»  پەڕەموچ
ئەحلام مەنسور ... ژنە یاخیەكە لەسیستمی كۆمەڵایەتی
سمكۆ محەمەد


یاخیگەرێتی ئەو چەمكە فرەمانایەیە كە لەرووی ئایدیاییەوە گوناهێكە دژ بەموقەدەسی كۆمەڵگە و لەرووی ماتریالیشەوە وڵامدانەوەیەكە بەو دژانەی كە لەهەناوی خۆیدا ماناكانی خۆی بەرهەمدەهێنێتەوە. ئەمە رووە گشتیەكەیەتی، لەرووە تایبەتەكەشیەوە (نەفی) كردنی هەموو ئەو پێوەرە ئەخلاقیانەیە كە یاخیبوونە لەخودی ترادیسۆن كە گشت كاری پێدەكات، یاخیگەرێتی لەدەرەوەی چەمك، حاڵەتێكە دەتوانین وەكو ئامرازێك بۆ دژایەتیكردنی سیستم بەكاری بهێنین، بەڵام لەشوێنێكی دیكەدا فۆڕمێكی تر وەردەگرێ و دەبێتە ئامانج، ئەم ناكۆكی و جیاوازییە رەنگە لەنێو دیوی ناوەوەی زۆر تاكی دیكەدا خۆی مەڵاسدابێت، بەتایبەتی تاكی كوردی كەهیچ زەمانەتێكی كۆمەڵایەتی نییە بۆئەوەی بەقەناعەتەوە مومارەسەی ئەو شێوە بیركردنەوەیە بكات كەهەڵیبژاردووە. بۆیە ئەم پێشەكیەم بۆ قسەكردن لەسەر ئەحلام بەكارهێناوە، چونكە ناكرێ باسی یاخیگەرێتی بكەین و پێناسەیەك بەدەستەوە نەدەین، هەروەها ناكرێ ئەحلام وەكو هەر كارێكتەرێكی چالاك و یاخی و ناباو وەرنەگرین، خۆ ئەگەر ئەو حاڵەتانە لەبەر چاونەگرین كە بەشێك بوون لەشێوەی بیركردنەوەی ئەو، كە رەنگە هەندێ جار بەبێ ئاگاهانەش ئینتیمای بۆ ئەو چەمكانە هەبووبێت، بەهەر حاڵ من كە ماوەیكی زۆر لەگەڵ نووسین و فەزای بیركردنەوەی ئەحلام هەڵمكرد و لە نزیكەوە هەم چیرۆكەكانیم خوێندۆتەوە و هەم نووسین و هەم سەرپەرشتی نووسینەكانیم كردووە، لەو پرۆسەیەدا دوو كەسایەتیم هەستپێكردووە لە دونیای ئەحلامدا، كەسایەتیەكی یاخی لەهەموو جۆرە موڵكیەتێك و كەسایەتیەكی دیكەی سودگەرا بەئاراستەی كەڵك وەرگرتن لەو شتانەی كە لەرووی غەریزییەوە ئینسان دووچاری پارادۆكس دەكات كە حەزی لەموڵكیەت بێت، رەنگە هەردوو حاڵەتەكە بۆ ژنێك كە لەنێو جەنجاڵی ژیانی كۆمەڵایەتی و بەرتەسكی بیركردنەوەدا ژیان بگوزەرێنێ لەكوردستان، مافی خۆی بێت حەزەربكات لەو رێچكەیەی هەڵیبژاردبوو كە دژی هەموو رەوتەكانی دیكەی كۆمەڵگە بوو، بۆ ئەمەش پێویستی بەوە هەبوو كە لەشوێنێكی دیكەدا وەكو كەسێكی سودگەرا خۆی نیشان بدات، تاكو بارەكەی هێندەی تر قورس نەبێت، یان لانیكەم بتوانێ بەرگری لەو فەزایە بكات كە تایبەتە بەخۆی، لەروویەكی دیكەشەوە چاونەترسانە بوو لەبەرامبەر ئەو دڵڕەقییەی كۆمەڵگە بەرامبەر كەسی یاخی هەیەتی. 

یاخیبوون لەخێزانەوە بۆ تاكگەرایی 
دەرچوون لەخێزان و بەتەنها ژیان، كارێكی هێندە ئەستەمە بۆ تاكێك لەگەڵ كۆمەڵگەیەكدا بژی كە مانای مافی تاكێتی بەئینسان رەوا نابینێ، تائەو رادەیەی كە نەفرەتی بەدواوەیە، نەفرەت لەخێزانەوە بگرە تادەگاتە نەفرەتی كۆمەڵگە و ئاین و ترادیسیۆنێك كە لەجیاتی بەهای ئینسانی، ئەخلاقێكی دروستكراو دەكاتە پێوەر بۆ تاكێكی قایل و ملكەچ بەژیانی تەقلیدی، نەفرەتێك كە بێشومار ژنی كوردی كردووە بەقوربانی ترادیسۆن و پێوەرە ئەخلاقیەكانی كۆمەڵگە بۆ خێزان، ئەوەی ئەحلام مەنسور دەخاتە ئەو چوارچێوەیەوە، ئەو یاخیگەرێتیە بوو كە لەرەتكردنەوەی خێزانەوە دەستپێكرد، ئیدی خێزانی یەكەم كە باوك و دیاك و برا و خوشك بوو، خێزانی دووەم كە هەڵبژاردنی ژیانی هاوسەری بوو، ئەمەیە كە لەسەرەتاوە باسم كرد وەكو ئامرازێك بۆ هەڵبژاردنی شێوە ژیان یاخی بوو، ئەمە بۆ ئەو سەرەتایەك بوو بۆ خۆ بارهێنان لەرەتكردنەوەی پێوەرەكان و هەموو جۆرەكانی ترادیسۆنی كۆمەڵایەتی و ئاین، بەتایبەتی بۆ تاكی مێینە كە دژوارە ژیانی تەنهایی هەڵبژێرێت و دوور لەهەموو كەسە نزیكەكانی بزر نەبێ لەشارێكی گەورەی وەكو بەغدا. 
هەڵبژاردن ژیانی تاكێتی شكاندنی سنوورێكی واقیعییە كە حوكمی خێرایی و خاوی لێكترازان لەهەموو پەیوەندییە كۆمەڵایەتیەكان وەكو مەحاڵێك دەخاتە بەردەم تاك، ئەمە تاڕادەیەك جورئەتی دەوێ، چونكە رەتكردنەوەی خێزان، بۆ ئافرەتێك جگە لە ئەدەبەكەی بیروباوەڕیشی پێشكەوتوخوازانە بوو، بۆیە تەنها جێهێشتنی چەند كەسێكی نزیك و چواردیواری ماڵێك نەبوو، بەقەد ئەوەی جێهێشتنی دونیایەك بوو كە تێیدا كۆمەڵێك یادەوەری لەگەڵ خۆی هەڵگرتووە و كۆمەڵێك یادەوەریش پوچەڵ دەكاتەوە كە لەئایندەدا دەبوو تۆمار بكرێت، بۆ ئەحلام مەنسور ئەمە پنتی یەكەمی هەنگاونان بوو بەرەو رێگایەكی پڕ مەترسی و دژوار، رێگایەك كە جگە لەمەترسی قەبوڵ نەكردنی لەلایەن كۆمەڵگەوە، تاقەبوڵ نەكردنی لەلایەنی سیاسی و فكریشەوە، هەروەها رەتكردنەوەی ئەو حەزو ئارەزووانەی كە هەر ئینسانێك خاوەندارێتی دەكات و بریتییە لەئیحساس و غەریزەیەكی سروشتی، بەڵام پاڵنەری ئەو هەڵبژاردنە تەنها وەڕس بوون نەبووە لەدەورو پشت، بەقەد وەڕس بوونێك بوو كە لۆژیكێكی لەپشتەوە بوو، یان ئەوەی پرنسیپێكی فكری لەپشتەوە بوو، بۆیە توانی بەرگری بكات و تاكو دوا وێستگەی ژیانی بەئەزموونەكانیشیەوە كە پڕ بوون لەشكست بەردەوام بوو و پەشیمان نەبووەوە، بەو پێیەی ئەزموونی واقیعی لەگۆڕانكاریەكانی ژیانی ئەحلام، هیچ گۆڕانكارییەكی نەخوڵقاند لە كەسایەتی و نیشاندانی دیمەنی پەرچەكردار لەچەشنی نەخۆشێكی دەروونی. یان ئەوەی كە بیستومانە یان بینیومانە كەسایەتییەك لەدوا ساتەكانی تەمەنی پەشیمان دەبێتەوە لە بیروڕاكانی، ئەحلام بەپێچەوانەوە لەو سكەیە لاینەدا كە گرتبویە بەر. بەڵام ئەحلام قوربانییەك بوو كە شوێنەواری سەدەها ژنی لەجەستەی خۆی هەڵگرتبوو بە دەروونێكی گەورەوە، ئەو پێی وابو راستە كۆمەڵگە دڵرەقە و بكوژە، بكوژیش ژیانی تاكەكان لەناو دەبات،
بەڵام ناتوانێت واقیعی بوونی ئەو تاكە ناباوانە لەناو بەرێت كە بوون بە بەشێك لەیادەوەری و مێژووی كۆمەڵگەیەك. بەتەنیایی ژیان و كاركردن لەمەحفەلێك كە بەشی زۆریان نێرینە بوون، نەترسی لە بەكارهێنانی موفرەدەی قورس بەرامبەر موقەدەساتی كۆمەڵگە و هەڵبژاردنی فەزایەكی پڕ لە ئازادی، هەموو ئەمانە ئەو كارێكتەرەیان دروستكرد كە ناوی ئەحلام مەنسور بوو.

یاخیگەرێتی لە نووسین 
نووسین لەگەڵ ئەوەدا كە بەرپرسیارێتیە هەم لەرووی مەعریفییەوە و هەمیش لەڕووی ویژدانیەوە، بۆخۆی بەشێكیشە لەیاخیگەرێتی، ئەوەی كە ئەحلام لەگەڵ نووسەر و هونەرمەندە مێینەكانی دیكەدا جودا دەكاتەوە، ئەو گوتارە راستەوخۆیە بوو كە لەپشت تێكستەكانییەوە راوەستابوون بەبێ پەردە و بەشەفافانە قسەی لەسەر ئازادبوونی ژن دەكرد، رەخنەی لەژیانی بەكاڵاكردنی ژن دەكرد لەكۆمەڵگەی كوردەواری، ئەو لەكۆمەڵە چیرۆكی (پرد) ەوە كە لەسەرەتای هەشتاكان بڵاوی كردەوە، پنتی دەستپێكردنی یاخیگەرێتی راگەیاند بوو لەنووسین بەبێ ئەوەی لەرووی فكریەوە هیچ پشتگیرییەك لەتیۆرە فكریەكان وەربگرێت، بەبێ ئەوەی هیچكام لەو ژنە ناسراوانە بناسێ كە لەدونیای ئەدەبی جیهانیدا سیمبوڵی ئەم بیرۆكەیە بوون، جگە لە سیمۆن دی بۆڤار، بەڵام چاونەترسانە و راشكاوانە ئەو دیوە شاراوانەی باس دەكرد كە ژنی رۆژهەڵاتی و بەتایبەتیش ژنی كوردی تێدا زیندانی كرابوو. بۆیەش قسەلەسەر مەسەلەی ژن دەكەم لەلای ئەحلام، چونكە ئەو پێی وابوو كەلێنێكی گەورە لەبزووتنەوەی نوێخوازی ئەدەب و پێشكەوتنی كوردیدا هەیە بەبێ رزگاربوونی خودی ژنان لەو مەعزەلە بەشەرییە، بەبێ سنوور شكاندنی كۆمەڵایەتی و بەشداریكردنی راستەوخۆی ژن لە سیاسەتدا، ئەو كەلێنە پڕ نابێتەوە.
جیاوازی بیركردنەوەی ئەحلام لەگەڵ نووسەر و چیرۆكنووسە ژنەكانی دیكەی كورد كە هاوزەمانی ئەو بابەتەیان دەنووسی و بڵاویان دەكردەوە یان ناسراوبوون لەدونیای ئەدەب و هونەری كوردی، ئەوەبوو كە ئەو لەپەنا نووسینەوەی ژیانی كورد لەنێو جەنجاڵی نەریتێكی دواكەوتوانەی بێ مافیدا، هەروەها تێكەڵكێشكردنی لەگەڵ فەنتازیای ئەدەبیدا، ئامانجی نووسینەكەی دیاربوو كە شێوە هاندانێكی ژنان بوو دژ بەو ترادسیۆنەی كە تەگەرەیە لەبەردەم ئازادی یە هەمەلایەنەكانی ژنان، گوتاری پشت تێكستەكانی ئەحلام، لەگەڵ ئەوەدا ئاشكرا بوون كە هۆشیاری هەمەلایەنە و ئاگاهی پێوەدیار بوو، هەروەها بەبێ نووسینەوەی هیچ بەیانێك مانیفێستێكی راستەوخۆش بوو بۆ ئازادبوونی ژن لەكۆت و بەندی كۆمەڵایەتی و ئایینی و تەنانەت پەراوێزخستنی ژنان لەفەزای سیاسیدا، خۆی بەپێشەنگی ئەو بزووتنەوەیە دەزانێ، بەڵام بەهۆی شازبوونیەوە كەسێك نەبوو كۆمەك بەو فكرە بكات و بەهەمان ستایلی ئەو ژیان بكات، زۆر لەخەمی ئەوەدا بوو كە كۆمەڵگە هەمیشە لەپاشەكشەدایە. 
ئەحلام لەرۆمانی (ئەڵوەن) دا هەموو پاڵەوانەكانی یاخی كردبوو لەو فەزا داخراوەی كە ژیانی لۆكاڵی فەرزی كردبوو بەسەر ئیسناندا. هەموو ئەو بیرۆكانەشی كەواقیعی بوون، لەو كەساییەتیانە وەرگرتبوو كە بەشێك بوون لەئیدیۆمە كۆمەڵایەتیەكان و ئەو لەزاری دایكی یان باوكی یان كەسە نزیكەكانیەوە بیستبووی یان وەریگرتبوو. ئەوەش كە بەچاوی خۆی بینیبووی، راستەوخۆ ئەو رۆڵەی پێبەخشیبوون لەرۆمانەكەیدا، سەرباری هەموو ئەوانەش كە دەتوانین وەكو شێوە كارێكی سۆسیۆلۆژییەك تەماشای بكەین، ئەدیبێك یان رەخنەگرێك یان خوێنەرێكی بەسەلیقە نەبوو خوێندنەوە بۆ ئەو ستایلە بكات كە سكێچی ژیانی كۆمەڵایەتی كوردی بوو. مەبەستم لەوەیە كە ئەحلام لەبری ئەوەی ئیدیۆمەكان بنووسێتەوە، كەڵكی لەفەزا و كارەكتەرەكان وەرگرتبوو بۆ پالەوانی رۆمانەكانی. 

گوتاری یاخیگەرێتی كلاسیكیانە.. 
سەدەی نۆزدە بۆ رۆشنبیری كورد، سەدەی كاریگەری ئەو چەمكە ئەدەبی و سیاسیانە بوو كە لەرۆژئاواوە دزەیان دەكردە نێو ئەدەبیات و نووسینی كوردیەوە، بەتایبەتیش ئەو چەمكە ئەدەبی و فكریانەی كە لەفەرنساوە دەهاتن، بەو پێیەی كە پاریس بەرهەمهێنەری ئەو چەمكانە بوو كە پەیوەندیان بەمرۆناسیەوە هەبوو، ئەحلام مەنسور دوای ئەو هەموو رێگرییەی بۆ تەواو كردنی خوێندن، زانكۆی بەغدا تەواو كرد، لەناوەڕاستی هەشتاكان بەمەبەستی خوێندن لەبواری ئەكادیمیا دەچێتە فەرەنساو لەوێ لانیكەم بەرۆشنبیری ئەو سەردەمەی رۆژائاوایی ئاشنا دەبێت، هەڵبەت بۆ ئەو سارتەر و سیمۆن دی بوڤارا، نموونەیەكی بەردەست بوو بۆئەوەی بتوانێ قسە لەسەر یاخیگەرێتی بكات لەنووسیندا، بۆیە كاریگەرێتی فكری سارتەر و سیمۆنی زۆر لەسەرەوە بوو، بەتایبەتیش فكری فێمێنیزم كە ئەو بەبێ باگراوندێكی تەواو فكریانە، مومارەسەی دەكرد و خۆی بە پێشەنگی ئەو فكرە دەزانی، لەلای ئەو پێوەرێك هەبوو كە ئینسان نابێ راستگۆنەبێ لەگەڵ خۆیدا، تەنانەت لەنێو تێكستەكانیشیدا مەرج بوو رەنگبداتەوە، بەبێ لەبەرچاوگرتنی هونەری نووسین و ئیستاتیكا و گوتاری ناراستەوخۆ، بۆیە زۆرجار دەكەوتە بەر رەخنەی ئەوەی كە لەژێر كاریگەری ئیدیۆلۆژیادا دەونووسێ، بۆیە نەیتوانیوە ئەو دەقە بشكێنێ و ئینتیما بۆ بزووتنەوەی نوێگەرێتی بكات كە ستایلێكی نوێی رۆماننووسی بەرهەمهێنابوو، بەڵام ئەو پێی وابوو ئەمە مانای یاخیگەرێتییە و دەبێ تێكست مانای خوی زوو بدات بەدەستەوە و بەرهەمیش هەر ئەوە ماناكەیەتی، هەر بۆیە وەڵامی ئەو رەخنە نوێگەرییەی پێنەبوو كە لەنێو دونیای مۆدیرنی ئەدەبیاتدا بەرهەمهاتووە و فەزای نووسینی گۆڕیوە.
پاڵەوانی چیرۆكەكانی ئەو بەرادەیەك بەرجەستە بوون و واقیعی بوون كە لەگفتوگۆی رۆژانەدا ئاشكرای دەكردن، تائەو رادەیەی تەماشاكردنی بۆ زەمەن و كاتیش واقیعیانە بوو، نەك ئەوەی خەیاڵێك بێت بۆ ئەو پاڵەوانەی كەئەو گەرەكیەتی گەمەی پێبكات و رۆڵی پێبدات تاكو فەزایەك بخوڵقێنێ لەخەیاڵدانی خوێنەردا، ئەو قەناعەتەشی نەبوو پاڵەوانەكانی بكات بەكۆیلەی تێكستەكانی، هەربۆیە هەمیشە پاڵەوانەكانی ئازاد و براوە چاونەترس بوون، تەنانەت لەموناقەشە و گێڕانەوە دەربارەی ئیدیۆمی زێدی خۆشی كە خانەقین بوو، هەمان ئەو پاڵەوانانەی باس دەكرد كە لەخەیاڵیدا بوون بیكات بەپاڵەوانی چیرۆكەكانی، (تاوسە) ئەو ژنە یاخییە بوو كە هەمیشە باسی دەكرد و گوایە بەمنداڵی بینیویەتی، ئەم ژنە پێشتر لەخانەقین بووە و بەهۆی بێكەسییەوە هاموشۆی نێوان خانەقین و كرماشانی كردووە و خەنە و كەرەستەی جوانكاری ژنانی هێناوە و دەیان جار رووبەڕووی مەترسی بۆتەوە، لەحاڵێكدا ئەم پاڵەوانە لەگەڵ پیاوان كاری قاچاخچێتی كردووە، بەوپێیەش بێت كەسێكی لەرادەبەدەر یاخیی بووە لەترادیسیۆن، بۆیە ئەحلام زۆر سەرسام بوو بەو یاخێتیە و كردبوی بەپاڵەوانی نموونەیی خۆی. بیانووشی بۆ ئەمە ئەوەبوو كە شانۆكانی سارتەر و نووسینەكانی سیمۆن، هەمان پاڵەوانی واقیعیان هەیە، بۆیە ئەمیش بەهەمان ستایل كاری دەكرد. 
ئەحلام هێندە سەرسام بوو بەو ژنانەی كە توانیبویان بەبێ پیاو بژین و نموونەكەشی تاوسە بوو، دوای ماوەیەكی دوور و درێژی ژیانی تەنهایی لەبەغدا و شەوانی سینەمای سەمیرامیس و رەشید و شارع موتەنەبی و چایخانەی پارلەمانی بەغدا كە بەشێكی زور لەنووسەر و ئەدیب و سینەماكار و شێوەكار و شانۆكار و هتد لەوی كۆدەبوونەوە، ئەحلام وەكو پیاوان سەردانی ئەوێی دەكرد و لەقسەی خەڵك نەدەترسا، بۆیە ساڵی 1999 لەگەڵ چیرۆكنووسی بەڕەگەز عەرەب (شەوقی كەریم) هاوسەرگیری دەكات، بەڵام دیارە شەوقی هەرسی ئەو ژیانە ناكات كە ئەحلام بۆخۆی هەڵبژاردووە و توشی كێشە دەبن، بەڵام بەهۆی كێشەیەكی سیاسیەوە (شەوقی كەریم) دەكەوێتە زیندانەوە، ئەحلام بەناچار دەچێتە لەزیندان و لەوێ جودا دەبێتەوە لە هاوسەرەكەی و هیچ یەكێك لەو مافانەشی گەرەك نابێ كە ژنان قەبوڵیانە. 
یاخیگەرێتی ئەحلام لەرۆژنامەگەریدا
ئەوەی كە نووسینی ئەحلامی لەنووسینی ژنانی چالاك لەبورای مەسەلەی ژناندا جودا دەكردەوە، دەستبردنی بوو بۆ شتە تابۆو حەرامەكان، نموونەش قسە كردنی راشكاوانەو بێ پەردانە بوو بەرامبەر خەتەكردنی ژنان و مەسەلەی سێكس كە ئەو بڕوای نەبوو ژن ئەو كائینەیە دەبێ غەریزەی پیاوان دامركێنێتەوە، ئەم گوتارە راستەوخۆیە كارێكی كردبوو كەهەندێ جار پیاوانی ئاینی قەڵس دەكردو دواجاریش ساڵی 2010 بوو كە لەسەر بابەتێكی ئەحلام مەلایەكی ئاینی گوتاری نوێژی هەینی لەسەر نووسینێكی ئەو تەرخان كردبوو و كێشەی لەسەر بەرپابوو.
سەرەتای ساڵی 2001 بوو ئەحلام مەنسور لەبەغداوە هاتە سلێمانی، لەڕێگەی برادەرانی هەفتەنامەی "هاوڵاتی"یەوە هاتە رۆژنامەكەو وەكو ئەندامی دەستەی نووسەران دەست بەكاربوو، ئەو دیسان بەرمەبنای ئەوەبوو كە "هاوڵاتی" هەڵبژارد، چونكە ئەو رۆژنامەیە بڕێكی زۆر ئازادی نووسینی تێدابوو، هەروەها یاخی بوو لەو سیاسەتە باوەی كە لەكوردستاتن هەبوو، ئیدی بەوپێیەی كە یەكێك بوو لەتایبەتمەندیەكانی نووسینی خۆی، مەلەفی ژنانی وەرگرت، زۆر بەجورئەتەوە دەینووسی، تائەو رادەیەی كە هەندێ جار بەناچار لەترسی فشاری ترادیسیۆنی كۆمەڵاتی و ئاین و هتد، دەستكاری نووسینەكەیمان دەكرد یان پێمان دەگوت خۆی دەستكاری بكات. ئەمە جگەلەوەی كە هەر رۆژنامە یان گۆڤار یان رادیۆ یان تەلەفزیۆنێك چاوپێكەوتنیان لەگەڵ سازدەكرد، ئەو بەبێ پەردە قسەی دەكرد لەسەر چەوساندنەوەی ژنان و یەكەم مەسەلەی پەردەی كچێنی بوو كە پێی وابوو هیچ مانایەك نیە وەكو پێوەر وەربگیرێ و بكرێ بەپێوەری ئەخلاقی تاك. 
ئەمە سەرباری ئەوەی كە ئەحلام بەمەبەستی خزمەت كردن بەرەوتی رۆژنامەگەری كوردی، هەر گۆڤار یان رۆژنامەیەك داوای نووسینی لێبكردایە، بەهەمان ستایل بۆی دەنووسین و قسەی خۆی هەبوو، تائەو رادەیەی كە نووسینی ئەحلام دەناسرێتەوە كەنە فلتەری هەیە و نەسانسۆڕ. بۆیە لەنێو ئەو بڵاوكراوانەدا جێگەی نەدەبووە وە كە هێڵی سوریان هەیە لەرووی سیاسی و كۆمەڵایەتیەوە. بۆ ئەمەش باجی خۆی دەدا كە بریتی بو لەدوور خستنەوەی لەچەند رۆژنامەیەك، بەڵام بەداخەوە فریای ئەوە نەكەوت ئەم یادەوەریانە بنووسێتەوە و من ناچار بكات بینووسمەوە. هەزار سڵاو لەگیانی ژنە یاخیەكەی كورد.

‌ 820 جار بینراوه‌
2/17/2018 10:45:35 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved