»  پەڕەموچ
كورتە چیرۆك
عەبدولڕەحیم سەرەڕۆ


گفتوگۆ
لە كونجێكی قەفەسەكەوە وەك یاخیبوویەك رووی تێكردو پێی وت: زۆر هەراسانم، خەریكە بۆ نیو كاژمێر فڕین بە ئاسمانی شین و بەرفراوانا شێت و هار دەبم، شەوان خەون بە ئامێزی پەڵە هەورە سپیەكانەوە دەبینم، لە بەرزترین سەرچڵی سپیندارێكەوە دەڕوانمە بریسكەی زیوینی كانیلەكان و زۆر تامەزرۆی راچڵەكینێكم بەدەم هەڵكردنی تۆزو خۆڵی گەردوگوڵەوە، تۆیەك كە لە میوەجاتەكان خواردنیان دەزانیت، من دەمبینی چۆن لە باوەشی هەتاودا گەورەدەبن و لەلانكەی مانگەشەودا دەنوون، منت لە ناوەوەی ئەم قەفەسەو خۆت لەدەرەوە بە مەبەستی چاودێریكردنم بەستاوەتەوە، بۆ ئازادم ناكەیت؟! 
ئەویش پێی وت: گەر فڕینم بزانیایە.. دەمێك بوو دەرگای قەفەسەكەم بۆت كردبووەوە.
ــ ئەی بۆ فێری فڕین نابیت؟
بزەیەكی سەتیری بۆ كردو پێی وت
ــ چونكە زۆر لەو چارەنووسە دەترسم.. كە تۆ دووچاری بوویتە !!

تەنیایی
ئەو رۆژە لە ترسی ئەگەری شەڕە گەورەكە، هەرچی مرۆڤەكانە بە خاوخێزانەوە بەرەو ستارگەو بۆ هەسارەیەكی تر هەڵدەهاتن، ئاژانسە ستارگەییەكان لەبەر زۆری هەڵاتووان وەبەر نەدەكەوتن، هێز لە گۆی زەوی كشایەوەو ترسەكە گەورەتربوو، بەتەنها من و ئەو لەسەر زەوی مابووینەوە، تەنیایی تا دەهات زیاتر تەنگی پێ هەڵدەچنین و هەراسانی دەكردین، تەنیایی ئەو حاڵەتەیە كە تێكرای زەویت لێ دەكات بە بەندینخانەیەكی گەورەو ئەوسا خۆت زیندانیەكی یاخی و هەر خۆت پاسەوانێكی ئامادەباش و حەپەساویت، شتێك نییە لێی بترسیت جگە لە خودی تەنیایی.
لە قووڵایی لێكدانەوەیەكی زۆر سەیردا بووم و رووی تێكردم و بە چپەیەك پێی وتم: ئازیزەكەم.. هەست ناكەیت سزاكەی باوكە ئادەم و دایكە حەوا زۆر لە تاوانەكەیان گەورەتر بووە!!

رۆژانە هەواڵ 
بەیانی زوو لەخەو رابوو، وەك هەموو رۆژانێك بێ یەك و دوو دەستی بردو رادیۆكەی هەڵكرد، دوای پارچە موزیكێكی كورتبڕ كورتەی هەواڵەكان خوێندرایەوە: ئەوەی جێی سەرسامی بوو.. بێژەرەكە وتی: 
حكومەت و پەرلەمان و دادگای باڵاو سەركردایەتی وڵات بەتێكرای دەنگ بڕیاریان داوە هەركەسێك بە ماسك سەرو روخساری خۆی بشارێتەوە، دووچاری سزای دارایی و غەرامەو زیندانیكردن دەبێتەوە، چونكە ئێمە دوروویی دەكەینە مۆدیل و هەموو كەسێك بۆی هەیە پیادەی بكات، بۆیە كەس بۆی نییە ماسك بە روخسارییەوە بكات!!
سپاردە 
بە هەناسە ساردییەوە لەسەر تەختەی نەخۆشخانەكە راكشابوو، هەموو نەوەكانی دەوریان دابوو، یەكێكیان بە سۆزێكەوە پێی وت: باپیرە چیمان پێ دەكرێت بۆتی راپەڕێنین؟ 
ئاوری لێدایەوەو وتی: سەروپێیەكی جوانم بۆ بهێنن با تێر بەدڵی خۆم نان بخۆم.. 
یەكێكیان وتی: باپیرە ئەوە هەرگیز نابێت.. تەمەنت یارمەتیدەر نییەو خۆشت دەزانیت دكتۆر لێی قەدەغە كردووی.
وتی: كەوابوو.. دەی گەنجیم بۆ بگێڕنەوە.. شەرتە دیسانەوە خزمەتی ئاڵا بكەم
 وتیان: باپیرە شتێك بڵێ لە تواناماندا هەبێت بۆتی بكەین و دەبێت عەقڵیش قبووڵی بكات..
بزەخەنەیەكی پڕ لە هیستیریا روخسای داپۆشی و وتی: 
كەواتە بڕۆن پاچ و خاكەناز بەرن و قەبرەكەم بۆ ئامادەبكەن. 

دۆنادۆن
بەر لەم ژیانە دارتوویەكی زۆر باڵاو نازداربووم، گەڵاكانم لە نەرمیدا لەبەر هەتاو دەبریسكانەوە، پڕبووم لە كرمی ئاوریشم، رەنگاڵەكان بە بۆنەو بێ بۆنە لەسەر لق و پۆپەكانم دەنیشتنەوەو دەهاتنە میوانیم و خۆیان وەك دلسۆزترین بوونەوەر پیشاندەدا. 
ئێستا كە گەڵاكانم هەڵوەرین و كرمە ئاوریشمەكانیش تەواوبوون.. تاكە فڕندەیەك پەنابەری سەركزی سەرلقێكی چەماوەمە، ئەویش بە دەستی منداڵێكی چەتوونەوە پەڕوباڵ كراوە.
شاجوان
كە خەڵاتەكەیان پێ بەخشی.. بزەخەنەیەكی سارد روخساری داپۆشی و بە دەستێكی نەرمەسڵاوی لە میوانەكان دەكرد بۆ ئەوەی گوێی زیاتر پڕبكەن لە چەپڵەیەك كە شایستەی نییە....
كە میدیاكارەكان پرسیاریان لێكرد، لە بەردەمی كامێراكە دەمی كەوتە تەتەڵەو بە لێوێكی لەرزۆكەوە وتی: داوای لێبوردنتان لێدەكەم ناتوانم وەڵامتان بدەمەوە.
لەناو ئۆتۆمبیلەكەوە بە ماسینجەر یەك دێر سوپاسگوزاری پڕ لە هەڵەی رێنووس و كەموكوڕی ئاراستەی ئەو كەسە كرد كە بە یەكەم دەریچواند. دوای جینگەیەك لە مۆبایلەكەی وەڵامێكی لەباربەری خوێندەوە:" مەیموون.. تۆ لەمەولا كۆیلەی ئێمەیت، چۆنمان بوێت بەكارت دەهێنین، سبەی ئێوارە بانگهێشتكراوی ئاهەنگیت و تا رۆژ دەكرێتەوە گەڕانەوە بۆ ماڵەوە نییە..".

‌ 920 جار بینراوه‌
2/24/2018 7:34:37 PM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved