»  باران
داوادەكرێت ژنانی براوەی هەڵبژاردنەكان كاری ئایندەیان بۆ مافەكانی ژن بێت
ئا / هاوار ستار

ئەڵماس فازڵ:
لە چوارچێوەی كارنامەكەماندا كاردەكەین بۆ ژن، بە تایبەت  ژنی گەنج




لەگەڵ راگەیاندنی ئەنجامەكانی هەڵبژاردن لە نێو لیست و قەوارەكان و بەتایبەت لیستی یەكێتی نیشتیمانی دەركەوت چەند ژنێك بەبێ كۆتاو بەدەنگێكی باشەوە سەركەوتون و ئەمەش بووە مایەی خۆشحاڵی رەگەزی مێیینە و رێكخراوەكانی ئەو بوارە و هاوكاتیش داوا لە ژنانی سەركەوتوو دەكرێت كارەكانیان بۆ مافەكانی ژنان چڕبكەنەوە.

ئەڵماس فازڵ كاندیدی سەركەوتوی یەكێتی بۆ ئەنجومەنی نوێنەرانی عێراق كە بە دەنگێ خۆی و بەبێ كۆتا سەركەوتنەووە، بۆ (هەواڵ) وتی: “یەكێك لەو كارنامانەی وەكو ژنێك و دواتر وەكو حزبێك بڵاومان كردەوە، بڕوامان بە پەیڕەوی ئەو حزبەیە كە هەمیشە ژنانی سەرخستوە و پێشەنگی كردووە، ئێمە لە چوارچێوەی ئەو كارنامانە كاردەكەین بۆ ژن و بە تایبەت ژنی گەنج كە بتوانین لەتەمەنی گەنجییەوە بیهێنینە پێشەوە و لە 25 ساڵیەوە بیر لەوە بكەینەوە ببنە ئەندامی پەرلەمان و ئەنجومەنی پارێزگاو حیزب”.
هەروەها وتی: “بۆ كاری تایبەت هەوڵەدەین وەكو پیاو ژن ئابوری سەربەخۆی خۆی هەبێت و بتوانێ بەسەربەستی و ئازادی كاربكەن، بەتایبەتیش ژنانی بێ پیاو یاخود خێزانی كەم دەرامەت كە ژنەكانیان بتوانن ئابوری سەربەخۆیان هەبێ و ئێمەش پاڵپشتیان بین و بتوانین بۆیان فەراهەم بكەین  چ لە داینكردنی هەلی كاری تایبەت یاخود كاری گشتی”.
وتیشی: “هەمو ئەو یاسایانەی خزمەت بەبواری ژن ناكات و مافەكانیان دابین ناكا ئێمە دوپاتی دەكەینەوە كە هەوڵبدەین ئەو یاسایانە چاك بكرێنەوە و پەرە بە ژنان بدرێت، چونكە ئەمڕۆ ژن وەك نیوەی كۆمەڵەو سەنگی باشی هەیە لە هەمو بوارەكان و پێشەنگە و لەناو پرۆژەی یەكێتی نیشتیمانی كوردستانیش خەموخۆری زیاتری ژن بین، چونكە لە نێو ئەو حزبەدا بەتایبەت ژن زیاتر بواری پێدەدرێ و سەردەكەوێ”.
ئەڵماس فازڵ باسی لەوەشكرد: “پێمانوایە ژنان هەمووكات پێشەنگن و لە پلەی رێكخراوەییەوە تا سەركردایەتی دەستی باڵایان هەبووە و تەنانەت لە مفاوەزاتەكانیش ژنان پشتیان پێ بەستراوە، چونكە ژن میهرەبان و بەردەوام گشتگیر و روو لە ئاشتییە”. ئەوەشی وت: “هەوڵدەدەین لە بوار یاسایی و ئابوری و كۆمەڵایەتی خزمەتی ژنان بكەین”.
ئەڵماس فازڵ رونیكردەوە: “سەربەرزیە بۆ ژنان و یەكێتی نیشتیمانی كە ژنانی بە هەوڵی خۆیان و چواردەوریان و بێكۆتا سەردەكەون ئەمە خۆی لە خۆیدا وامان لێدەكات ئەركمان قورستربێت و هەوڵی زیاتر بدەین بۆ برەودان بە بوارەكانی ژنان”.
دەشڵێت: “وەكو ژنان و من یەكێ بووم لەو ژنانەی پاش روداوەكانی كەركوك لە شارەكە مامەوە و وەك ژنێك بڕیارمدا ئەم شارە چۆڵنەكەم و نەڕۆم ئەمەش بووە مایەی سەربەرزیمان و گوڕوتینێك ببەخشین بە ژنانی شار و توانیمان ئەنجومەن جارێكی تر كۆبكەینەوە وەك ژن و بەدروشمی لێرە ناڕۆین شارەكەمان دڵنیا كردەوە كە ژنانیش هیچیان لە پیاو كەمتر نییە لە سیاسەت و بەڕێوەبردندا”.
دەربارەی رۆڵی ژنانیش لە سەرخستنی ئەواندا وتی: “ژنانی كەركوك بە زۆربەی پێكهاتەكانیەوە سەلماندیان كە دەنگی ژنیان بەرز كردوەتەوە و چەنێك دەنگی یەكێتی نیشتیمانیمان هێنابێ ئاواش كۆمەڵێك ژنی عەرەب و توركمان دەنگیان پێداوین و سەریانخستوین و بەبەڵگەوە ئەوەم لایە و بۆیە ئێمەش دەبێ نوێنەری راستەقینەی ژنان بین و ئەركی زیاتر كەوتوەتە سەرشانمان”.
سرود محەمەد لێپرسراوی لقی كەركوكی كۆمەڵەی هیوای عیراقی و چالاكوانی بواری ژنان بۆ (هەواڵ) وتی: “زۆرمان پێخۆشە ژنان لە شارەكەماندا سەردەكەون و بەدەنگی خەڵكی دەچنە پێشەوە و ئەوان دەبێت ببنە كۆتری ئاشتی و كار لەسەر ئەوە بكەن بۆ چەسپاندنی مافەكانی ژنان و منداڵان و بتوانن یاسای بەرەنگاربوونەوەی توندوتیژی خێزانی بكەنە بواری جێبەجێكردنەوە و چەند ساڵە ئەو یاسایە دەرنەچووە پێویستە لەروی كۆمەڵایەتییەوە”.
هەروەها وتی: “دەبێت ژنانی سەركەوتوی ئەمجارە ببنە نوێنەری راستەقینەی ئەم شارە و هەوڵی چەسپاندنی یاسا بدەن لە شارەكە چونكە تەنانەت لە دادگاش مافی ژن دەخورێت لەم وڵاتە”.
ئەو چالاكوانە وتیشی: “ئێمەش وەكو رێكخراو كارمان بۆ ژنانی كاندید كردووە و لە راستیدا هەوڵی ئێمە بۆ سەرخستنی ژن بووە لەنێو ژنان و ئاوارەكان و تەنانەت پانێل و كۆڕیشمان بۆ كردوون تا بتوانین بیانبەینە پێشەوە و لە ئێستاشەوە ئەوانەی دەرچوون ئێمە دەبینە یارمەتیدەریان و دەبێ ئەوانیش لەگەڵمان بن لە رێكخراوەكاندا تا بتوانین یارمەتیدەریان بین بۆ ئیشەكانیان و كەسیشیان لێمان دەرباز نابن، چونكە ئیشمان لێیان دەوێ و چاودێریان دەكەین”.
سرود محەمەد وتیشی: “دەبێت لەبەشی پاراستنی خێزان و منداڵ هەوڵ بۆ ئەوەبدرێت پۆلیسی ژن دابمەزرێنرێت و لە بەندینخانەی تەسفیرات ژن تەرخان بكرێت، چونكە پێویستیمان بەژنە لەو بوارانە و دەبێت كار بۆ ئەوەش بكرێت شێلتەرێك لەم شارە دابنرێت و ژنانمان كار بۆ ئەم بوارانە بكەن لە بەغدا”.  





‌ 624 جار بینراوه‌
5/19/2018 1:53:23 AM
Print Friendly and PDF
بابەتی زیاتر ...
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved