»  پەڕەموچ
گەمەی پەریزادەكان.. گۆڕستانێكی یۆتۆبیایی بۆ كتێبە فـەرامۆشكراوەكان
عەبدولڕەحیم سەرەڕۆ


 رۆمانی گەمەی پەریزادەكان بە ئینگلیزی ((The Angels Game لە نووسینی نووسەری ناوداری ئیسپانی كارلۆس زافۆن كە بە زمانی لاتینی نووسیویەتی، باس لە كوچەو كۆڵانەكانی ئیسپانیا دەكات بەر لە هەڵگیرسانی شەڕی ناخۆی ئیسپانی ساڵی 1918 بەمەش نووسەر بەشێوەیەكی سەرسامكەر دەمانگێڕێتەوە سەر زیندووكردنەوەی ئەو رووداوە دڵتەزێنانەی كە تا ئاستێك فەرامۆشكرابوون.
لەم رۆمانەدا نووسەر لەگەڵ كاراكتەری سەرەكی رۆمانەكە كە ناوی "دیڤید مارتین"ـە بە شێوەی گێرانەوەو لەسەر شێوازی شێوازی گۆتیك دەمانباتە ناو رووداوگەلێك لە بۆن و بەرامەی چیرۆكی هەواڵگری یان پۆلیسی پڕ لە گۆڕانكاریە كتوپڕەكان، مارتین كەسێكی زۆر ئاڵۆزو سەیرە، لەدوای ئەوەی باوكی بەبەر چاوییەوە لەلایەن كۆمەڵێك چەتەوە دەكوژرێت بە تەنیایی دەژیت و لەسەرەتاوە لە دەزگایەكی رۆژنامەوانی كاردەكات و ئیتر دەبێتە نووسەری چیرۆكی پۆلیسی بەرامبەر بە بەخششێك لەلایەن پیدرۆ فیدرۆ كە یدوایی دەبنە دوو هاورێی گیانی بە گیانی. 
زافۆن دوای ناوداركردنی كاراكتەرەكەی دەیگەیەنێتە پاریس و لەوێوە بە باگراوند ژیانی دەگێڕێتەوەو دەیگەڕێنێتەوە بۆ سەردەمی مناڵی و یەكەم ئازارەكانی ژیان لە تافی منداڵییەوە دەست پێدەكات كە باوك و دایكی لێكجیادەبنەوەوە بە تەنها لەگەڵ باوكی لە بارودۆخێكی زۆر دژواردا دەگوزەرێنێت، جارێكیان لەسەر داوای زۆر و پێداگری مناڵەكە باوكی دەیباتە بینینی دایكی كە لە موغازەیەكی پۆشاكفرۆشیدا لە دوورەوە بۆی دەڕوانێت كە وەك كارمەندێك لەو شوێنە كاری دەكرد، دواتر مارتین بەبێ یاوەری دایكی چەندین جار لە هەمان گۆشەوە بە تاسەساردییەوە بۆ دایكی دەڕوانێت.
مارتین چونكە دایكی خێزانەكە جێ دەهێڵێت و لێیان دوور دەكەوێتەوەو هیچ كەسێكی بۆ نامێنێتەوە، ئیتر خوو بە خوێندنەوەوە دەگرێت و تاكە هاورێیەك لە ژیانیدا دەمێنێتەوە ئەویش كتێبە كە بە هۆی مستەر سیمبیری خاوەن كتێبخانەیەكەوە كە دەیگرێتە خۆی و فێری خوێندنەوەی دەكات، كاراكتەرەكە بیری دەكەوێتەوە كە بە چ بەرخودان و زەحمەتییەك كتێبی ( پێشبینییە مەزنەكان ـ Great Expectations)ـی چارلز دیكنزی لە ترسی باوكی لە حەوت كون شاردۆتەوە نەبادە بیبینێت و بیسووتێنێت، هەر بەو هۆیەوە شەوێكیان بە روخسارێكی خوێناوییەوە بە هەڵەداوان دەچێتە ماڵی مستەر سیمبێری و ئەویش چاودێری دەكات تا تەندروستی جێگیر دەبێت، دواتر زۆر بە نهێنی دەیباتە قەبرستانی كتێبە فەرامۆشكراوەكان و لەگەڵ سێر ئیسحاق پاسەوانی شوێنەكە بەیەكتریان دەناسێنێت، ئەویش كتێبەكە لەوشوێنە دەشارێتەوەو دواتر دەگەڕێتەوە بۆ ماڵەكەی خۆی. 
زافۆن لە بیرەوەرییەكانی مارتینی كاراكتەرەوە دەمانگوازێتەوە بۆ ناو رووداوەكان، نووسەر لەگەڵ خانەیەكی بڵاوكردنەوە رێكدەكەوێت بۆ نووسین و بڵاوكردنەوەی زنجیرە چیرۆكێك بە ناوی "شاری نەفرەت لێكراوەكان"، دوای سەركەوتنی كتێبەكەو شفڕۆشتنی لە بازاڕەكان مارتین تووشی نەخۆشییەكی كوشندە دەبێت لە سەری و پزیشكەكەی پێی دەڵێت تەمەن روو لە كۆتاییەو دەبێ پشوو بدات، بەم هەواڵە تووشی نائومێدی دەبێت و دەچێتە لای سێر ئەندریاس كۆریلای و داوای هاوكاری لێدەكات تا كتێبەكەی بۆ بەچاپ بگەیەنێت، بەیانیەكیان مارتین لە خەو دەهەستێت و دەبینێت بڕێك پارە كە سەد هەزاردۆلارە بۆ دانراوە، پارەكە هەڵدەگرێت و بە تەندروستییەكی باشەوە دەچێتە دەرەوە، زافۆن لەم رۆمانەدا باسی پەیوەندییەكی لەبارچووی خۆشەویستی نێوان مارتین و سكرتێری دەزگاكە دەكات كە لە دوای مردنی باوكییەوە بە ناچاری هاوسەرگیری لەگەڵ پیاوێكی تر دەكات.
ئەم گۆڕستانی كتێبانە پەرستگایەكەو شوێنی پیرۆزی كتێبە فەرامۆشكراوەكانە، ئەو كتێبانەی لێوانلێون لە رۆحی مرۆڤەكان، نووسەران و خوێنەران و كاراكتەرەكانی ناو مێژوو، ئەوانەی كە بە هۆیەوە چێژیان لە ژیان بینیوە، لە گۆڕستانی كتێبە فەرامۆشكراوەكاندا ئەو كتێبانە نوستتون كە كەس نایانخوێنێتەوە، بەو رادەیەی چوونەتە خانەی فەرامۆشكردنی ئەبەدی، دانیال سێمبێری كاراكتەری رۆمانی گەمەی پەریزادەكان لە رێگەی رێكەوتەوە نەبووە كە باوكی پەلی دەگرێت و كتێبێكی بەرگ هەڵكۆڵراوی دەداتێ لەسەری نووسراوە "سێبەری با" لە نووسینی ژولیانا كاراكس و لەو گۆڕستانە دەری دەهێنێت و دووبارە بە تەواوی رۆحییەوە ژیانی پێ دەبەخشێتەوە، دیسانەوە دەچێتەوە خانەی خوێندن و ئەوانەی سەسامی دەبن و ئەوانەی رقیان لە خوێندنەوەی دەبێتەوەو ئەوانەی سوودی لێوەردەگرن یان چێژی لێ دەبینن تا ئەگاتە ئەوپەڕی هەر جۆرە پیاهەڵدان یان زەمكردن و تیر تێگرتنێك، رێكەوت و یەك لەدوای یەكی رووداوەكان لە بیرۆكەیەكی هەڵچنراوی گێڕانەوەدا رووداوەكان پێكدادەدەن و خوێنەر بەدوای ئاكامەكانی ئەو بتبەتانەدا دەگەڕێت كە لەناكاو ون دەبن و لە شوێنێكی ترەوە بەگوڕتر سەرهەڵدەدەن و بەو شێوەیە كۆمەڵە رووداوەان پێكەوە لە داڕشتنێكی فانتازی خەیاڵ ئامێزدا چنراون و ماوەی چەندین ساڵ لە قاڵبێكی زەمەنی هارمۆنیدا دەبینرێن.
ماوەی رووداوەكان لە ماوەی دە ساڵدا دەخوێنرێنەوە واتا تا ئەوكاتەی كە ساتەكانی سەرهەڵدانی جەنگی نلاوخۆ لە ئیسپانیا لە ئارادیەو كاریگەری بەسەر مرۆڤ و رووداوەكاندا دەردەكەوێت، كە بەسەر دەچێت قوربانیانی وەك خۆیان دەمێننەوە، بازرگانەكان و سوود لێمەندەكان زیاتر سەردەكەون و ئازارو برینەكان قووڵتر دەبنەوە، زافۆن هەموو ئەم وێنە سەرمەدیانەی پاشماوەی شەڕی ناوخۆی لە روخساری یەك بە یەكی كاراكتەرەكانیدا كێشاوە، ئەو كاراكتەرانەی نووسەر ئازادی كردوون و بەهیچ شێوەیەك دەرهاویشتە دەروونییەكانی خۆی لەسەر دانەناون ئەمەش خۆی لە خۆیدا شكاندنی قاڵبی نووسینی رۆمانە لەسەردەمێكی تردا.
كارلۆس زافۆن كە ئێستا لە ئەمریكا بە ماركیزی بەرشلۆنە دەناسرێت زۆربەی كاراكتەرەكانی كلۆجێكی درامییان هەیە، هەر یەكەو سەر بە رێبازێكن لە ژیان، هەر یەكەو جۆرە ماسكێك بەسەر رووخسارە سروشتیەكەیەوە هەیە، كاراكتەری دی دتۆریس گەورەترین بەڵگەیە بۆ مەبەستەكەمان كە سەرەتا شۆڕشگێرێكی نیشتمانی بووە، چەندین جار راوەوونان و زیندانی و ئەشەنجەی بینیوە، كە جەنگ كۆتایی دێت دەبێتە مرۆڤێكی بێ هوودەی گومراو لەهیچ ئەزموونێكی ترسناك ناگەڕێتەوە بەوەی خراپترینی بینیوەو وتاقیكردۆتەوە، بۆیە گوێ ناداتە ئەو ژنەی كە خۆشی دەوێت و ئامادەیە هاوسەرگیری لەگەڵ بكات، بەڵام ئەم پاشگەزدەبێتەوە بەوەی ناتوانێت ببێتە هاوسەرو باوكێكی باش بۆ پێكەوەنانی خێزان، هاوبار بیری لەوەش دەكردەوە ژنێكی بڕوادار هەرگیز ناتوانێت لەگەڵ پیاوێكی ئەتایستی توندوتیژ پێكەوە هەڵكەن. 
ئەم رۆمانە كەشوهەوایەكی خەیاڵی و جادووئامێزی هەیە، كە لە رووی داڕتن و گێڕانەوەی ئەدەبیەوە زۆرجار رۆمانەكانی گابریل گارسیا ماركیزمان بیر دەخاتەوە، زیاتر دانانی بیرۆكەو پێشبینیكردنی شاردراوەی تێدایە، هاوكات وێنەی زۆرجوانی بەدەم رووداوەكانەوە وەك دیمەنێك كێشاوەو لێوانلێوە لە كەسێتی نامۆ، بە تایبەت ئەو كاراكتەرانەی نەخۆشی دەروونییان هەیە، جگە لەوەش چەندین هێماو كەشوهەوای ریالیستی و میتافیزكی لەخۆگرتووە كە پڕە لە هەندێك كێشە كە جاروبار بە بێشیكردنەوە بۆ خوێنەری جێ دەهێڵێت، ئەم نووسەرە بەهۆی ئەم شاكاری جوانەوە كارێكی زۆر گەورەی پێشكەش بە بواری ئەدەبی كردووە، كە زاكیرەمان پڕ دەكات لە وێنەی نوێ و لە وێنە كاڵ و بەسەرچووەكانمان دووردەخاتەوە، ئەم هونەرەشی بە ناوەڕۆكی بابەتێكدا دارێژراوە، كارێكی هونەری نەستەق و پڕ لە داهێنان و جوانی. 

*(كارلۆس رویز زافۆن Carlos Ruiz Zafón) لەدایكبووی 1964ـی بەرشلۆنەیە، سەرەتا چیرۆكی بۆ مێردمنداڵان نووسیسوە، دواتر دەستی كردووە بە نووسینی چیرۆك و بڵاوكردنەوەی لە گۆڤارو رۆژنامەكاندا، خاوەن خەڵاتی یەكەمی (Edebé) لەسەر ئەدەبی مێرمنداڵان. هاوبار خاوەنی چوار رۆمانی گەورەیە كە دواینینان "گەمەی پەریزادەكان"ـە، شاكارەكانی یاتر لە 50 وڵات دەخوێنرێنەوەو وەرگێردراونەتە سەر 50 زمانی جیاجیای جیهانی و زیاتر لە یەك ملیۆن دانەی لەناو خودی بەریتانیا دوای وەرگێڕانی فرۆشراوە، ئیستا لەناوەندی ئەدەبیدا بە ماركیزی بەرشەلۆنە ناسراوە.

‌ 531 جار بینراوه‌
5/26/2018 2:01:15 AM
Print Friendly and PDF
بابەتی زیاتر ...
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved