»  پەڕەموچ
ئاقارێكی رووتەن
عارف كوردە



 
لەم بییابانە رووتەنەدا
دەبم بەو ئەسرینانەی
هۆن.. هۆن
لەنێوان بژۆڵەكانتەوە
دێنە خوارێ و
لە شوێن دڵۆپەكاندا
چڵە نێرگز دەڕوێنم و
هاڵاوی ئەوین،
بۆن دەكەم و
خۆم بە ئازارەكانتەوە
شۆڕدەكەمەوە..
حەزدەكەم دیلانێ بكەم و
تۆش بە هەناسەكانت،
پاڵم پێوە بنیی..،
منیش لە خۆشیاندا
شاگەشكە دەبم و
دەفڕمە ئەو ئاسمانەی
عەیامێكە..
لە منداڵدانی ئەندێشەمدا
نەخشەم بۆی كێشاوەو
كەوێڵە چكۆڵانەكەم
تەفروتوونا دەكەم و
كۆشكێكی ئەفسووناوی
لە خەیاڵمدا بونیاد دەنێم
چونكە..
لە ساپیتەی ژورێكی
شەقڵە شكاوو نووتەكدا 
وەڕس بووم و
خەریكە جەستەم،
كرمۆڵە دەبێ و
لە جێگەی خۆمدا
دەبمەوە بە خۆراكی
خاكێكی بێ پێزوو
درەختی خواروخێچم،
لێ دەروێ..
ئەوە دەبێتەوە
بە تراویلكەی بیابان و
لە دووی رادەكەم و
نایگەمێ..!
ئەو ژانی لێدەچۆڕی و
هەرچی دەكەم 
ناتوانم هێوری بكەمەوە
بە ناچاری،
سەری خۆم دەكێشم
بە دیواری دەستەوسانیداو
تێكەڵ..،
بە حەسرەتەكانم دەبمەوەو
خۆزگەكانم دەژمێرم
تابتوانم..
لە دوندی خەونەكانم
گەمێكەم لەنگەر بگرێ و
دەمەوێ بگەڕێمەوە،
بۆ نیشتیمان..
ئەو نیشتیمانە سووتماكەی
تەژیە.. لە روتەنی و
لە تابلۆی ڕەنگاوڕەنگ و
لە هەوری قێزەوەن و
لە چەتەی مۆدێرنەو
لەو زامانەی، 
هەموو ڕۆژێ قووڵتر دەبنەوەو
كونجێك بۆ خۆشەویستی
لەنێو خەیاڵە، 
پچڕپچرەكانیش ناهێڵنەوە
لەم نیشتیمانە، ڕەنگ پەڕیوەی
لە دەردە دارێكی
بەلەسیسە دەچێ و
هیچ حەكیمێك پەی پێنابات
مەرگ بۆتە حەزیایەك و
دەمی داپچڕیوەو
لە بۆسەدایە.. هەڵیلوشێ.

‌ 822 جار بینراوه‌
2/24/2018 7:33:23 PM
Print Friendly and PDF
بابەتی زیاتر ...
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved