»  پەڕەموچ
نیشتمان لە خەیاڵی شێركۆ بێكەسدا
هۆشیار جەمال


مرۆڤ لە پاش لەدایك بوون و گەشەكردنی سەرجەم جەستەی و هزری سۆز و خۆشەویستی بۆ ئەوپارچە زەویە یان ئەوخانوە هەیە كە لەسەری دەژی، ئەم خۆشەویستە لەو كاتەوە دەستت پێدەكات كە دایك و باوك رۆڵ دەگێرن وبەردەوام دەبن لە پەیوست بوونیان بەو خانو یان ئەو ناوچەیەی تێدا دەژین وئامادە نابن هەروابەئاسانی بەجێ بهێڵن.
ئەگەر ئەم تێگەیشتنە بە شێوەیەكی گەورەتر ببینین ئەوا بۆمادەردەكەوێت، كەمرۆڤ سۆز و خۆشەویستی بێسنوری هەیە بۆئەو نیشتیمانەی كە دەژی تێداو لێی پەروەردە بووە، وهەردەم هەوڵی پاراستنی داوە لە هێرشی دوژمنان، ئەم خۆشەویستیەلە كەسێكەوە بۆ كەسێكی تر جیاوازە ڕەنگە كەسێكی سەرمایەدار بەوەگەرخستنی سەرمایەكەی لە وڵاتەكەی خۆیدا خۆشەویستی خۆی بۆدربڕی، یان مێژوونوس و شوێنەوارناسان بەگەڕان و ئەنجام دانی توێژینەوەكانیان لە سەر ڕوداوەكان و شوێنەوارە مێژوویەكان لە پێناو هەواڵدان بۆ پاراستنی كەلەپوری وڵاتەكەیان خۆشەویستیان دەربڕن.
شاعیران و نوسەران وئەدیبان نوسەرانی كورد هەرلە ئەحمەدی خانی و حاجی قادری كۆیی ونالی و گۆران و شێخ نوری شێخ ساڵح وچەندانی تر هەریەكەیان لە ڕێگای توانا ئەدەبیەكەیانەوە خۆشەویستیان بۆ نیشیمانە كەیان دەربڕیوە، ئەگەر چی توشی گرتن و زیندانی كردنیش بوبێت، بەڵام بەردەوام بوون و پەیامی خۆیان گەیاندوە، 
شێركۆ بیكەسی شاعیری گەورەی گەلەكەمان لە دەستپێكی شیعر نوسینەوە یاخی بوو لە هەموو كولتور ودەسەڵات و هەموو ئاینەكان لە پێناو نیشتیمانەكەی.
ئەو شاعیرە گەورەیە لە تەنیشتی چرایەكی گەشەوە گەورە بووە كە ئەویش شاعیری نیشتمان پەروەر فایەق بیكەسی باوكی بوو، كەیەكێك بوو لەڕۆشنبیرەهەرە دیارەكانی كورد لە نیوەی یەكەمەی سەدەی بیستەم، كە لە تەمەنێكی كورتدا هەر لە پیشەی مامۆستایەكەیەوە تا شاعیرەتەكەی كە بە شیعرە نیشتمان پەروەریەكانی هەموو نیشتمان پەروەرانی هاندەدا كە ستەمكاری لە دەسەڵاتی سیاسی قبوڵنەكەن.
شێركۆ بێكەس كە بە دیوانی تریفەی هەڵبەست لە ساڵی ١٩٦٨دەستی پێكرد، هەرلەسەرەتاوە نیشتمانی وەك مەعشوقێك بینیوە بە چەندین شێوە فۆڕمی جیاواز لەگەڵ بەرەو پێش چوونی شیعری كوردی دۆزی نەتەوەی كورد و ئەوكارەساتانەی بەسەریدا هاتوون بەردەوام بووە لە خزمەت و نوسین بە درێژای چل ساڵ كە لوتكەی خۆشەویستی بۆ نیشتیمان و گەلەكەی لە گۆڕستانی چراكان و دەربەندی پەپولە و خاچ ومار وڕۆژمیری شاعیرێكدا ڕەنگی داوەتەوە.
بەڵام لە دوای سەركەوتنی شۆرش لە م پارچەیەی كوردستان وبەدی نەهاتنی بە شێك لە مافەكانی خەڵك هێواش هێواش شیركۆ لە مەعشوقەكەی دوركەوتەوە كە نیشتمانە.
سەرەتای رەخنەی شێركۆ بێكەس لە دەقی واڵای كورسیەوە دەستی پێكرد ودواتر لە كتێبە شیعری ملوانكە و هەروەها هەست و نەست درێژەی پێدا تا لە ساڵی 2011 لە دەقی واڵای ئیستا كچێك نیشتنمانمە دا بە تەواوی ڕەنگی دایەوە وگەیشتە لوتكە.
ئێستا كچێك نیشتمانمە یاخی بوونێكی ناوازە و جیاواز بوو لە ڕابردووی شاعیرخۆی گومان كردن بوو لە هەموو بەرهەمەكانی پێشوتری شێركۆ لە بەرهەمە نیشتمانیەكانی تری!
شێركۆ لە نێوان بێدەنگ بوون لە نادادپەروەری و بەرگری كردن لە گەنجانی ماف خوراو دووهەمیانی هەڵبژارد.
لەبیرمە لە ساڵی 2011 كە شێركۆ بێكەس داوای كرد پێش ئەم بەرهەمە پێش ئەوەی بڵاو بكرێتەوە وەك كتێب بەشێوەی دەنگ و ڕەنگ لە كۆڕیكدا بۆ ئەدەب دۆستان و گوێگران بخوێنێتەوە، بەڵام لایەنی پەیوەندیدار ڕێگەیان نەدا بە هۆی باری ئەمنی ئەودەمە كۆڕەكەی بكات.
بۆیە شێركۆبێكەس بڕیاری دا لەیەكێك لە ژێر زەمینەكان بەرهەمەكەی بخوێنێتەوە وەك ناڕەزایی دەربڕینێك، دەقی واڵای ئیستا كچێك نیشتمانمە بەشێكی یەكەمی بەڕۆژمێری كورێكی گەنجی تەمەن نۆزدە ساڵە كە باس لە ئازارو گرفتەكانی خۆی دەكات لە ماوەی حوكمرانی كورد خۆیدا و دەڵێت:

من ناوم ( كامەرانە)
یەكەم درۆی نوساو بەجەستەی خۆمەوە ناوەكەی خۆمە
هەروەك ئەوەی دڕدۆنك ناوی (دڵنیا) بێ و(قاقی)ناوی دارستان بێت.
شیركۆ لە م بەرهەمەیدا دەبێتە زمانحاڵی زۆربەی باڵندە وگیانلەبەرەكان دەبێتە گەروی هاواریان، دەڵیت:

من ناوم كیسەڵە
ئەوەچەند ساڵە لەم گوێ گۆمە حەماڵی ئەكەم
ئائەو كونەش ماڵەكەمە.
بەڵام دوێنێ چەند قاچێكی نیشتمانم لێ پەیدابوون
توڕە و تڕۆ
بەنوكە شەق هەتا ئەو خوارەیان بردم

لەم كتێبە دا چیتر نیشتمان ئەودایكە میهرەبانە نیە كە منداڵەكان لەدەوری كۆببنەوە وبەدادپەروری ژەمە خۆراكێك دابەش بكات بە سەریاندا چونكە نیشتمان بەدەست كۆمەڵێك كەسەوە تەواو هیلاك و ماندوە ڕۆژانە ئازار دەدرێت و دەشت ودۆڵ وڕووبارەكان هەمووی دابەش كراوە تەنانەت مەتریش دێتە گۆ ودەڵیت:

من ناوم( مەترە)
مەتری ئەرز پێوان بێزارم بێزار
ئەوە چەند ساڵە كۆمەڵە دەستێكی نیشتمان
لە بناری ئەوشاخەوە هەتا ناوشارئەمكەنەوە و ڕامەكێشن
جاری واهەیە من چەندین جار تەواو ئەبم
بەڵام ئەوان ئەرزەكانیان تەواو نابێ!
شاعیر بەم زمانە ڕەخنەیە بەردەوام دەبێت تا لە بەشی دوومەدا لە جیاتی كچێك كوردستان دەكاتە نیشتمانی خۆی بەناوی (ڕۆزانا) ئەم كچە لە چاوی شاعیردا پرچە ڕەشەكانی مەراقی دایكێتی ڕەنگی پێستی لە جۆگەلەی بەرهەتاو دەچێت و دەستەكانی لە دەستی بەفری قەسیدە.
دانیشتن لە كەناری ئەو وەك دانیشتە لای ڕووبار هەرچی ئازار و ناخۆشی وسەختی نیشتمانە ڕۆزانا بە جوانی ولێبوردەی وخۆشەویستی لە بیری دەباتەوە، ودەڵیت؛

من ئەوەتەی
ئەوكچەم ناسیوە
ئەوەتەی بارانی پرچی
ئەو لێم ئەدا
بووم بە شاعیری ئاو
وناوبەناو نم نم ئەنوسم و
هەندێك جاریش لێزمە بەخوڕ!
پێستی نازداری ڕۆزانا
لەگەواڵە هەورئەچێ
ڕەنگ برۆنزیی هەمووجارێ
كەسەرنجم
لەهەوری شان و مل ئەدا ئیتر بارانی پەخشان و
خەون و ئاواز بەسەر مندا دائەڕژێ

‌ 799 جار بینراوه‌
4/14/2018 8:11:06 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved