»  شەکری تاڵ
كۆیلەی ئەلیكترۆنی و دەروێشانی ماڵپەڕەكان كێن؟


 

پێویست ناكات لەم بابەتە كورتە پێناسەی تەواوی كۆیلایەتی بكەم بەوەی كەسێك دەبێتە بەندەی بێ بڕستی كەسێكی ترو دەكەوێتە ژێر ركێف و فەرمانەكانیەوە، بەڵام لەگەڵ گۆڕانكارییەكانی دونیا كە مێژوویەكی دێرینی هەیە كۆیلایەتیش لە هەر سەردەمێكدا جۆرێك لە بەرگ و ماسكی تایبەت بە خۆی دەپۆشێت، لێرەداو لەم سەردەمەی ئێستامان سەیرترینی جۆرەكانی كۆیلەكان كۆیلەی ئەلیكترۆنین كە زۆر كات میوانێكی نەخوازراوی سەر شاشەی ماڵپەڕەكانن، ئاخۆ دەبێت ئەمانە كێ بن؟ 
ئەوانەی بەناوی دڵسۆزان و لایەنگران یان خۆشەویستانی كاك فڵان و هەوادارانی فڵانەخانەوە لە فەیسبوك لەژێر ماسكێكی درۆینەدا خۆیان كردۆتە مەسخەرەو وا دەزانن دەتوانن بە رۆژی رووناك خەڵكی فریو بدەن و نازانن هەموو دونیا دەزانێت چ نەخۆشییەكی سەختی “هەستكردن بە خۆكەمزانی” تا ئاستی بێزلێكردنەوە گەمارۆی خودی نەویان داون، ئەوانەی شەش رۆژ لە هەفتەیەكدا لەسەر شۆستەكانی دووسایدی چیمەن و باباگورگورو چوار دەوری شار دەخۆنەوەو بەیانی هەینی یەك (جمعە مباركە)یەك دەكێشن بەناوچەوانی پەیجەكانماندا، ئەوانەی لە هەموو بۆنە ئاینی و نەتەوەیی و رۆژانی ژنان و منداڵان و مامۆستایان و هتد هەر دەزانن پیرۆزبایی بنووسن و نە خوێندنەوەیەكیان بۆ بۆنەكان هەیەو نە خۆشیان دەزانن چی دەكەن و چی ناكەن!!    
هەن (24) كاتژمێر لە شەورۆژێكدا سەرقاڵی كۆكردنەوەی زانیاری و سیخوڕیكردنن بەسەر ئەم و ئەوەوە، لە لایەن گەورەكانیانەوە رادەسپێردرێن هەر بە تەنها بۆ ئەوەی ئافەرینێك وەرگرن و دواجار بتوانن كلك بۆ پاروویەكی چەور بابدەن، هەندێكی تریش بەوپەڕی رووقایمیەوە خەریكی پۆڵیشكردن و ماكیاژكردنی روخساری ناشرینی ئەو دەسەڵات و حیزبانەن كە چاوپۆشی لە كەموكوڕیەكانیان دەكەن چونكە لەو كارە بترازێت هیچ پیشەو دەسترەنگینیەكیان نییە تا بتوانن شەرەفمەندانە نانی پێ پەیدا بكەن، پۆلێكی تری نوێی كۆیلەی ئەلیكترۆنی كە تازە بابەت نین بەڵام لە كەمەوە بەرەو زۆر تەشەنە دەكەن ئەوانەن وەك دەهۆڵ دەنگیان زل و ناوو ناوەڕۆكیان بۆش و بەتاڵە هەر بۆ ئەوەی بە خۆیان و دەوروبەرەكانیان بڵێن ئەوەتاین ئێمەش هەین بەناوی ناڕازیبوون لە دۆخەكە بە ئاشكرا لە ماڵپەڕەكان و لەسەر پەیجەكان بوونەتەجاشی بیست و چوار عەیارەی دوژمنانی گەل و كاسەلێسی بێ هاوتای نەیاران، هەندێكی تریش دوای هەرچی درۆو دەلەسەی حیزبەكەیانە ئاشكرابووەو كەوتوونەتە بەر تانەو تەشەری هەموو كۆمەڵانی خەڵك كەچی پێیان وایە ئاسۆی گەندەڵی حیزبەكەیان هێشتا هەر روونە.
ئەوەی زیاتر سەخڵەتی كردووین كۆیلەكانی گرووپی (هات هات)ـە بێ تام و بێ لەزەتەكەیە كە بە درۆو تەفرەو دەسیسەی لەخۆیان باڵاترو بە فیتی ئاغاكانیان شەو نییە خەڵكە پاك و دڵسافەكەی كەركوك نەتۆقێنن، جا ئێستا وای لێهاتووە گەر ئاگر لە شارەكە بەربێت كەس باوەڕیان پێ ناكات. 
لە روویەكی ترەوە هەندێك سمێڵ بابڕی سەتیرو كاڵفام هەن خۆیان لێبۆتە بێوەژن و لێوانلێون لە نامەی  سێكسی هەر بۆ ئەوەی خاڵێكی لاواز لەسەر شەرەفمەندێك بگرن و سوكایەتی پێ بكەن، جۆرێكی تری كۆیلەی ئەلیكترۆنی هەن خەڵكانێكی دڵساف و نەگبەتن چونكە تا رەگەزی بەرامبەر وەستابێت یەك لایك و كۆمێنت بۆ رەگەزی خۆیان نانووسن چونكە لە قانوونی ئەو جۆرە كۆیلایەتییە ئەوە حەرام و رێگە پێنەدراوە، سەیرە بەم هەموو كۆیلەیەوە داوای كوردستانێكی ئازاد و دەوڵەتێكی سەربەخۆمان دەكرد!!
 
ئیمزا
عەبدولڕەحیم سەرەڕۆ 


‌ 1216 جار بینراوه‌
3/17/2018 8:46:58 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved