»  باران
ژنان دەیانەوێت دەنگ بە خۆیان بدەن
ئا/ كۆمەڵایەتی

دەنگدانی ژنان بە كاندیدە ژنەكان بۆ هەڵبژاردنە پەرلەمانییەكەی عێراق تا چەند گرنگە، لە كاتێكدا ژنان هەمیشە خۆیان بە ماف خوراو دەزانن، كاتی ئەوە نەهاتووە ئیتر ژنان نوێنەری خۆیان بنێرنە پەرلەمان بۆ داكۆكیكردن لە مافەكانیان. 

پەیمانم بە خۆم داوە دەنگ بە ژن بدەم تا رێژەی ژن زیاتر بكات لە نێو دەسەڵاتەكاندا
سرود محەمەد چالاكوانی بواری مافەكانی ژنان بۆ (هەواڵ) وتی: “ ئەگەر بمانەوێ ئاشتی بونیاد بنێین و دەوڵەت پێشبخەین، ئەوا بە بەشداری هەمولایەك ئەوە دەكرێ، ئەمەش نەك هەموو لایەنێكی سیاسی یان نەتەوەیی، بەڵكو بە مانای بەشداری هەردوو رەگەزیش بە یەكسانی، چونكە كۆمەڵگە لە ژن و پیاو پێكهاتووە”.
هەروەها وتی: “من وەك مێینەیەك پەیمانم بە خۆم داوە دەنگ بە ژن بدەم تا رێژەی ژن زیاتر بكات لە نێو دەسەڵاتەكاندا، ئەو ژنانەی ئێستاش هەڵبژێراون دەبینی لە لیست و قەوارەكاندا هەن، بەڵام راستیەك هەیە كە خۆیان بۆخۆیان لە هەڵمەتی بانگەشەدا لاوازن و خەڵكیش بەشێوەیەكی تر پێشوازی لێكردون و پێشێڵكاری بەدروشم وێنەكانیان دەكرێ و لە توڕەكۆمەڵایەتیەكانیش دژایەتیان دەكەن و زیاتر لەسەر كاندیدە ژنەكان قسە دەكرێ لەچاو پیاوەكاندا”.
ئاماژەی بۆ ئەوەشكرد: “پێویستە بە یەكسانی كار بۆ ژنان بكرێت و كۆمسیۆن هەوڵی یەكسان بۆ هەردوو رەگەز بدات و پێشێلكاری بەرامبەر ژنانیش لەبەرچاوبگرێت، بەڵام بەداخەوە كۆمسیۆن خۆشی زۆربەیان پیاون، دەبینی لە لیستەكاندا بەتایبەت لیستی نەتەوەكانی دی بە ژمارە لەدوای ژمارە هەشت و نۆوە دێن و ژنانیان داوەتە پاش، بەڵام لیستە كوردییەكان باشترن لەچاو ئەوان و دەبێت كۆمسیۆن رەچاوی ئەوەی بكردایە كە قەوارەكان بۆ گرنگی بەژن نادەن”.
ئەو چالاكوانە باسی لەوەشكرد: “كۆمەڵگەكەش هەوڵ نادات بۆ سەرخستنی ژنان كە بەداخەوە ئەمەش خۆی پشتگوێخستنی ژنە لە هەمو روویەكەوە تەنانەت دانانی پیاویش لەسەر بناغەی دەسەڵات و پارە بووە، بەڵام ژنانی باشیش هەن كە توانایان هەیە و دەبێ ببرێنە پێشەوە”.
باسی لەوەشكرد: “ لێكۆڵینەوەیەكمان كردووە كە تێیدا دەركەوتوە سەركەوتن و بەردەوامی خزمەتی ژنان لە لایەنەكانی پەروەردە و تەندروستی و كۆمەڵایەتی و رۆشنبیری بووە، بەڵام زۆربەی پیاوەكان بۆ سودی كەسی بووە و لەروی دەسەڵات و پارە و بەرژەوەندی، جا بۆیە دەبێت ئەو سیستەمەی پێشو تێپەڕێنین و بەیەكسانی بەژن و پیاوەوە دەسەڵات بەرەو ئاشتی بەرین”.
بردنە پێشەوەی ژن و سەرخستنیان لە كاتی دەنگداندا، ئەركی هەموو ژنێكە
رێناس خالید، وەك ژنێكی كەركوكی دەڵێت: “بێگومان بردنە پێشەوەی ژن و سەرخستنیان لە كاتی دەنگداندا، ئەركی هەموو ژنێكە و دەبێت ژنان نوێنەری خۆیان لە خۆیان هەڵبژێرن و ژنی بەتوانا بنێرنە نێو كایەكانی حكومەت و دەسەڵاتەوە، چونكە ژن لە خەمەكانی رەگەزی خۆی زیاتر تێدەگات و هەر خۆشی دەتوانێ ببێتە داكۆكیكارێكی باشی مافەكانی”.
هەروەها روونیكردەوە: “ئەگەرچی لە ماوەكانی رابردودا ژن نێردراوەتە پەرلەمان و كایەكانی دەسەڵات، بەڵام بەڕێژەیەكی پێویست نەبوون و لەگەڵ ئەوەشدا ئەوەندەی لە ململانێی سیاسی بوون، خەریكی كەیسەكانی ژنان وەكو پێویست نەبوون و هەربۆیە دەبێت ژنان، ژنی بەتوانا و خەمخۆر بنێرنە پەرلەمان تا رێژەكەیان زیاتر بێت و هەوڵەكانیان چڕتربێت”.
ئەو خانمە ئەوەش دەڵێت: “ژنانی ئێمە لە كۆمەڵگەیەكی پیاو سالارن و لە بچوكترین بوارەوە مافی ژن لە پاشەوەیە تا بەرزترین ئاستی دەسەڵات، هەر بۆیە ئەم جارەش دەبینی ژمارەی كاندیدی ژن كەمترە لە پیاوان، بەڵام دەبێت ژنان خۆیان كار بۆ سەرخستنی باشترینیان بكەن و ژن دەنگ بەژن بدات”.
پێویستە وەكو ژن كار بۆ ژنانی نێو قەوارەكان بكەین 
ئەمیرە ئەحمەد دەربارەی سەرخستنی ژنان وتی: “ژنان خۆیان بەشێكن لە پاشەكشەی رەگەزی ژن و ئەوەندەی ئەو ژنانەی لە قەوارە و حزب و دەسەڵاتن كاری پیاویان كردووە ئەوەندە كاری ژنیان نەكردووە،  هەروەها ژنی نێو كۆمەڵگەش بەشێكیان متمانە بە كاندیدی پیاو دەبەخشن و دەنگ بە پیاو دەدەن، كە ئەمەش بەشێكە لە كەمكردنەوەی ژنان لە نێو پەرلەمان و دەسەڵاتدا”.
هەروەها وتی: “ئێمە پێویستە وەكو ژن كار بۆ ژنانی نێو قەوارەكان بكەین و كێمان لا پەسەندە كاری بۆ بكەین،  تەنانەت وا لە رەگەزی بەرامبەریش بكەین كە پیاوانن متمانە بە ژنی بە توانا و خاوەن هەڵوێست و كردار ببەخشن،  چونكە ژنیش هیچی لە پیاو  كەمتر نییە و شوێنێكی وەك پەرلەمانیش دەبێت رێژەیەكی بەرچاو ژنی لێبێت، چونكە عێراق لە رووی مافی ژنەوە تا دێت خراپتر دەبێت و هەربۆیە دەبێت داكۆكیكاری ژنان زۆربێت”.


‌ 1005 جار بینراوه‌
4/20/2018 11:20:35 PM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved