»  شۆک
 كۆمەڵەیەك بۆ ئاشناكردنەوەی گەنجان بە كتێب دادەمەزرێت
ئا / هاوار ستار

گەنجانی كەركوك لە خوێندنەوە دوور كەوتونەتەوە و كۆمەڵەیەك هەوڵدەدات گەنجان بە كتێب ئاشنا بكاتەوە، بۆ ئەو مەبەسەتەش لە 35 شار و شارۆچكەی هەرێم و دەرەوەی هەرێم ئەو كۆمەڵەیە راگەیەندراوە و ماوەیەكە بەردەوامن.
دوای ئەوەی هەست كرا گەنجان لە خوێندنەوە دابڕان و بەگشتی لە زۆر بواردا دوورە پەرێزن و پەراوێز خراون كۆمەڵەیەك بەناوی (كۆمەڵەی دۆستانی كتێب) راگەیەندرا و لە شاری كەركوكیش نوێنەرایەتیان كردەوە، هەر وەك خۆشیان دەڵێن "ئامانج لە دروستكردنی كۆمەڵەكە ئاشنا كردنەوەی خوێنەرە بەكتێب و تاوتوێكردنی كتێبەكانە لە تۆڕەكۆمەڵایەتییەكاندا چونكە هەستدەكرێت گەنجان دووركەوتونەتەوە لە خوێندنەوە و خۆیان بە شتی لاوەكی سەرقاڵ كردوە".
شامیر حەكیم وەكو گەنجێكی كەركوك و بۆ هەواڵ وتی: "دەبینی لە شاری كەركوكدا گەنجێكی زۆر لە خوێندنەوە دابڕاوە، ئەگەرچی خوێندنەوەی كتێب هۆكاری دروستكردنی تاكە هەر كۆمەڵگەیەك تاكی خوێنەری هەبوو ئەو كۆمەڵگەیە سەركەوتووە بەڵام بەداخەوە لای ئێمە لە دوركەوتنەوەن لە كتێب".
وتیشی: "هیوادارم گەنجانمان دەستبكەنەوە بەخوێندنەوە چونكە كتێبەكان سودمان پێدەگەیەنن لە ژیانی تایبەتی و كۆمەڵایەتی و ژیان بە گشتی".
ئەو گەنجە ئاماژەی بەوەشدا: "ئەو تەوژمە سیاسیە سەقەتەی لە ناوچەكە دەگوزەرێت هەروەها خەڵكی خۆهەڵاتی ناوەراست بەگشتی خەڵكێكی تەمەڵە و بە جەستە هیلاكین و حەزمان بە خوێندنەوە نییە، بەڵام نزیك بوونەوە لە كتێب زۆر هۆكارت بۆ چارەسەر دەكا".
محەمەد كاكەوەیس گەنجێكی تری كەركوكە و لەسەر نەخوێندنەوە وتی: "لە ناو كۆمەڵگە دواكەوتووەكاندا بێنرخترین شت كتێبە و ئەوەی بەبەهایە چەك و تەقەمەنییە"،
ئەو گەنجە باسی لەوەشكرد: "ئەگەر كەسێك لەم شارەی ئێمە و ئەم وڵاتە پارەیەكی زۆری هەبێت بیر لەوە ناكاتەوە بڕوات كتێب بكڕێت و شوێنێكی مەعریفی دانێت بەڵكو بیر لەوەدەكاتەو چۆن گرنگی بە جۆری چەك و تەقەمەنی بدات و خەڵكی لەناوبەرێت".
رێباز سەباح نوێنەری كۆمەڵەی دۆستانی كتێب بۆ هەواڵ وتی: "دوای ئەوەی بینیمان گەنجەكان لە خوێندنەوە دابڕاون و تۆڕەكۆمەڵایەتیەكان پڕبوون لە قسە و قسەڵۆك و بابەتی بێ بنەما و بیروڕای ناشیاو بەباشمان زانی لە كاتی دروستبوونی كۆمەڵەی دۆستانی كتێب نوێنەرایەتی كەركوك وەربگرین و كۆمەڵێك گەنج كۆبكەینەوە تا ئاشنایان بكەینەوە بە خوێندنەوە و بتوانن خۆیان رۆشنبیربكەن".
دەربارەی كۆمەڵەی دۆستانی كتێب وتی: "ئەم كۆمەڵەیە لە 35 شار و شارۆچكەی هەرێم ماوەیەكی كەمە دروستكراوە و نزیكەی 1000 خوێنەر لە هەردوو رەگەز كۆدەكاتەوە، لە شاری كەركوكیش كۆمەڵێك گەنجی خۆبەخش ئامادەییان دەربڕیوە لە یەكەمین كۆبوونەوەوە ئەندامانی كۆمەڵەكە بەشداربوون و رێكارەكانیان بۆ رونكراوەتەوە".
وتیشی: "ئامانجی سەرەكی ئێمە لە دروستكردنی كۆمەڵەیەكی وا بۆ ئەوەیە چۆن بتوانین پەرە بەخوێندنەوە بدەین و خوێندنەوە بە كلتور بكەین و هەوڵدەدەین زۆرترین كەس بهێنینە نێو ئەم كۆمەڵەیەوە تا خەڵك بەردەوامبێت لە خوێندنەوە و لە شتی لابەلا دووركەوێتەوە".نوێنەری كۆمەڵەی دۆستانی كتێب لە كەركوك رونیكردەوە: "دوو هەفتە جارێك لە ناوەندەوە كتێبێكمان بۆ دەستنیشان دەكرێ كەلە هەر 35 شوێنەكانی بوونی كۆمەڵەكە دەیخوێنینەوە لەماوەی دوو هەفتە و دواتر بە نوسین لەسەر ئەو كتێبە دەنوسین و لەتۆڕی كۆمەڵایەتی بڵاویدەكەینەوە تا بیرورای سەرجەم خوێنەرەكانمان لەسەر كتێبەكە وەربگیرێت".
باسی لەوەشكرد: "ساڵانە كە كۆرسی یەكەمی خوێندنەوە تەواو دەبێت 100 لە باشترین نوسینەكانی خوێنەرەكانمان كۆدەكەینەوە و دەیكەین بە كتێبێك و بەتیراژی 1000 دانە لەسەر ئەركی ناوەندی رۆشنبیری ئەندێشە چاپدەكرێت و بەخۆڕاییش دەدرێتەوە بەو كەسانەی لە كۆمەڵەكە نوسینیانی تێدایە و بەشداربوون".

‌ 871 جار بینراوه‌
2/17/2018 10:47:57 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved