڵك بۆلای خۆیان رابكێشن بۆ بەدەست هێنانی دەنگەكانیان.
ئێستا خەڵكی بەشمەینەتی هەرێمی كوردستان لە دۆخێكی زۆر خراپدا ژیان بەڕێدەكەن، هیچ بوار بۆ ئەوە نەماوە چاوەڕوان بكرێت بۆ گۆڕانكاری، پێویستە زۆر پەلە بكریت لە گۆڕانكاری ریشەیی و چیتر خەڵكی بەشمەینەت و ماف خوراو نەبێتە قوربانی ئەو دۆخەو با بۆ تەنها جارێكیش بێت بیرێك لەو نەهامەتیانە بكەنەوە كەبەسەر خەڵكی كوردستانیان هێناوە، ئەو جامەی كە چەندین ساڵە دەڵێن لێی دەڕژێت، لێی رژاوە، خەڵكەكە بەتەواوی پڕبووە و تاقەتی چووە لە بەڵێنە درۆیەكان و تاقەتی ئەوەی نەماوە چیتر چاوەڕێ بێت و بڵێن چاك دەبێت با بەس بێت.
ئەوی لێرەدا جێی سەرنج و جێی گومانە ئەوەیە لە هەرێمی كوردستان هیچ كات حیساب بۆ دەنگی ناڕازی نەكراوە بەتایبەت ئەوانەی دێنە سەر شەقام و خۆپیشاندان دەكەن بۆ دەربڕینی داواكاریەكانیان و هێنانەدی خواستەكانیان، هیچ كات حكومەت بە دەنگ داواكاریەكانیان ناچن و داواكانیان بۆ جێبەجێ ناكات، بۆ ئەوەی خۆپیشاندانەكان توندوتیژی لێ نەكەوێتەوەو بە ئاڕاستەی نەخوازراودا نەڕوات، هەركاتێكیش ئاڕاستەی خۆپیشاندانەكان دەگۆڕدرێت لایەنی دەسەڵاتدار زۆر بە توندی وەڵامی خۆپیشاندەران دەداتەوە بە بیانووی هەبوونی دەستی ئاژاوەگێڕ لەناو خۆپیشاندەراندا .
ئێستاش خەڵكی هەژار و موچەخۆران كەوتوونەتە نێوان دوو كەلێنی ترەوە ئەویش بەغدادو هەرێمی كوردستانە، لە نێوان هاتن و نەهاتنی موچەدا ئایا دێت یان نا دەبێ چەندی تر لەو بەینەدا چاوڕەێ بكەن و بە چەند مانگ جارێك چارەگە موچەیان پی بدرێت پێ یان رەوا نەببینن كە هەقێكی سەرەتایی خۆیانەو ئارەقی نێوچەوانی خۆیانە.
ئومێدەوارم بۆ دواین جار خەڵكی هەمیشە بەشخوراوی كوردستان لەو بارە لەبار چووەدا نەمێننەوەو خواستەكانیان بۆ دابین بكرێت و لەگەڵ بەغداد بگەنە رێكەوتن و با ئەم جارە بیر لە هاوڵاتیان بكرێتەوەو داواكانیان بە هەند وەربگیرێت و كوردستان ببوژێتەوەو لە هەموشتێك گرنگ تر یاسا سەروەر بێت.

 ئیمزا
ئەردەلان رەفیق


‌ 1648 جار بینراوه‌
1/27/2018 9:02:04 AM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved