»  شۆک
سەركەوتنی یەكێتی بردنە پێشەوەی گەنجەكانێتی
ئا/ كۆمەڵایەتی

سەركەوتنی ئەمجارەی یەكێتی لە كوردستان بە گشتی و كەركوك بەتایبەتی بە بەشێكی زۆری هەوڵی گەنجەكانی دادەنرێت، بۆیە گەنجان دەڵێندەبێت لەمەودواش یەكێتی گرنگی بۆ سەرخستنی گەنجان بدات، بەو هۆیەوەش گەنجان داوای بەرەو پێشبردن و مافەكانی خۆیان لەو حیزبە دەكەن.

رێبین محەمەد لێپرسراوی لقی كەركوكی، رێكخراوی ئازادی لاوانی كوردستان بۆ (هەواڵ) وتی: " زۆر جار لەگەڵ مەڵبەندو مەكتەبی سیاسی و كەسایەتیەكان دانیشتووین و هەمومان دڵگرانی خۆمان دەربڕیوە  لەو دۆخەی لە كەركوك هەیەو بەسەر كەركوكدا هاتووە، یاخود ئەودۆخەی كە لە ناو یەكێتی هەبووە، بەڵام كاتێكیش بڕیارمان داوە ئیش بۆ سەرخستنی یەكێتی و لیستەكەی مام جەلال بكەین وتومانە هەرچی لە توانامان بێت بۆ سەركەوتن دەیكەین، بەڵام دوای دەرچوون دەبێت گۆڕانكاری گەورەبكرێت".
رێبین محەمەد ئەوەشیخستەڕوو: "یەكێتی دەبێت نوێ بێتەوەو لە رووی ئیداری و حزبییەوە گۆڕانكاری بەرچاوبكات لە روی سیستەمی ئیشكردن و چالاكی بگۆڕن بۆ شێوازێكی نوێ تا بتوانین گەنج بێنینە پێشەوە و بۆ هەڵبژاردنی ئەنجومەنی پارێزگاش لە مانگی دوانزەدا بتوانین هەر هیچ نەبێ كۆمەڵێكی باش لەو رەخنەو گلەیی و قسانەی لەسەر ئۆرگانەكانی یەكێتی هەیە نەمێنێ".
هەروەها وتی: "گۆڕانكاری بە گۆڕینی دەموچاوەكان دەكرێت و بە كاركردن بە سیستەمێكی نوێ دەكرێت و بۆیە بڕیاروایە دوای یەكلاییبوونەوەی ئەنجامی كۆتایی هەڵبژاردن، یەكێتی چاوێك بە هەموو كایەكانی خۆی بخشێنێتەوە هەم سیاسی و حكومی بۆ ئەوەی گۆڕانكاری گەورەبكات بۆ ئەوەی سەركەوتنێكی تر بۆ یەكێتی تۆماربكرێت و ئەوەش بە هێنانە پێشەوەی گەنج دەكرێت".
رێباز سەباح وەك راگەیاندنكارێكی گەنج بۆ (هەواڵ) وتی: "وەك بینیمان لەم قۆناغە یەكێتی گەنجی هەڵبژارد بۆ سەركەوتن و لەسەرۆكی لیستەوە دەستی پێكردو ئەوانەشی بانگەشیان بۆ حیزبی یەكێتی دەكرد زۆربەی زۆری هەر گەنجەكان بوون و یەكێتی سەركەوتنێكی باشی بەخۆوە بینی".
باسی لەوەشكرد: "یەكێتی بەڵێنی داوە ریفۆرم و چاكسازی بكات، بۆیە گەنجان بڕیاریاندا دەنگی خۆیان بە یەكێتی نیشتیمانی بدەن و پاش ئەم سەركەوتنەش زۆر گرنگە یەكێتی بۆ كۆنگرەو بۆ هەڵبژاردنی ئەنجومەنی پارێزگای كەركوك گەنج بێنێتە پێشەوەو بایەخ بەگەنج بدەن لە هەڵبژاردنی سەركردە و كادری چالاكی گەنج".
رێباز سەباح ئەوەشی وت: "جگە لەپرسی دۆخی گەنج، یەكێتی لە بواری راگەیاندنیش كە هەر بە گەنج بەڕێوەی دەبات، دەبێت زیاتر بێتەوە پێشەوە و راگەیاندنێكی شەرمنانە نەبێت و ئەمەش بەشێك دەبێت لەسەركەوتنەكانی یەكێتی".
سەنگەر سەڵاحەدین ئەندامی لقی زانكۆكانی یەكێتی خوێندكارانی كوردستان بۆ (هەواڵ) وتی: "یەكێتی لەچاو چوار ساڵی رابردوویدا ئەگەر چی بۆ ئەم دۆخەی ئێستای سەركەوتووە، بەڵام ئاشكرایە دەنگێكی زۆریشی لێبووەتەوە بەگشتی و هۆكارەكەشی ئەوەیە بایەخی پێشتری بەگەنج نەداوە و لاوازی و داڕمانی پێشووی یەكێتی هۆكاری یەكەمی غیابی مام جەلالە، دووەمیش ئاوڕنەدانەوە نەبووە لە توێژی گەنج كە داینەمۆی هەمو شۆڕش و دەستكەوتەكانی گەلی كوردبوون".
ئەو گەنجە وتیشی: "بۆ ئەم هەڵبژاردنە یەكێتی هەستی بەو كەموكورتیانەی كردبوو هەربۆیە هەندێك لە جومگەكانی ناو یەكێتی و بەتایبەت كاندیدانی زۆربەی توێژی گەنج بوون كە دەرچووی پەیمانگەی كادیران و رێكخراوە مەدەنییەكان یەكێتی بوون و زۆرلەوانیش لەچەند رۆژی داهاتو بەچاوی خۆمان دەبینین دەچنە پەرلەمان و بەوزەیەكی زۆرەوە بەرگری دەكەن".
باسی لەوەشكرد: "وەك ئاگاداربین یەكێتی بەرنامەی هەیە بۆ توێژی گەنج لە كۆنگرەی ئەم جارەیا بڕوام وایە كۆمەڵێك گەنجی بەتوانای ئەكتیڤ دێنێتە پێشەوە و بۆ ئەنجومەنی پارێزگاش ئەوەندەی ئاگاداربین یەكێتی كۆمەڵێك گەنجی چالاكی دەستنیشان كردووەو كە سەركردایەتیەكەشیان گەنجێكی بە ئەزمونەو چاوەڕوانی كاری باش لە گەنجەكانی دەكەین".
جەختیشیكردوە: "یەكێتی دەبێت تەواو بە خۆیدا بچێتەوە و ئەم چەند ساڵەی كە دێت دەبێت گرنگیەكی زۆر بە گەنج بدات لە هەمو جومگە سەرەكیەكانی ناو حیزب و ناو جكومەتیش، ئەبێ گەنجی چالاك دابنێت تا خزمەتێكی زیاتر بە كۆمەڵانی خەڵكی كوردستان بكەن و هەروەها بۆ هەستانەوەی یەكێتی كە لە رابردودا شكۆیەكی مەزنی هەبووە و ركابەرێكی سەرسەختی نەیارەكانی بووە".

‌ 481 جار بینراوه‌
5/19/2018 1:51:59 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved