»  راپۆرت
بانگەشەی هەڵبژاردنی لیست و قەوارە كوردییەكان لە گەڕەكەكانی خوارووی كەركوك لە ئاستی پێویستدا نیە
ئا / هەواڵ


لیست و كاندیدە كوردەكانی كەركوك زیاتر لە گەڕەكە كوردییەكان بانگەشە دەكەن و پۆستەر و فیلێكس هەڵدەواسن، كوردەكانی گەڕەكە تێكەڵەكانی خوارووی شاریش داوا دەكەن ئەو كاندید و لیستانە قورسایی خۆیان بهێننە گەڕەكەكانی ئەوانیش و جێگری لێپرسراوی مەڵبەندی كەركوكی یەكێتیش دەڵێت:” بەشێك لە كاندیدەكان هەموو تەركیزێكیان لەسەر گەڕەكە كوردییەكانەو گەڕەكەكانی تریان فەرامەشكردووە”.

مەحمود تالیب، هاوڵاتییەكی كوردی دانیشتووی گەڕەكەكانی خوارووی كەركوكە، لە بارەی سستی بانگەشەی لیست و قەوارە كوردییەكان لە خوارووی كەركوك بۆ (هەواڵ) وتی:” بە داخەوە چەند رۆژێك بەسەر بانگەشەی هەڵبژاردن دەستیپێكردووە، بەڵام تائێستا بانگەشەی لایەنە كوردییەكان لەو گەڕەكانەی خوارەوەی كەركوك وەك پێویست بە دی ناكرێت”.
بە وتەی ئەو هاوڵاتییە كوردە، ، ناكرێت لایەنە كوردییەكان ئەو گەڕەكانە فەرامۆش بكەن، لە كاتێكدا دەنگێكی زۆری كوردی تێدایە”.
وتیشی:” داواكارم لە لایەنە كوردییەكان بەتایبەتی یەكێتی، بانگەشەكانی خۆی لەو گەڕەكانەی خوارووی كەركوك بە شێوەیەكی بەرفراوان بڵاو بكاتەوە”.
فەخرەدین محەمەد لێپرسراوی راگەیاندنی مەڵبەنی دووی یەكێتی سەبارەت بە دیاردەكە بۆ (هەواڵ) دەڵێت:” لە راستیدا هەڵمەتی بانگەشەكە لە گەڕەكە تێكەڵەكانی خوارووی كەركوك، زۆر خراپ نییە، بەڵام لەگەڵ ئەوەشدا بە پێی پێویست نییە”.
ناوبراو وتیشی:” ئاسۆ مامەند لێپرسراوی مەڵبەند، بە ڕەسمی بە هەموو كاندیدەكانی لیستی (162)ـی راگەیاندووە، پۆستەرو رێكلامەكانیان بەرنە گەڕەكەكانی خوارووی كەركوك”.
ئەو لێپرسراوەی راگەیاندنی مەڵبەنی دووی یەكێتی باسی لەوەشكرد:” سەرەتای دەستپێكردنی بانگەشەكە تا ئاستێك لە رووی دەرونیەوە لە بار نەبوو، بەڵام ئێستا گۆڕانكاری بەسەر دۆخەكەدا هاتووە، هەفتەی پێشوو دروشم و پۆستەرێكی زۆری لیستی (162)ی یەكێتیمان ناردووە بۆ گەڕەكە تێكەڵەكان و خوارووی كەركوك، ئێستا قورسایی خۆمان زیاتر لە خوارووی كەركوكەو چەندین دروشمی گەورەمان بۆ گەڕەكەكانی خوارووی كەركوك داناوە”.
فەخرەدین ئەو كەمتەرخەمییەی بۆ بەشێك لە خودی كاندیدەكان گەڕاندەوە، كە زۆرترین  تەركیزیان لەسەر گەڕەكە كوردییەكانەو گەڕەكەكانی خوارووی كەركوكیان فەرامۆشكردووە”. ئەوەشی نەشاردەوە:” زۆر جار لەلایەن هەندێ كەسی نەفس نزم و گێرەشێوێنەوە پۆستەرو رێكلامی لیست و قەوارەو كاندیدە كوردەكان لە گەڕەكەكانی خوارووی كەركوك دەدرێنرێن”.
رەوەند مەلا مەحمود، جێگری لێپرسراوی مەڵبەندی رێكخستنی (ی.ن.ك) لە كەركوكیش بۆ (هەواڵ) رایگەیاند:” بەڵێ، برادەرانی خۆشمان ئەو رەخنەیەیان هەیە، كێشەكە لەوەیە، كاندیدەكان تێگەیشتنیان وایە كە تەنها لە گەڕەكە كوردییەكان دەنگدەریان زۆرە، بۆیە هەموویان تەركیزیان لەسەر گەڕەكە كوردییەكانەو گەڕەكەكانی تری خوارووی  كەركوكیان فەرامۆشكردووە”.
رەوەند مەلا مەحمود نەیشاردەوە، كەمی بانگەشە لە گەڕەكەكانی خوارووی كەركوك كارێكی باش نییە، وتیشی:” هەموو كاندیدەكان دەڵێن بانگەشەكانمان دەبەینە گەڕەكەكانی خوارووی كەركوك، بەڵام هێشتا وەك پێویست نەكراوە”.
باسی لەوەشكرد:” لەگەڵ راگەیاندنی مەڵبەند لەسەر ئەو مەسەلەیە قسەم كردووە، ئەوانیش بەڵێنیان داوە بانگەشەكان بەرەو گەڕەكە تێكەڵەكانی خوارووی كەركوك درێژەی پێ بدەن”.
ئاماژەی بەوەشكرد:” بۆ چەند رۆژی داهاتوو، یەكێتی بانگەشەی هەڵبژاردن بە چڕی دەباتە ئەو گەڕەكانەی كە تائێستا بانگەشەكە لە ئاست خواست و داواكاری دەنگدەرانی یەكێتی نین”.
جێگری لێپرسراوی مەڵبەند باسی لەوەشكرد:” حاڵەتی دڕاندنی بانگەشەكانی یەكێتی لەو گەڕەكانە هەبووە، بەڵام حاڵەتی لەو جۆرە لە كاتی هەڵبژاردندا هەر روو دەدات، سكاڵاش تۆماركراوە، بەڵام نابێ ئەوەشمان لە بیر بچێت ، ئەوە حاڵەتێكی بەرنامە بۆ داڕێژراو نییە”.

‌ 650 جار بینراوه‌
4/27/2018 11:14:42 PM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved