»  شەکری تاڵ
موچە لەنێوان خەیاڵی موچەخۆران و گاڵتەجاری سیاسیەكاندا




موچەی فەرمانبەران، یاخوت قوتی ئەو كرێكارەی كە كار بۆ دەوڵەتدارێكی فاشیست دەكات، بۆتە ئەوكارتە كە هەر رۆژە سیاسیەك بەكاری دێنێت، بۆ ئەوەی هەستی خەڵكی بەشمەینەتی كوردی پێ بڕوشێنێت، ناوە ناوە وەك گاڵتە پێكردنێك لەسەر شاشەی تیڤیەكانەوە هاواری لێبكات، ئاخر كەی حەق دەست كراوەتە دیاری! لەچ سەردەمێكدا و لە چ كاتێكدا رویداوە مرۆڤ حەقی كارەكەی نەدرێت و بۆی پاشەكەوت بكرێت!
ئەمە نیەتی دزیە، نەك پاشەكەوت و خزمەت پێكردن، مرۆڤێك ژیانی گەیشتبێتە قۆناغی وێران بوون، پاشەكەوت چ مانایەكی هەیە؟ ئەوە ئامانجی لەناوبردنی گەلێكە كەسەرەتا لە شكاندنی شكۆكەیەوە دەست پیدەكات و لە كۆتایشدا بە لەناوبردنی جەستەی كۆتای دێت، وەك دەبینین رۆژانە لێرەو لەوێ خەڵك خۆیان دەكوژن.
دەستەڵاتدارانی هەرێم بۆ ئەوەی خەڵك بیریان بخەنە سەر موچەو بە دوومانگ جارێك روبعێك موچەیان پێبدەن، ئەوانیش بۆخۆیان لە دونیای رەفاهیەت ژیان بگوزەرێنن، خەڵكی ئەم هەرێمەیان خزاندۆتە گۆشەیەك كەتەنیا خەیاڵ پڵاوەكانیان لەسەر روبعێك موچە هەڵچنن، هەندێكیان بەخەیاڵی كرینی دیاری بۆ مناڵەكان و هەندێكیتریان خستۆتە خەیاڵی كردنی برێك دەرمان و بەشێكیشیان خستۆتە پیدانی كرێ خانوو، هەموو فەرمانبەران لە خەیاڵیكدا شەوانە سەردەخەنە سەر سەرین و بەیانیش لە گەڵ خیاڵێكیتردا رۆژ دەكەنەوە، بەڵام هەركاتێك روبعە موچە گەیشت هیچ لەم خەیاڵانە چرۆناكەن و هیچ ئامانجێكیان چەكەرە ناكات.
لەولاشەوە سیاسیە دۆراوەكان خەریكی گاڵتەكردنن بەهەستی خەڵكی ئەم هەرێمە، ئەوگاڵتەجاڕیەی هەرچی دووژمنی گەلەكەمانە بەو هەموو كۆمەڵكوژیەی بەرانبەر بەگەلەكەمان لەهەموو كوردستان دەیكەن، نەك سەرنەكەوتون بەڵكو شكستیشیان هێناوە لە كارەكانیاندا، بەڵام لەباشوری كوردستان بەهۆی ئەوانەی خۆیان نوساندوە بە كورسی دەستەڵات، دواجاریش بەخۆیان نەوەستان بەڵكو هاوپیشەیەكی وەك خۆیان بۆ شكاندنی تاكی كورد و بێئومید كردنی یەكجارەكی خەڵكی هەرێمیان هێناوتە ناو ئەو یارە كارەسات بارە ئەویش عەبادیە.
عەبادی نزیكە دوومانگە هەموو هەفتەیەك كارتی موچە رەدەكێشێت و قسەی لەسەر دەكات، دەیەوێت لەرێگای پێدانی كارتی موچە فەرمانبەران گاڵتە بەخودی تاكی كوردبكات، شكۆی تاكی كورد بشكێنێت و بەتەواوی هێزو توانا لە كەسایەتی تاكی كورد ببرێت، ئەوكات بەئارەزووی خۆی چی بوێت بیكات ئەوە لەلایەك، لەلایەكیتر نایەوێت جارێكیتر وەك هاوپیشەكانی جەعفەری و مالیكی بەدەستی كوردەوە توشی شكانبێت، ئێستا عەبادی كارتی موچە وەك دواكارت بەكاردەهێنێت بۆئەوەی سیاسیەكانی كورد نەتوانن دەست بۆ كورسی ژێری ببەن، بەپێدانی راستەو خۆی موچە بەفەرمانبەران ئەوا یەكسەر دەسەڵاتدارانی هەرێم پشتاو دەبن و لەحكومەتەوە دەبن بە كۆمپانیایەك كەهیچ شتێكیان لەدەستدا نامێنێت و دەبێت خۆیان خۆیان بژێنن.
ئەگەر پارەش رادەستیان بكرێت دەبێت پێش هەمووشتێ بیر لە كورسی ژێر عەبادی نەكەنەوە، هەروەها ئەگەر موچەش بەم پاشەكەوتە بدەن دەبێت هەموو سازشێك بۆ عەبادی بكەن، سەرەرای ئەوەی كۆڵێك قەرزیان خستۆتە سەر میللەت، بەڵام ئێستا بەرپرسانی ئەم هەرێمە دەیانەوێت عەبادی موچە نەنێرێت بۆ ئەوەی گەلەكەمان لەژێر هەژاریدا بمێنێتەوە و بیكەن بەكۆیلە، هەموو دەرگاكان دادەخەن و هەموو تەنەزولێك بۆ عەبادی دەكەن، بۆ ئەوەی عەبادی موچەنەنیریت، بشنێرێت پەیوەندی بە چۆنیەتی دابەشكردنیەوە نەبێت، لەكاتێكدا پێموایە عەبادی یەك دینار نانیرێت.
ئێوە كەهێندە بچوكن، لەئاست دوژمنانی گەلەكەماندا، لەبەردەم گەلەكەمانیشدا یەك زەرە وجودتان نەماوە، خەڵك بەچاوی مافیاوە تەماشاتان دەكات، ئێوە خۆتان نیشان دەدەن كە گەورەی ئەم میللەتەن، بەیەك هەڵوێست نەتانتوانیوە خۆتان گەورە نیشاندەن، بەڵكو هەمیشە وەك چۆن بەرەزیلی و بچوكی لەدەرگای دوژمن كەوتون، بەو ئەندازەیە زیاتریش لە چاوی خەڵكدا رەزیل و بچوكن.
ئێوە ئێستا رووی رەزیلی گەلەكەمانن لە تەواوی جیهان، رووی نابوتین و ئێوە لەبری ئاسودەی، نەهەماتی بۆ ئەم گەلە هێناوە، لەبری خۆشگوزەرانی شەڕ و كوشتارتان كردە دیاری، لەبری ئاوەدانیش شیرازەی كۆمەڵگەتان لێكهەڵوەشاندەوە، كەس متانەی پێتان نیە، خۆشتان باوەر بەخۆتان ناكەن.
بۆ جارێكیش ئێوەمان نەبینی قسەیەكی خێر بكەن و رێكەوتنێكتان لەبەرژەوەندی میللەت كردبێت و بەرهەمەكەیمان بینیبێت، ئەوەی كردوتانە لەپێناوی خۆتان بووە، بۆ بەرژەوەندی دوژمنان. ئەوەی ئێستا ئێوە دەیكەن گاڵتەجاریەكی ئاشكرایە بەخەڵكی موچەخۆر و تەواوی گەلی كورد، ئێوە لە پێناو ئەوەی خۆتان بەگەورە نیشانی ئێمە بدەن، هەموو كەرتەكانی ژیانتان لەم هەرێمە پەكخست و خەڵكتان بەلێشاو كرد بەمووچە خۆر، ئێوە بۆخۆشگوزەرانی ئەوەتان نەكرد، بۆ ئەوەتانبوو كە گەل بەمڕۆ بگەییەنن، تا بچوكی خۆتان گەورە دەرخەن گاڵتە بە هەستی گەلەكەتان بكەن، بەڵام ئێوە بەم گاڵتەكردنە نەك هەربچوك دیارن رووی رەزیلیشتان نیشانی خەڵك و جیهانیشدا.
 ئیمزا
ئامانج هەرتەلی


‌ 913 جار بینراوه‌
2/17/2018 10:54:14 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved