»  باران
نەبوونی مۆڵەتی بەغدا كاری رێكخراوەكانی ژنان لە كەركوك پەكدەخات





بەشێك لە رێكخراوەكانی ژنان لە كەركوك بە هۆی نەبوونی مۆڵەتی فەرمی عێراق كارەكانیان وەستاون بەو هۆیەش كار و چالاكی ژنان لە كەركوك سست بوون و وەكو پێشو و پێویست چالاكی و كاركردن لەسەر كەیسەكانی ژنان بەردەوام نین.

لاوە زەنگەنە بەرپرسی رێكخراوی یەكێتی ژنانی كوردستان بۆ هەواڵ وتی: “بەهۆی ئەوەی رێكخراوەكەمان لە ئێستادا مۆڵەتی فەرمی حكومەتیی عێراقیی نییە و دانپێدانراو نییە لە كەركوك بە ئاشكرا بارەگا و چالاكیمان نەماوە و ناتوانین كارەكان راپەڕێنین".
هەروەها وتی: “پێشتر كاری رێكخراوەیی و چڕو پڕمان ئەنجامدەدا و كەیس و كێشەمان دەگرتە خۆ و چارەسەرمان دەكردن و لە بۆنە و یادەكاندا بەشداری جدییمان دەبوو بەڵام ئێستا ئەو هەوڵانە ئەگەر مابێتیش بوونەتە هەوڵی كەسیی و لە ماڵەكانی خۆماندا كاردەكەین و هاوكاری ژنان و هەوڵدان بۆ دەستەبەركردنی مافەكانیان دەدەین”.
وتیشی: “هەر بەهۆی نەبوونی مۆڵەتەوە بووە كە نەمان توانیوە لە یادی هەفتەی تەرخانكراو بۆ رۆژی جیهانی ژنان رۆڵمان هەبێت و چالاكی و مەراسیم وەكو یەكێتی ژنان ئەنجام بدەین”.
رەیحان حەمادی هاوسەرۆكی تەڤگەری ئازادی كۆمەڵگەی كوردستان لە كەركوك وتی: “لە دوای ئەوەی حكومەتی عێراقی سەپاندنی یاسای لە كەركوك و چەند جێیەك جێبەجێكرد بەو هۆیەوە كۆمەڵێك دەزگا و شوێن و دەستە و تەنانەت كۆمپانیاش كەوتنە بەر شاڵاوی داخستن و دوورخستنە و یان بە ناچاری خۆیان كار راگرن ئەویش بەهۆ و بیانوی نەبوونی مۆڵەتەوە".
ئاماژەی بەوەشدا: “ئێمەش لەو چوارچێوەی سەپاندنی یاسایە بێبەشنەبووین و ناچار كارەكانمان بە ئاشكرا راگرتوە و گەر شتێكی گشتگیر و یادێكیش هەبێت ئەوا ئەنجاممان نەداوە و بەڵكو براوەتەوە جێیەكی تر لە دەرەوەی كەركوك”.
هەروەها وتی: “لەكار و چالاكی گشتیدا وەكو ژنانی ئازاد و نوێخواز لەم شارە بەشدارین و دوور نەكەوتووینەتەوە بەڵام وەكو چالاكی بۆ مافەكانی ژن و كەیسەكانی ژن بەهۆی رێگەنەدانەوە كارەكان سست بوونەتەوە و تەنها ئەو رێكخراوانەی مۆڵەتی بەغدایان هەیە كاردەكەن و ئەوانیش هەر سانسۆریان لەسەرە لە چاو پێشووتر”.
سەمیرە ئەحمەد چالاكوانی بواری ژنان لە حزبی شیوعی كوردستان دەڵێت: “ئەو بارودۆخەی كە هاتوە بەسەر كەركوكدا لە دوای 16ی ئۆكتۆبەرەوە كاریگەریەكی راستەوخۆی هەبووە بۆسەر رێكخراوەكانی ژنان و ئافرەتان و مافی مرۆڤ چونكە ئەو رێكخراوانە كاری سەرەكیان لەسەر شەقام بوو و لە ناو خەڵكدا بوون بۆ داكۆكی لە مافی مرۆڤ و مافی ژنان”.
باسی لەوەش كرد: “بەهۆی ئەوەی زۆربەی ئەو رێكخراوەنە كوردیی بوون و مۆڵەتی یاسایی فەرمیان لە حكومەتی هەرێمەوە هەبوو نەك عێراق لەبەرئەوە ئێستا ناتوانن بە شێوەیەكی راستەوخۆ كاربكەن و بەردەوامی بەچالاكی بدەن".
رونیشیكردەوە: “حاڵەتێكی تر هەیە لە كەركوك ئەوەش كە هەندێك دەزگای ئەمنی ئەوانەی كە عێراق ناردوونی بۆ كەركوك بە نهێنی نوسینگەیەكیان داناوە و داوای داتا و بەڵگەی تۆمار و مۆڵەتی سەرجەم رێكخراوەكان دەكەن بە وانەی مۆڵەتی بەغداشیان هەیە و لێكۆڵینەوە و لێپێچینەوە دەكەن بە ناوی ئیجرائاتی یاساییەوە و ئەمەش وای كردوە كە زۆربەی رێكخراوەكان بە مۆڵەت و بێ مۆڵەتیش ئاستەنگی لەبەردەم كاری رێكخراوەییان هەبێت و بە ئاشكرا و بەباشی كارنەكەن".

‌ 630 جار بینراوه‌
3/31/2018 8:58:12 PM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved