»  باران
ژنان بەردەوامی بە كاری سەربەخۆ دەدەن


ژنانی كەركوك و شارەكانی تریش لەم چەند ساڵەی دوایدا بەهۆی هەر دۆخێكەوە بووبێت وەكو جەنگ و ئابوری و قەیران و كۆمەڵایەتی دەستیان داوەتە كاركردن لە پاڵ پیاودا یاخود بەبێ پیاویش هەنگاوی خۆیان ناوە لەپاڵ ئەو كارانەشی كە گشتین و یان كەرتی تایبەتن ژنان كاری سەربەخۆش دەكەن و هەوڵی بەردەوامی ژیان و دابینكردنی بژێوی دەدەن، بۆ ئەو مەبەستەش چەند ژنێك بۆ هەواڵ دەدوێن.
بوشرا ئەحمەد كە چەند پیشەیەكی جیاواز دەكات و دوكانێكی جیاوازیشی لە نێو بازاڕێكی میللیدا هەیە، دوكانەكەی بوشرا نیوەی بۆ شمەكی منداڵە و نیوەكەی تری بۆ پیاوانیشە و ئاسایی كاری خۆی دەكات.
دەربارەی كارەكەی بوشرا بۆ هەواڵ وتی: “من پێچەوانەی ئەوانە قسە دەكەم كە كاری ژن سنوردار دەكەن و پێیان وایە ژنان خۆیان ناتوانن هاوكاری خۆیان و یەكتری بن، ئەوەتا من متمانەم بە خۆمە و توانای ئەو كارەم هەیە و چەند ساڵێكە بەردەوامیشم بە جۆرێك كارێكە جیاوازە بۆ ژن لە كۆمەڵگەی ئێمە و گوایە نابێت هەندێك كار كاری ژن بن بەڵام من گوێم نەداوە و ماڵ و حاڵی خۆمی پێ بەڕێوە دەبەم”،
ئاماژەی بەوەشدا “من لەگەڵ ئەوە كاری كڕین و فرۆشی ئەرزە و خانوش دەكەم و هەر بەوهۆیەشەوە باری دارایم باشە و خاوەنی سامانم، راستە لەماوەی ئەم چەندین ساڵە و كارەكانمدا سەدان قسە و قسەلۆك كراوە و خەڵكی بەردەوام تانە دەدەن، بەڵام پێی ناوێ و گرنگ من خانەوادەكەم لێم تێگەیشتن و لە كارەكانم رازین”،
هەروەها باسی لەوە كرد “پێم وایە هیچ كارێك بۆ هیچ رەگەزێك ئەستەم نییە و گەر خۆمان هەوڵی بۆ بدەین ئەوا دەتوانین”
نەزیرە ئەمین كارێكی ئاسایی دەكات كە لە نێو هەردوو رەگەزدا هەیە و پیشەكەی بەرگدروییە (خەیاتی)یە و دەربارەی كاری جیاواز لە نێو ژندا وتی: “من زۆر حەزم دەكرد كاری جودا بكەم و بیرۆكەی زۆر جیاواز و پرۆژەی زۆرم هەبوون بەگەنجی بەڵام خانەوادە و خەڵكی نەیان هێشت هیچ كارێك بەدڵی خۆم بكەم و پێیان وابوو كاركردن بۆ ژن عەیبەیە و نابێت بكرێت”،
وتیشی من گوێم نەدا و دەیان ئیشم كردوە و ئێستاش پیشەی درومانیم هەڵبژاردوە و لەپاڵ ئەوەش دەتوانم دەرزی بدەم و ژنان دێنە لام بۆ ئەو مەبەستەش”.
نەزیرە ئەمین ئەوەیشی خستەڕوو: “ئێستا خەریك بەرگدوریم و بەڵام خەونەكانم هەر لە سینەم نوستون و هەڵمگرتوون و كاریتریش مابوون بیكەم بەڵام تەمەنیش دەڕوا”.
وتیشی: “بڕوا ناكەم هیچ كات بەو جۆرە ئازادییەوە لەم وڵاتە ماف بە ژنان بدرێت كاری باش بكەن بەڵام جێی خۆشحاڵیشە رێچكەكە شكێنراوە”.
چیمەن شكوری پارێزەر و چالاكی كۆمەڵایەتی پێی وایە “ئێمە قبوڵمان بێت یان نا ئەوا لە ژێر فشاری بیری ئاینی و دابونەریتی جیاوازی كۆمەڵداین و هەمیشە بە پێی بیركردنەوە و لێكدانەوەی هەڵەوە بۆ ژیان و ئاین، ژن بە لاواز و عەقڵ بچوك دانراوە”.
وتیشی: “لە پزیشكیدا زیرەكی ناكەوێتە سەر قەبارەی مێشك بەڵكو زیرەكی لە بیركردنەوە و تواناكاندا بەدیدەكرێت جا هەر رەگەزێك ئەنجامی بدات گرنگ نییە”
ئەو چالاكە باسی لەوەش كرد: “كاركردن مافی رەوای هەمو تاكێكە و لەسەر ئەمەش دەبینین رێكخراوەكانی داكۆكیكار لە ژنان لەسەر ئەم بابەتانە زۆر جەخت دەكەنەوە و بەشێكی كەم لە ژنان هەلیان بۆ رەخسا بێنە پێشەوە بەڵام ئەمە بوێری خۆیانی ویست نەك دەستگرتنی رێكخراوەكان”. ئەوەشی وت: "زۆرمان ماوە بگەین بەوەی كار مافی ژنیشە و كارە جیاوازەكان لەسەر توانا كەوتون نەك رەگەز و ئاستەمیشە كۆمەڵگە بەم زوانە قبوڵی ئەو رێچكە شكاندنە بكات، بەڵام خۆشحاڵیشین كە ژنانێك هەن كاری جیاواز ئەنجام دەدەن و نمونەی بەرچاون و بەهیوای زۆربوونی ئەو ژنانە".

‌ 763 جار بینراوه‌
5/8/2018 7:25:00 PM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved