»  شەکری تاڵ
ئەمجارەیان كێ نوێنەرم دەبێت؟!




لەسەردەمی حوكمی تاكڕەوانەی سەدام حسێن و چەمكی سەركوتكەرانەی بەعس و رێگەنەدان بە ئازادییەكان و سنورداركردن و قەتیسكردنی بیری نیشتمانپەروەری لەناو بۆتەیەكی تایبەت بە بەرژەوەندیەكانی، ئەوەی كردبووە دەسكەوتی هەرە گەورەو جگە لە بیری شۆفینیەتی عرووبەچێتی كە هیچ پەیوەندی بە عەرەب بوونیشەوە نەبوو، سەرباری ئەوەش بەكار هێنانی كوشت و بڕ دژ بە گەلانی ژێر دەسەڵاتی خۆی تا ئەو كاتەی نقووم بوو هیچی بۆ وڵاتەكە نەچنییەوە. ئەو سەردەمە تاقە ئۆخژنێك لە ژیانی گەنجیمان بە نهێنییەوە گوێگرتن بوو لە چالاكییەكانی پێشمەرگەو پیرۆزترین و بەسامترینی باسوخواسەكانمان كوردایەتی بزووتنەوەی رزگاریخوازی كورد بوو لە چیاو پێدەشتە دوورە دەستەكانی كوردستان.
كەركوك بەبەراورد بە ناوچەكانی تر بە (13) ساڵ ئینجا چاوی بە رووناكی ئازادی هەڵهێناو لەرێی حیزبە باڵا دەستەكان و جومگەكانی حكومەتی هەرێمی كوردستانەوە كە هێشتا خوێنی كوردایەتی لەناو دەمارەكانماندا هەر بە تین و گوڕبوو بەرەو گەیشتن بە لوتكەكانی ئاوات و خەونی هەرە گەورەمان ئازادی تاك و فەراهەمكردنی ژیانی مەدەنیانەو گەیشتن بوو بە ریزی گەلانی جیهان، كە ئەمە خۆی لە خۆیدا بەڵێنی شۆڕشی چەكداریمان بوو بەڵام كە هاتنە ناو شار ئەو هەموو بەڵێنە ترش وخوێ كراوە بەهۆی كاڵفامی و كەمئەزموونیمانەوە وەك بڵقی سەرئاو هەڵپرووكاوو تەمەنكورتبوو. 
ئەوسا من وەك كوردێك دەچەوسێندرامەوە، چونكە ئیمزام بۆ چوونە ناو ریزی بەعس نەكردو بەو هۆیەوە لەزۆربەی ئیمتیازەتاكانی خۆشی ژیان بێبەشكرام، كوردبووم و مافی هاوڵاتی بوونم نەبوو، لەساڵی 1991ـەوە وەك كوردێكی جێنشینی شاری كەركوك دژایەتیكردنمان لە لایەن بەعسەوە گەیشتە ترۆپك و ناچار وەك مامۆستایەك دەستم لە پیشەكەم هەڵگرت و تا دەهات ژیانمان تەنگتر دەبوو، ئەوەی لە رۆحمانا زیاتر گەشەی دەكرد رووخاندنی بەعس و لەناودانی بەعس بوو كە دواجار بە هۆی زلهێزەكانی جیهانەوە بە سەركردایەتی ئەمریكا تەخت و تاراجیان نقوومكرا. ئێمەش بەوپەڕی تین و تاوەوە گەڕاینەوە سەر پیشە پیرۆزەكەی خۆمان و لەناو شاری كەركوك بە سروودی “ئەی رەقیب و خوایە وەتەن ئاواكەی” یەكەم گردبوونەوەی خوێنكارەكانمان لەناو گۆڕەپانی قوتابخانەكان دەستیپێكردو تا ئەمڕۆش وێرای ئەو هەموو ناهەقیەی بەرامبەر بە مامۆستا و پرۆسەی پەروەردەیی دەكرێت دەستم لە پیشەكەم هەڵنەگرتووە. 
ماوەتەوە بڵێم ئەگەر جاران وەك كوردێك دەچەوسێندرامەوە، ئێستا وەك مامۆستایەك نانبڕاوكراوم، بەراورد بە حەفتاكان و هەشتاكانی سەدەی رابردوو مامۆستا لە لوتكەی شكۆمەندی یاسایی و نەریتی و كۆمەڵایەتییەوە ئێستا وەك تاكێك بەتەنها رێزی خودی خۆمم بۆ ماوەتەوە كە دەسەڵاتەكان ناتوانن لێمانی بسێننەوە، ئەمڕۆ وەك مامۆستایەك دەچەوسێندرێمەوەو ئیتر دەنگ بە نەخوێندەواران نادەم، چونكە مایەی قبووڵكردن نییە باخچەو ڤێلای نەخوێندەوارێك لە دیوارو گۆڕەپانی قوتابخانەیەك جوانترو فانتازیتر بێت، مووچەی بن دیواری كەونەجاشێك ببێتە هۆی نانبڕاوكردنی مامۆستایەك و خۆشیەكانی ژیانی هەلپەرستێك باجەكەی خوێندكارێك بیدات كە سەرماو سۆڵە لەناو پۆلێكی وێرانەدا رۆحی دەتەنێت. 
بۆیە ئەگەر نوێنەرێك هەبێت دەست لەسەر سنگ كار بۆ ئەوە بكات ژینگەی دروستی پەروەردەیی و موچەو بیمەی ژیان و تەندروستی مامۆستاو خانەوادە نزیكەكەی و چەندین خزمەتی تری كاروانی پڕۆسەی پەوەردەیی بكات و زانست و فێركاری بخاتە سەرووی هەموو ئامانجێكی گشتی و تایبەتەوە.. ئامادەم دەنگی پێ بدەم و ئەو نیشانەی (/)ـی لەبەردەم ناوەكەی دادەنێم و دەیكەمە یەكەم بڵێسەی شۆڕشی پەروەردەیی لە كوردستان، ئەگەر نا رازی نیم نوێنەرێكی شكستخواردوو بەناوی كوردایەتیەوە جارێكی تر فریوم بدات، لەمڕۆ بەدواوە كار لەسەر شكۆی تاك و سەروەری یاسا دەكەم و بە دروشمی نەتەوەیی و ئایینی و مەزهەبی نەخوێندەوارەكان فریوناخۆم.. بۆیە لەسەرمە بپرسم:”ئەمجارەیان كێ نوێنەرم دەبێت؟!”.

 ئیمزا
عەبدوالڕەحیم سەرەڕۆ 


‌ 1424 جار بینراوه‌
2/10/2018 10:01:25 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved