»  باران
شكاندنەوەی ناوەختەی ژنانی كورد .. چی لەپشتەوەیە؟!
عەبدولڕەحیم سەرەڕۆ



لەمساتەوەختە ناهەموارەدا دەبینین ژنانی كورد گەورەترین داستانی قارەمانێتی لە كۆبانێ و مەنبەج و حەسەكەو كوردستانی باكوور تۆماردەكەن و ئێستا لە ئەفرین نەخشەی ئاگرین دژی گەورەترین گەلەكۆمەی ناوچەیی و هەرێمایەتی دادەرێژن و بوونەتە سیمبولی بزووتنەوەی رزگاریخوازی كوردو كوردستان، هاوكات مینبەرە شۆفینیەكان و مەلا خەتێكان بەناوی خواو بەندەكانیەوە دوعای سەركەوتن بۆ سوڵتانی خوێنرێژەكان دەكەن بەسەر گەلی كوردی قارەمان كە لەناو خاكی خۆیان لە لایەن تەربوش سورەكانەوە هێرشیان دەكرێتە سەرو ژنانی رۆژاڤا بەرگری دەكەن و لە بەرامبەردا پیاوانی ئێمە بە رێكەوتنی ژێربەژێر هەموو خەون و دەسكەوت و ئاواتەكانمان بە تاڵان دەفرۆشن.. 
ئەوەی بۆتە هۆی سەرسامیم.. ماوەیەكە لەلایەن هەندێك میدیاوە پروپاگەندەی لەشفرۆشی بۆ ژنانی كورد دەكەن، لەشفرۆشی هێندەی سەرهەڵدانی مرۆڤ لەسەر رووی زەوی دێرینەو تا ئێستا بەو هەموو ئایین و ریتمی كۆمەڵایەتی و سیستم و حكومڕانیەكانەوە لە جیهاندا بوونی هەیەو لە سكولاریترین حوكمرانەوە تا ئاینیترینیان نەیانتوانیوە پێشی لێبگرن نەك بنبڕی بكەن، خێرە لەم كاتە هەستیارەدا بۆتە بابەت و كاری میدیایی لەسەر دەكرێت؟!
ئەوە كێیە لەم سەدەی بیست و یەكەمەدا لە دۆنی یوسف و پاكیزەیی مریەمەوە باس لە چەند ژنێك دەكات كە قوربانی دەستی كۆمەڵگەن و تووشی گوومرایی نەریتی هاتوون، ئەی كام پیاو و كام ژنەیە خەریتەی رۆحیی فریشتەی بەستووەو لەبەردەم ورووژێنەرەكاندا هەستی نابزوێ.. مەگەر بیركوڵ و كەماوەزبێت، پیاو و ژن چوونیەك حەزیان بۆ بوونی ئەوی تر دەجوڵێت و ئەوەی رێگریمان لێ دەكات هەندێك یاساو كۆمەڵێك نەریتە ئێمەی لە زۆر شتدا بە سێكسیشەوە لە قاڵبی مرۆییدا هێشتۆتەوە. تاوان  هاوچەشنی جەستە لە هەموو بوارەكاندا بوونی هەیەو هیچ مرۆڤێك نییە كەم تا زۆر هەڵەی نەكردبێت و پێی نەخزابێتە كارێكی نەخوازراو، جا چ پێویست دەكات لەم كاتە هەستیارەی هەموو جیهان بە سەرسوڕمانەوە بۆ ئازایەتی و بەرخودانی ژنانی كورد دەڕوانن میدیاكانمان بێن و بابەتێكی لەو شێوەیە بورووژێنن لە كاتێكدا دوژمنانی كورد بۆ كەلێنێك دەگەڕێن تا هێرشێكی مەعنەویمان بەسەردا بكەن و لە رێی شوێنكەوتە ساویلكەكانیانەوە رای گشتی بەلای خۆیاندا رابكێشن و گورزێكی كوشندەی تر لە كەمەری مەسەلە پیرۆزەكەمان بسرەوێنن. 
ئەوەی درزێك یان كەلێنێك بۆ بەرامبەرەكەی بدۆزێتەوەو رێگەی بۆ خۆشبكات بۆ ئەوەی هێرشی بكرێتە سەر گەورەترین گەمژەیە، جا ئەگەر گەمژەیی نەبوو ئەوە خیانەتە، رێگەخۆشكردنیش بۆ دوژمن بە هەر پاساوێك بێت خۆی لە خۆیدا خیانەتكارییە، كەی ئێستا كاتی ئەوەیە تۆ لە میدیاكاندا باسی لەشفرۆشی بكەیت لە كوردستاندا لە كاتێكدا بە سەدان ژنی بەشەڕەفی كورد لەبازاڕی نەخاسەكاندا چارەنووسیان نادیارە، یان لەناو خاكی خۆیان شەهید دەكرێن و لەلایەن داگیركەرانەوە جەستەیان دەشێوێندرێت؟! ئەی بۆ باسی ئەو هەموو كچ و ژنە شەرڤانانە ناكرێت كە لەكاتی هیمەتا سنگیان كردۆتە قەڵغان و بەرگری لە نامووس و خاك و بیروباوەڕی خۆیان دەكەن، ئەگەر مەسەلەكە دەستی ئەنقەستی لایەكی تیا نەبێت و مەرامی گڵاویان شكاندنی هەیبەتی ژنانی كورد نەبێت كە ئێستا هەموو میدیاكانی جیهان شانازییان پێوەدەكەن و بە قارەمانی مێژووییان لە قەڵەم دەدەن.. دەبێ ئەم هەنگاوە قێزەونە چ ئامانجێكی پیرۆزی لە پشتەوە بێت؟! ئەمە كام ئاغاو كام ئابێ بوو پێی وتن بڕۆن راوەقەحپە بكەن و لە میدیا كوردییەكانی خۆتانا بڵاویبكەنەوە؟! لە كاتێكدا ژنانی ئێمە بە مەبەستی گەیشتن بە ئازادی وەك شێر لە بێشەوە راپەڕیون و دڵی دوژمنانیان هێناوەتە لەرزە.. ژنە موعتادو لەشفرۆشەكانی ئەوان وەك پێڵاو لە جامخانەكاندا بۆ سەوەكاری ریزكراون، جا ئەو كەسە كەسە ئەلفێكی بەسە!!

‌ 577 جار بینراوه‌
3/10/2018 10:45:08 AM
Print Friendly and PDF
بابەتی زیاتر ...
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved