»  راپۆرت
ژینگەی كەركوك لە بەردەم مەترسیدایە
ئا / هاوار ستار



رێكخراوێكی ژینگەیی : بەڵگەمان لایە هەندێك كۆمپانیاو نەخۆشخانە پێشێلكاری پاراستنی ژینگەیی دەكەن


ژینگەی كەركوك تا دێت مەترسیدارتر دەبێت و رێگرتن لەو مەترسیانەش سستن و وەكو پێویست نین لە لایەن ئیدارەی شارو حكومەتەوە، بەوتەی ژینگەپارێزان ئاو و هەوا و خاكی كەركوك لە بەردەم مەترسی پیسبوونی ژینگەییدایەو ئەوەش بە هۆی پشتگوێخستن و پەراوێزخستنی لە لایەن سەرجەم چینوتوێژەكانی شارەكەوەیە بە پلەی یەك و دواتریش حكومەت كۆمپانیاكان.

هەڵۆ غازی بەرپرسی رێكخراوی دووبز بۆ ژینگە بۆ (هەواڵ) وتی: "ژینگەی كەركوك لە بەردەم مەترسیدایە ئەوەش بە هۆی چەند هۆكارێكەوەیە كە پشتگوێخراون لەوانە كەڵەكەبوونی خاشاك و زیادبوونی كارگەو كۆمپانیاكان بە تایبەت هی بەرهەمە نەوتیەكان و بوونی ئۆتۆمبیلێكی زۆرو مۆدێل كۆن و كەمی رێژەی سەوزایی و نەبوونی هەستی خۆشەویستی خەڵك بۆ ژینگەی شار هۆكارگەلێكی زۆرن بۆ زیادبوونی مەترسیەكانی ژینگە لەكەركوكدا".
هەروەها وتی: "ئێمە وەكو رێكخراوێكی لۆكاڵی مۆڵەتی فەرمیمان لە وەزارەتی ژینگەی عێراقەوە هەیەو ئامانجانە دەستكەینەوە بەكاری گرنگ بۆ كەركوك لەوانەش بەبەڵگەوە لامانەو دەیگەیەنین كە هەندێك كۆمپانیاو نەخۆشخانە هەن پێشێلكاری پاراستنی ژینگەیی دەكەن و ئاو و هەوای كەركوك پیس دەكەن".
بەرپرسی رێكخراوی دووبز وتیشی: "دەبێت خەڵكی هوشیار بكرێنەوەو دەست بكرێت بە چاندنی نەمام و ئەنجامدانی پشتێنەی سەوزایی، بۆ ئەم مەبەستەش لە هەوڵی ئەوەین ئیمزا لە شار كۆبكەینەوە و بیگەیەنین بە حكومەت تا كارێك بۆ ژینگەی كەركوك بكرێت و بەم دواییەش دەبینین خاشاك لەشار تەشەنەی كردووە هەوڵی ئەوەدەدەین بە زووترین كات حكومەت كۆمپانیای تر بێنێت بۆ پاراستنی خاوێنی شارو كەمكردنەوەی مەترسی تەندروستی لەسەر خەڵكی".
لای خۆشییەوە، شكۆفە ساڵەیی ئەندامی رێكخراوی كۆمەڵەی كوردستانێكی سەوز لە كەركوك وتی: "پێویستە سەرجەم رێكخراوە مرۆییەكان هەڵوەستە لەسەر خراپ بوونی ژینگەی كەركوك بكەن، چونكە ئەمە پەیوەندی تەنها بە ژینگەوە نییە، بەڵكو پەیوەندی لەسەر ژیانی خەڵكیشە بە گشتی و وابەستەیە بە تەندروستی كۆمەڵانی خەڵك".
شكۆفە ساڵەیی ئاماژەی بەوەشدا: "چەند رێكخراوێك لەم رۆژانە لە كۆبوونەوە و هەوڵی بەردەوامن لەوانە رێكخراوی رێنمایی دەروونی لە كەركوك و كۆمەڵەی كوردستانێكی سەوز و بەخشینی گەنجان  ئەم چەند رێكخراوە و رێكخراوی تریش لە هەوڵی ئەوەداین كار بۆ كەمكردنەوەی مەترسی ژینگەیی بكەین وەكو سەرەتایەكیش لە رێنوێنی دەرونییەوە دەستپێدەكەین، چونكە گرنگە تاكیش دەروونی ئارامبكرێتەوە تا گرنگی بە لایەنی تەندروستی و ژینگەیش بدات".
بەوتەی شكۆفە لەم ساڵانەی دواییدا گرنگی بە لایەنی ژینگەیی و تەندروستی خەڵك نەدراوەو لە ئێستادا مەترسی دەركەوتنەوەی چەند نەخۆشییەكی كوشندە دەكرێت: "بەداخەوە پێشتر چۆن گرنگی بە لایەنی پرۆژە بیناسازی و ئاو و ئاوەڕۆ شتەكانی تر دراوە كەمتر گرنگی بە لایەنی ژنگە دراوە، هەروەها كۆمپانیاكان بەهۆی نەبوونی چاودێری تۆكمەوە زۆربۆن و بێ سەرو بەرە كاردەكەن و لە دوای شانزەی ئۆكتۆبەرەوە دەسەڵاتێكی بێسەروبەرە هەیە كە گوێ لەكەس راناگیرێت".
خالد ئەحمەد بەڕێوبەری فەرمانگەی ژینگەی كەركوك بۆ (هەواڵ) رونیكردەوە: "ماوەی چەند رۆژێكە فەرمانگەو بەڕێوبەرایەتیەكانی ژینگەیی و خزمەتگوزاری لە كەركوك لە كۆبوونەوەین و بڕیارە كاری جدی بۆ پاراستنی ژینگەو تەندروستی خەڵكی ئەنجام بدەین، وەكو هەوڵی كاتیش داوا لە سەرجەم فەرمانگە و بەرێوبەرایەتیەكان دەكرێت لە رێی كارمەندەكانیانەوە بۆ ماوەی مانگێك بە هاوكاری رێكخراو و چینوتوێژەكانی شار دەست بكرێت بە پاكردنەوەی بەرفراوان".
هەروەها وتی: "سەبارەت بە زۆری كۆمپانیاو بەنزینخانەو ئۆتۆمبێلی ژینگە پیسكەر بە هەوڵی هەموولا لە ئایندە هەوڵدەدەین و كردوشمانە كە سەرپێچی كاران بە پێی پشكنین و رونبوونەوە لە سەرپێچیەكەی ئاگاداریان دەكەینەوە و سزایان دەدەین بێ جیاوازی، چونكە دروستكردنی مەترسی بۆ سەر ژینگەو ژیانی خەڵكی تاوانە و دەبێت بەری پێ بگیرێت".










‌ 638 جار بینراوه‌
3/17/2018 8:19:35 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved