»  شۆک
بارین كۆبانی.. نمونەیەكی تری جوامێری ژنانی كوردە
هاوار ستار


هەڵگیرساندنی شەڕ دژی كوردانی رۆژئاوا لە لایەن توركیاو گروپەكانیەوە هەواڵی گەرمی رۆژانەیە، بەڵام ئەوەی زیاتر هەواڵەكانی گەرمتر كردووە بڵاوبونەوەی گرتەی ڤیدیۆیی سوكایەتیكردنە بە جەستەی ژنە شەڕڤانێكی شەهید لە لایەن گروپە ئیسلامیەكانی پاڵپشتكراو لەلایەن توركیاوە.
ئەو رووداوە قێزەونە نەك هەر رووی راستی سوپای سوریای ئازادو گروپە چەكداریەكانی تری هاوپەیمانیان دەردەخات، بەڵكو رووی راستەقینەی تورك و ئەتاتوركیەكانیش ئاشكرا دەكات، كە ئەوە پیشەی لە مێژینەیانەو هەر لە كۆنەوە بەرامبەر گەلانی كوردو ئەرمەن رەشبگیری و سوكایەتی و دەستدرێژی و جینۆسایدیان ئەنجامداوە.
لەگرتەیەكی ڤیدیۆییدا كە چەكدارانی سوپای سوریای ئازاد بڵاویان كردەوەتەوەو تێیدا ژنە شەڕڤانێك دەردەكەوێت كە بەشی سەرەوەی جەستەی رووتكراوەتەوەو جەستەی شێوێنراوەو مەمكەكانی بڕاون و پاشان چەند چەكدارێك سوكایەتی بە جەستەی دەكەن، یەكێكیش لەوان پێی لەسەر مەمكی دادەنێت و سوكایەتی دەكات، ئەم دیمەنە قێزەونە هەر زوو ناڕەزایی گەورەی بەدوای خۆیدا هێناو كەسانی چالاك و مافپەروەر و ئاشتیخواز لە سەرانسەری جیهان، ئەم كارە قێزەونە بە رووی راستەقینەی سوپای ئازادو بەرەئیسلامیەكانی تر و سوپای توركیای ناودەبەن و پێیانوایە هەمان ئەو كارانەی داعش كردنی ئەمانیش دەیكەن.
رووداوی شەهید بارین كۆبانێ دوای ئەوە بووە لەشەڕێكی سەختدا ئەو خاتونە تا دوا فیشەك جەنگاوە لە گوندی قەڕنەی سەربەعەفرین و رۆژی یەكی شوبات ڤیدیۆكەی بڵاوكرایەوە، بەردەوامی جەنگانی ئەو خاتونە تا دوافیشەك سوڕبوونی رۆڵەكانی كورد لەسەر بەرخۆدان و تینوێتی بۆ ئازادی دەسەلمێنێت، چونكە لە ئێستا كورد لەگەڵ گەورەترین گروپی تیرۆرستی جیهان شەڕی تەواو نەبووەو دووەم هێزی گەورەی ناتۆش شەڕی لەگەڵ دەكات، ئەمەش قارەمانێتی كوردو كچان و كوڕانی لەمێژوودا تۆماردەكات، چونكە وەك بارین لەگرتەیەكی ڤیدۆییدا پێش چونە شەڕ لەو سنورە دەڵێت: “هیچ شتێكم دەربارەی جیهانی سیاسەت و بەرخۆدانی سەربازی نەدەزانی، بەڵام دوای ئەوەی بەشداریم بە بەهێزەكانی یەكینەكانی پاراستنی ژنانەوە كرد، بۆم دەركەوت ئازادیم لە بەرگریكردنمەوە هاوشانی رۆڵەكانی خاكەكەمەوە بەدەستدێت”.
سوكایەتیكردن بەجەستەی بارین كۆبانێ ناڕەزایی زۆری لێكەوتەوە لە ئاستی نێوخۆیی و جیهانی ئەگەرچی لەسەر چۆنیەتی شەهید بوونی رای جیاواز هەبوو، چونكە هەندێك دەڵێن تا دوا چركە جەنگاوە و دواتر لاشەكەی شێوێنراوە و هەندێكیش دەڵێن ئەو خانمە چالاكی خۆكوژی ئەنجامداوە، بەڵام ئەوەی گرنگە چۆنیەتی سوكایەتیكردنە بەلاشەی شەهیدێك بەجەستەی ئافرەتێك بە تەرمی مردوویەك و مرۆڤێك، هەربۆیە ئەو دیمەنە كەسانی ناكۆك بەسیاسەتی یەپەگەشی هێنایە هەژان و قسەكردن.
ئەو رووداوەی بەسەر تەرمی شەهیدێكی ژنی یەپەژە هێنرا نەك ژنان و پیاوانی یەپەگە و یەپەژە توڕەدەكات بەڵكو سوڕتریان دەكات لە جەنگان و بەردەوامی لەسەر پاراستنی خاك و تەنانەت هەمو كوردێك لە نێو لایەنە جیاكان پەست دەكات و وایان لێدەكات هاوهەڵوێست بن بەرامبەر ئەو تاوانانەی بەرامبەر كورد لە هەرچوار پارچەكراوی كوردستان دەكرێت.
بارین كۆبانێ ئەگەرچی پێگەی بی بی سی سەرەتا وای بڵاوكردەوە كە خانەوادەكەی نایانەوێ ناوی راستەقینەی بدركێنن، بەڵام دواتر هەمان پێگە ئاشكرایدەكات ناوی راستەقینەی شەڕڤان بارین كۆبانێ (ئامینە عومەر)ە و لە دایكبووی ساڵی 1992ی گوندی قیركەلبینە لە ناوچەی شەهبای سنوری باكوری حەلەب، خوێندنی ئامادەیی تەواو نەكردووە دابڕاوە بەهۆی ئەوەی ساڵی 2015 پەیوەندی كردووە بە ریزەكانی یەكینەكانی پاراستنی ژنان (یەپەژە)ەوە و لە سەرەتای مانگی شوباتی ساڵی 2018 بەدەستی چەكدارە توندەڕەوەكانی سوپای سوریای بەناو ئازاد لە عەفرین شەهیدكراوە.






‌ 823 جار بینراوه‌
2/10/2018 10:00:48 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved