»  وتاری هەفتە
دوای شكاندنی بتەكە یەكێتی چی بكات؟
بورهان حاجی سلێمان


هەرچەندە بڕیاری هەڵوەشاندنەوەی مەكتەبی سیاسی یەكێتی هەنگاوێكی تەندروست بوو بۆ رەواندنەوەی تووڕەیی و نیگەرانی جەماوەرو كادیرەكانی ئەو حیزبە، لەوەش زیاتر ناشرینترین بتی ئەو حیزبەی تێكشاندو كەلاوەیەكی داتەپیووی لەبەر یەك هەڵوەشاندنەوە، بەڵام هێشتا زۆرێك لەو بەڕێزانەی مەكتەبی سیاسی هەزمی گۆڕانكارییەكان ناكەن و دان بە بڕیارەكاندا نانێن، چونكە تائێستا بە بێ رێزگرتن لە بڕیارەكان هەر بە ئاغایەتی خۆیان هەڵسوكەوت دەكەن و تەنانەت رێگرن لەپێكهێنانی دەستەیەك بۆ بەڕێوەبردنی حیزبەكەیان.
كاتێك ئێرانییەكان لەدژی رژێمەكەی پەهلەوی رژابوونە سەر شەقامەكان، حەمەڕەزا شا لەناو فڕۆكەوە دیمەنی ئاپۆڕای خەڵكەكە دەبینێت، لەژەنەراڵ ناسر موقەدەم سەرۆكی دەزگای سافاك دەپرسێت” ئەو خەڵكە چین؟”، لەوەڵامدا ناسر پێیدەڵێت “ پشتگیری لەجەنابتان دەكەن”!!، پێش ریفرادۆم بەناو رۆشنبیرێكی كوردیش بە بارزانی وت:” پێش 3000 هەزار ساڵ لەكتێبدا هاتووە كە كوردستان لەسەر دەستی (جەمەدانی سۆرەك) رزگاری دەبێت”!.. سەرئەنجام حەمەڕەزا تەنها كورسییەكەی لەدەستدا، بەڵام بارزانی كورسییەكەو نیوەی خاكی هەرێمی لەسەر دانا.
ئەو برادەرانەی مەكتەبی سیاسی یەكێتیش بۆ ئەوەی راستییەكانی دەرەوەی دیوەخانەكانی خۆیان بزانن، ئەگەر لەبری ئەوەی گوێ لەستایشی سوودمەندەكانی دەوروبەریان بگرن، گوێ لەكادرانی خۆیان و خەڵكی ئاسایی بگرن كە چییان پێدەڵێن؟ با وێنەیەك لەفەیسبوك پۆستبكەن و بچن كۆمێنتەكان بخوێننەوە، ئەوكات تاڵی راستییەكان دەچێژن!
مانەوەی ئەوان تەنها زیانی بۆ مێژووی خۆیان نییە، بەڵكو داخستنی ئۆرگانەكانی سەرەوەی یەكێتی بە تایبەتی (م. س) بە رووی نەوەی نوێ، قەیرانێكی جدی ئەو حیزبەیە كە لەئێستادا خەریكە جەماوەری نەمێنێت و زۆربەی بۆتە كادر و لەئاستە جیاجیاكاندا پەنگیانخواردووە، چونكە ئۆرگانەكانی لەسەری سەرەوە مۆنۆپۆڵ كراون و كەس شوێنی خۆی چۆڵ ناكات تاكو كادری خواری خۆی سەربكەوێت.. ئەگەر مەكتەب سیاسی و سەركردایەتی گۆڕانكاری تیا بكرایە، ئەوە لەهەموو ئاست و ئۆرگانەكانی خوارەوەشدا بە شێوەیەكی ئینسیابی گۆڕانكاری روویدەداو ئەم دیاردەیەش نابووە هۆی لەدەستدانی كادیری باش و لەباربردنی هەل بۆ دروستبوونی سەركردەی ئایندە.
یەكێتی ئەگەر دەیەوێت نوێ بێتەوە، دەبێت لەئێستاوە تا كۆنگرە لەنیوە پتری روخسارەكانی سەرەوە بگۆڕێت، ئەگەر تاكو بەستنی كۆنگرە هەمان روخسارەكانی دوێنێ یەكێتی بەڕێوەبەرن، ئەوە بە دڵنیاییەوە ئەو مەكتەب سیاسی و سەركردایەتییەی دوای كۆنگرە دێتە ئاراوە، چ لەڕووی تەمەن و چ لەڕووی عەقڵیەت و چ لەڕووی شێرپەنجەی دەستەگەرییەوە، جیاوازیەكی نابێت لەگەڵ ئەوەی ئێستا هەیە.
بینایەكی نوێ كە مەرجەكانی ئەم سەردەمەی تیا بێت، دەبێت كەرەستەی نوێی تیا بەكاربێت و بە نەخشەی نوێ و بە عەقڵی نوێ بونیادبنرێت، چونكە بینای نوێ بە كەرەستەی كۆن دروست ناكرێت، تەنها لە نۆژەنكردنەوەی شوێنەوارە مێژووییەكاندا ئەو كارە روودەدات، ئەگەر یەكێتیش دەیەوێت نەبێت بە شوێنەوارێكی مێژوویی، دەبێت كەرەستە كۆنەكان بخاتە مۆزەخانەی خەباتیەوەو بە كەرەستەی نوێوە دەست بكات بە بیناكردنەوەی خۆی.. پێویستە لەجێگەی ئەم دەوارە شڕەی ئێستا كە لەهەموولاوە با تەنگی پێ هەڵدەچنێت، بینایەكی بەهێز دروست بكات، تاكو بەرگەی رەشەباو بوومەلەرزە بەهێزەكانی ناوچەكە بگرێت. 





‌ 1968 جار بینراوه‌
2/10/2018 9:30:41 AM
Print Friendly and PDF
بابەتی زیاتر ...
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved